ജിബോർഡിലെ ഈ മാറ്റങ്ങൾ ടൈപ്പിംഗ് കൂടുതൽ വേഗതയേറിയതും സുഗമവുമാക്കും

സ്മാർട്ട്ഫോൺ ഉപയോഗത്തിൽ നമ്മിൽ പലരും കാര്യമായി ശ്രദ്ധിക്കാത്ത ഒന്നാണ് കീബോർഡ് ക്രമീകരണങ്ങൾ. എന്നാൽ ചില ഡിഫോൾട്ട് ഫീച്ചറുകൾ ടൈപ്പിംഗ് അനുഭവം കൂടുതൽ സങ്കീർണ്ണമാക്കുന്നുണ്ടെന്ന് തിരിച്ചറിയേണ്ടതുണ്ട്.

അനാവശ്യമായ വിഷ്വൽ ശല്യങ്ങളും ആവശ്യമില്ലാതെ വാക്കുകൾ തിരുത്തുന്നതും ടൈപ്പിംഗിന്റെ വേഗത കുറയ്ക്കുന്നു. അത്തരം ചില ക്രമീകരണങ്ങൾ മാറ്റിയാൽ ടൈപ്പിംഗ് എത്രമാത്രം എളുപ്പമാകും എന്ന് പരിശോധിക്കാം.

ഓട്ടോകറക്റ്റ് (Autocorrect) ക്രമീകരണം
ടൈപ്പ് ചെയ്യുമ്പോഴുള്ള അക്ഷരത്തെറ്റുകൾ തിരുത്താൻ സഹായിക്കുമെന്ന ലക്‌ഷ്യം വെച്ചാണ് ഓട്ടോകറക്റ്റ് പ്രവർത്തിക്കുന്നത്. എന്നാൽ പലപ്പോഴും പേരുകളും സ്ലാങ് വാക്കുകളും സാങ്കേതിക പദങ്ങളും ഇത് തെറ്റായി തിരുത്താറുണ്ട്.

സന്ദേശം അയച്ചശേഷമായിരിക്കും പലപ്പോഴും ഈ മാറ്റങ്ങൾ ആളുകൾ ശ്രദ്ധിക്കുന്നത് തന്നെ. ഇത് ടൈപ്പിംഗ് വേഗതയെ സാരമായി ബാധിക്കുന്നു.

Gboard ആപ്പിലെ ഗിയർ ഐക്കൺ ക്ലിക്ക് ചെയ്ത് ‘Corrections and suggestions’ എന്ന ഭാഗത്ത് പോയി ഓട്ടോകറക്റ്റ് ഓഫ് ചെയ്യുന്നത് വഴി ഈ പ്രശ്നം ഒഴിവാക്കാം. അടുത്ത വാക്ക് നിർദ്ദേശിക്കുന്ന ഫീച്ചർ (Next-word suggestions)
കീബോർഡിന് മുകളിലായി അടുത്തതായി ടൈപ്പ് ചെയ്യേണ്ട

വാക്ക് കാണിക്കുന്ന ഭാഗം പലപ്പോഴും ശ്രദ്ധ തിരിക്കുന്ന ഒന്നാണ്. ഇത് സ്ക്രീനിൽ അനാവശ്യമായ തിരക്ക് ഉണ്ടാക്കുന്നു.

ഗിയർ ഐക്കൺ വഴി ‘Next-word suggestions’ ഓഫ് ചെയ്താൽ ഈ സ്ട്രിപ്പിൽ ചോദ്യചിഹ്നം (?), ആശ്ചര്യചിഹ്നം (!) തുടങ്ങിയ പങ്ചുവേഷൻ ഷോർട്ട്കട്ടുകൾ ലഭ്യമാകും. ഇത് വഴി ?123 കീ എടുക്കാതെ തന്നെ വേഗത്തിൽ ചിഹ്നങ്ങൾ ഉപയോഗിക്കാൻ സാധിക്കും.

ഗ്ലൈഡ് ടൈപ്പിംഗ് (Glide typing) ഒഴിവാക്കാം
ഓരോ അക്ഷരങ്ങളിലും തൊടുന്നതിന് പകരം വിരൽ കീബോർഡിലൂടെ സ്ലൈഡ് ചെയ്ത് ടൈപ്പ് ചെയ്യുന്ന രീതിയാണിത്. എന്നാൽ ഇത് പലപ്പോഴും തെറ്റായ വാക്കുകൾ വരാൻ കാരണമാകാറുണ്ട്.

വാക്ക് തെറ്റിയാൽ അത് തിരുത്താൻ കൂടുതൽ സമയം വേണ്ടിവരുന്നു. ഗിയർ ഐക്കൺ വഴി ‘Glide typing’ ഓഫ് ചെയ്താൽ ടൈപ്പിംഗ് കൂടുതൽ കൃത്യതയുള്ളതായി മാറും.

ഇമോജി നിർദ്ദേശങ്ങളും കീ പോപ്പ്-അപ്പുകളും
ടൈപ്പ് ചെയ്യുമ്പോൾ ഓരോ വാക്കിനും ഒപ്പം ഇമോജികൾ നിർദ്ദേശിക്കപ്പെടുന്ന ഫീച്ചർ പലപ്പോഴും അശ്രദ്ധമായി ഇമോജി സെൻഡ് ചെയ്യാൻ ഇടയാക്കും. ഗിയർ ഐക്കൺ വഴി ‘Show emoji’ ഓഫ് ചെയ്താൽ ഈ പ്രശ്നം പരിഹരിക്കാം.

അതുപോലെ ഓരോ കീ അമർത്തുമ്പോഴും സ്ക്രീനിൽ അക്ഷരം വലുതായി കാണിക്കുന്ന ‘Key pop-up’ ഫീച്ചറും ‘Preferences’ വഴി ഓഫ് ചെയ്യാവുന്നതാണ്. ഇത് വഴി കീബോർഡിന്റെ രൂപം കൂടുതൽ വ്യക്തതയുള്ളതായി മാറും.

ഹാപ്റ്റിക് ഫീഡ്‌ബാക്ക് (Haptic feedback)
കീബോർഡ് ഉപയോഗിക്കുമ്പോൾ ചെറിയ തോതിലുള്ള വൈബ്രേഷൻ നൽകുന്ന ഫീച്ചറാണിത്. എന്നാൽ വേഗത്തിൽ ടൈപ്പ് ചെയ്യുമ്പോൾ ഇത് തുടർച്ചയായ വൈബ്രേഷനുകൾക്ക് കാരണമാകുകയും ടൈപ്പിംഗ് ഭാരമുള്ളതായി തോന്നിപ്പിക്കുകയും ചെയ്യുന്നു.

‘Preferences’ ൽ പോയി ‘Keyboard vibration’ ഓഫ് ചെയ്യുന്നത് വഴി ടൈപ്പിംഗ് അനുഭവം കൂടുതൽ ലളിതവും സുഗമവുമാക്കി മാറ്റാം.