കേന്ദ്ര മന്ത്രിസഭയിലും സംഘടനാ തലത്തിലും വരാനിരിക്കുന്ന നിർണായക മാറ്റങ്ങളുടെ ഭാഗമായി, പാർട്ടിയിൽ ‘ഒരാൾക്ക് ഒരു പദവി’ എന്ന നയം കർശനമായി നടപ്പാക്കാൻ ബിജെപി നേതൃത്വം തീരുമാനിച്ചു. ഇത് സംബന്ധിച്ച അന്തിമ പട്ടിക തയ്യാറായിട്ടുണ്ടെന്നും ഔദ്യോഗിക പ്രഖ്യാപനം ഉടൻ ഉണ്ടാകുമെന്നുമാണ് ഉന്നതതലങ്ങളിൽ നിന്നുള്ള വിവരം.
ജൂലൈ 21-ന് ആരംഭിക്കുന്ന പാർലമെന്റിന്റെ വർഷകാല സമ്മേളനത്തിന് മുന്നോടിയായി ഭരണ-സംഘടനാ തലങ്ങളിൽ വലിയ മാറ്റങ്ങൾ പ്രതീക്ഷിക്കാം. വരാനിരിക്കുന്ന നിയമസഭ തിരഞ്ഞെടുപ്പുകളും വിവിധ സംസ്ഥാനങ്ങളിലെ രാഷ്ട്രീയ സാഹചര്യങ്ങളും ഈ അഴിച്ചുപണിയിൽ നിർണായക ഘടകമാകും.
പാർട്ടി അധ്യക്ഷൻ നിതിൻ നവീൻ സഹമന്ത്രിമാരുമായി കഴിഞ്ഞയാഴ്ച നടത്തിയ കൂടിക്കാഴ്ച ഈ നടപടികളുടെ ഭാഗമാണെന്ന് വിലയിരുത്തപ്പെടുന്നു. നിലവിൽ സംഘടനാപരമായ മാറ്റങ്ങളിലേക്ക് കൂടുതൽ യുവനേതാക്കളെ കൊണ്ടുവരാനാണ് പാർട്ടി നേതൃത്വത്തിന്റെ തീരുമാനം.
ജെ.പി. നഡ്ഡ അധ്യക്ഷനായിരുന്ന കാലയളവിലെ പഴയ ടീമിനെ മാറ്റി പുതിയ നേതൃനിരയെ അണിനിരത്താനാണ് സാധ്യത.
കേന്ദ്ര മന്ത്രിസഭയിലെ വകുപ്പു മാറ്റങ്ങൾ സംബന്ധിച്ചും ചർച്ചകൾ സജീവമാണ്. വിദ്യാഭ്യാസ മന്ത്രി ധർമേന്ദ്ര പ്രധാൻ അടക്കമുള്ളവരുടെ വകുപ്പുകളിൽ മാറ്റം വരുമോയെന്നത് രാഷ്ട്രീയ കേന്ദ്രങ്ങളിൽ ഉറ്റുനോക്കപ്പെടുന്നുണ്ട്.
കൂടാതെ, പഞ്ചാബിൽ നിന്നുള്ള കാബിനറ്റ് മന്ത്രി ഹർദീപ് സിങ് പുരിയുടെ തുടർപ്രവർത്തനങ്ങളും ചർച്ചാവിഷയമാണ്. ജെഫ്രി എപ്സ്റ്റീനുമായുള്ള ബന്ധം സംബന്ധിച്ച് ഉയർന്ന ആരോപണങ്ങൾ പ്രതിപക്ഷം ആയുധമാക്കിയ സാഹചര്യത്തിൽ, നവംബറിൽ കാലാവധി അവസാനിക്കുന്ന അദ്ദേഹത്തിന്റെ കാര്യത്തിൽ പാർട്ടി അന്തിമ തീരുമാനമെടുത്തേക്കും.
മറ്റൊരു സംഭവവികാസത്തിൽ, രാജ്യസഭാ കാലാവധി പൂർത്തിയായതിനെ തുടർന്ന് സഹമന്ത്രിയായിരുന്ന ജോർജ് കുര്യൻ സ്ഥാനം ഒഴിഞ്ഞിരുന്നു. എന്നാൽ, പഞ്ചാബിൽ നിന്നുള്ള രവ്നീത് സിങ് ബിട്ടു ഇതുവരെ രാജിവെച്ചിട്ടില്ല.
പഞ്ചാബിലെ വരാനിരിക്കുന്ന നിയമസഭ തിരഞ്ഞെടുപ്പ് കണക്കിലെടുത്ത് അദ്ദേഹത്തിന്റെ കാര്യത്തിൽ വളരെ ശ്രദ്ധയോടെയുള്ള സമീപനമായിരിക്കും പാർട്ടി സ്വീകരിക്കുക. ഇതിനുപുറമെ, ആംആദ്മി പാർട്ടിയിൽ നിന്ന് ബിജെപിയിലെത്തിയ രാഘവ് ഛദ്ദയുടെ കാര്യത്തിലും വരുംദിവസങ്ങളിൽ വ്യക്തത വരുത്തേണ്ടതുണ്ട്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
