പശ്ചിമേഷ്യയിൽ നിലനിൽക്കുന്ന അസ്ഥിരമായ സുരക്ഷാ സാഹചര്യങ്ങളുടെ പശ്ചാത്തലത്തിൽ, സൗദി അറേബ്യയിലേക്കും തിരിച്ചുമുള്ള വിമാന സർവീസുകൾ റദ്ദാക്കുന്നത് നവംബർ 14 വരെ നീട്ടിയതായി പ്രമുഖ വിമാനക്കമ്പനിയായ ഇൻഡിഗോ എയർലൈൻസ് ഔദ്യോഗികമായി അറിയിച്ചു. രാജ്യത്തെ പ്രധാന നഗരങ്ങളായ റിയാദ്, ജിദ്ദ, ദമ്മാം, മദീന എന്നിവിടങ്ങളിലെ വിമാനത്താവളങ്ങളെ ലക്ഷ്യമിട്ടുള്ള സർവീസുകളെയാണ് ഈ നിയന്ത്രണം ബാധിക്കുന്നത്.
മേഖലയിലെ നിലവിലെ സ്ഥിതിഗതികൾ അതീവ ജാഗ്രതയോടെ നിരീക്ഷിച്ചു വരികയാണെന്നും, ബന്ധപ്പെട്ട അധികാരികളുമായി നിരന്തരം ചർച്ചകൾ നടത്തിവരുന്നുണ്ടെന്നും കമ്പനി വ്യക്തമാക്കി.
ഇക്കാര്യം വ്യക്തമാക്കി ഇൻഡിഗോ ‘എക്സ്’ പ്ലാറ്റ്‌ഫോമിലൂടെയാണ് പ്രസ്താവന പുറത്തിറക്കിയത്. ഇൻഡിഗോയുടെ ഈ ഔദ്യോഗിക വാർത്താക്കുറിപ്പ് റിയാദിലെ ഇന്ത്യൻ എംബസിയും തങ്ങളുടെ സമൂഹമാധ്യമ പേജിലൂടെ പങ്കുവെച്ച് സ്ഥിരീകരിച്ചിട്ടുണ്ട്.
യാത്ര റദ്ദാക്കൽ മൂലം ബുദ്ധിമുട്ടിലായ യാത്രികരെ, ടിക്കറ്റ് ബുക്ക് ചെയ്യുമ്പോൾ നൽകിയിട്ടുള്ള ബന്ധപ്പെടാനുള്ള നമ്പരുകൾ വഴി നേരിട്ട് വിവരം അറിയിക്കുന്നതാണെന്ന് അധികൃതർ അറിയിച്ചു. സർവീസ് മുടങ്ങിയവർക്ക് യാതൊരുവിധ അധിക തുകയും ഈടാക്കാതെ യാത്രയുടെ തീയതി മാറ്റിയെടുക്കുവാനോ അല്ലെങ്കിൽ ടിക്കറ്റ് തുക പൂർണ്ണമായി റീഫണ്ട് ചെയ്ത് വാങ്ങുവാനോ ഉള്ള സൗകര്യം കമ്പനി ഏർപ്പെടുത്തിയിട്ടുണ്ട്.
വിമാനത്താവളങ്ങളിലേക്ക് പുറപ്പെടുന്നതിന് മുൻപായി യാത്രക്കാർ ഇൻഡിഗോയുടെ ഔദ്യോഗിക വെബ്‌സൈറ്റ് സന്ദർശിച്ച് സർവീസുകളുടെ തത്സമയ വിവരങ്ങൾ പരിശോധിക്കണമെന്ന് അധികൃതർ കർശന നിർദ്ദേശം നൽകിയിട്ടുണ്ട്. യാത്രക്കാരുടെയും ജീവനക്കാരുടെയും സുരക്ഷയ്ക്കാണ് എപ്പോഴും മുൻഗണന നൽകുന്നതെന്നും, നിലവിലെ സാഹചര്യത്തിലുണ്ടായ യാത്രാ തടസ്സങ്ങളിലും അനിശ്ചിതത്വത്തിലും ആത്മാർത്ഥമായി ഖേദം പ്രകടിപ്പിക്കുന്നതായും ഇൻഡിഗോ മാനേജ്‌മെന്റ് കൂട്ടിച്ചേർത്തു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
