കൊല്ലം കുണ്ടറ കസ്റ്റഡി മർദ്ദന ആരോപണം: സിപിഒ എസ്. ശ്രീജിത്തിന് സസ്പെൻഷൻ

കൊല്ലം കുണ്ടറയിൽ യുവാവ് മരണപ്പെട്ട സംഭവത്തിൽ ഉയർന്ന കസ്റ്റഡി മർദ്ദന ആരോപണത്തിൽ സി.പി.ഒ എസ്.

ശ്രീജിത്തിനെ സസ്പെൻഡ് ചെയ്തു. അന്വേഷണത്തിന്റെ ഭാഗമായാണ് റൂറൽ എസ്.പി നടപടി സ്വീകരിച്ചിരിക്കുന്നത്.

പൊലീസ് ജീപ്പിൽ വെച്ച് സിയാദിനെ ശ്രീജിത്ത് ദേഹോപദ്രവത്തിന് ഇരയാക്കിയെന്നാണ് പ്രധാന ആരോപണം. സിയാദിനെ കസ്റ്റഡിയിലെടുത്ത സന്ദർഭത്തിലുണ്ടായ നടപടിക്രമങ്ങളിൽ വീഴ്ച സംഭവിച്ചതായി സസ്പെൻഷൻ ഉത്തരവിൽ വ്യക്തമാക്കുന്നുണ്ട്.

കഴിഞ്ഞ ജൂൺ 16-നാണ് വിദ്യാർത്ഥിയെ കാണാനില്ലെന്ന പരാതിയുടെ അടിസ്ഥാനത്തിൽ സിയാദിനെ കുണ്ടറ പൊലീസ് കസ്റ്റഡിയിൽ എടുത്തത്. തുടർന്ന് ജൂൺ 17-ന് ഇയാളെ വിട്ടയക്കുകയും ചെയ്തു.

എന്നാൽ പിന്നീട് ജൂലൈ 25-നാണ് സിയാദ് മരണപ്പെടുന്നത്. യാതൊരു പങ്കുമില്ലാത്ത ഒരു സംഭവത്തിന്റെ പേരിൽ രാത്രികാലങ്ങളിൽ വീട്ടിലെത്തിയാണ് പൊലീസ് കസ്റ്റഡി നടപടികൾ സ്വീകരിച്ചത്.

കസ്റ്റഡി കാലയളവിലേറ്റ മർദ്ദനവും അതിനെത്തുടർന്നുള്ള അണുബാധയുമാണ് സിയാദിന്റെ മരണത്തിന് കാരണമെന്ന് കുടുംബം ശക്തമായി ആരോപിക്കുന്നു. സംഭവത്തിൽ ജില്ലാ ക്രൈം ബ്രാഞ്ച് പോസ്റ്റ്മോർട്ടം നടത്തിയ ഡോക്ടറുടെ മൊഴി രേഖപ്പെടുത്തിയിട്ടുണ്ട്.

അതേസമയം, സിയാദ് മരണപ്പെട്ടത് ഹെപ്പറ്റൈറ്റിസ് സി മൂലമാണെന്നാണ് പരിശോധനാ ഫലത്തിൽ പറയുന്നത്. കസ്റ്റഡിയിൽ നിന്ന് വിട്ടയച്ചതിനു ശേഷം സിയാദിനെ മറ്റൊരാൾ മർദിച്ചിട്ടുണ്ടെന്ന് മുഖ്യമന്ത്രി വ്യക്തമാക്കിയിരുന്നു.

തുടർനടപടികളുടെ ഭാഗമായി ജില്ലാ ക്രൈം ബ്രാഞ്ച് സിയാദിന്റെ കുടുംബത്തിന്റെ മൊഴിയും രേഖപ്പെടുത്തിയിട്ടുണ്ട്. കസ്റ്റഡിയിലുള്ള വാഹനത്തിൽ വെച്ച് സി.പി.ഒ തന്നെ മർദ്ദിച്ചതായി പരാതിക്കാരിയായ പെൺകുട്ടിയും വെളിപ്പെടുത്തിയിരുന്നു.

നിലവിൽ ശാസ്ത്രീയ തെളിവുകളും ശേഖരിച്ച മൊഴികളും അന്വേഷണ സംഘം പരിശോധിച്ച് വരികയാണ്.