കടലിലൂടെയുള്ള ഗവേഷണ യാത്രയ്ക്കിടെ ബോട്ടിന് സമീപം എത്തിയ സ്രാവ് യുവതിയെ ആക്രമിക്കാൻ ആഞ്ഞടുത്തെന്ന് റിപ്പോർട്ട്. ജിയോർജിയയിലെ ടൈബി ഐലൻഡിന് സമീപത്താണ് സഞ്ചാരികളെയും ഗവേഷകരെയും ഒരുപോലെ ഞെട്ടിച്ച ഈ സംഭവം അരങ്ങേറിയത്.
സമുദ്ര ഗവേഷണ ബോട്ടിൽ നിന്ന് വെള്ളത്തിലേക്ക് കൈ നീട്ടി തൊടാൻ ശ്രമിച്ച യുവതിക്ക് നേരെയാണ് ഗ്രേറ്റ് വൈറ്റ് ഷാർക്ക് ആക്രമണത്തിന് മുതിർന്നത്. ഈ സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്.
വിമുക്ത ഭടന്മാർക്കും അവരുടെ കുടുംബങ്ങൾക്കുമായി സൗജന്യ ഫിഷിംഗ് ട്രിപ്പുകൾ സംഘടിപ്പിക്കുന്ന സംഘടനയായ ‘നോട്ട് ലക്കി ഫിഷിംഗി’ന്റെ സ്ഥാപകനും മുൻ ആർമി റെഞ്ചറുമായ ജിമ്മി ലീ ആർമൽ ആണ് ഫേസ്ബുക്കിലൂടെ ഈ ദൃശ്യങ്ങൾ പുറത്തുവിട്ടത്. സ്രാവുകളിൽ ടാഗ് ഘടിപ്പിക്കുന്ന ഗവേഷണ യാത്രയുടെ ഭാഗമായാണ് സംഘം കടലിൽ എത്തിയത്.
സ്രാടുകളുടെ സഞ്ചാരപഥവും ജീവിതരീതികളും പഠനവിധേയമാക്കുന്നതിനായി അവയെ പിടിച്ച് ടാഗ് ചെയ്ത് തിരികെ വിടുന്നതാണ് ഈ ഗവേഷണത്തിന്റെ രീതി. ബോട്ടിലുണ്ടായിരുന്ന ജെൻ എന്ന യുവതിയാണ് വെള്ളത്തിലുണ്ടായിരുന്ന ഗ്രേറ്റ് വൈറ്റ് ഷാർക്കിനെ തൊടാൻ ശ്രമിച്ചത്.
എന്നാൽ നിമിഷനേരം കൊണ്ട് സ്രാവ് അതിവേഗം തിരിഞ്ഞ് അവരുടെ കൈക്ക് നേരെ കടിക്കാൻ കുതിക്കുകയായിരുന്നു. വളരെ ഭയപ്പെടുത്തുന്ന രംഗമായിരുന്നെങ്കിലും ജെൻ യഥാർത്ഥത്തിൽ വലിയൊരു അപകടത്തിൽപ്പെട്ടിരുന്നില്ലെന്ന് പിന്നീട് ആർമൽ വ്യക്തമാക്കി.
ജിമ്മി ലീ ആർമൽയുടെ വാക്കുകൾ ഇങ്ങനെ:
“ക്രൂ അംഗങ്ങളുടെ പൂർണ്ണ നിയന്ത്രണത്തിലായിരുന്നു സ്രാവ്. അതിനാൽ ആർക്കും പരിക്കേറ്റില്ല.
എന്നാൽ, ഈ ജീവികൾ എത്രത്തോളം ശക്തരും അപകടകാരികളുമാണെന്ന് ഈ സംഭവം നമ്മെ ഓർമ്മിപ്പിക്കുന്നു. അവ അർഹിക്കുന്ന ആദരവ് നാം നൽകേണ്ടതുണ്ട്.” എന്നാൽ, സുരക്ഷിതമായ സാഹചര്യം ലഭിക്കാത്തതിനാലും ക്രൂവിന്റെയും സ്രാവിന്റെയും സുരക്ഷ മുൻനിർത്തിയും ഈ സ്രാവിൽ ടാഗ് പതിപ്പിക്കാൻ സാധിച്ചില്ലെന്ന് അദ്ദേഹം വ്യക്തമാക്കി.
തുടർന്ന് സ്രാവിനെ യാതൊരുവിധ ഉപദ്രവവുമില്ലാതെ സുരക്ഷിതമായി കടലിലേക്ക് തന്നെ തുറന്നുവിടുകയായിരുന്നു. നാഷണൽ ജിയോഗ്രാഫിക്കിന്റെ റിപ്പോർട്ട് പ്രകാരം, ലാംനിഡേ കുടുംബത്തിലെ മകെരൽ ഷാർക്ക് വർഗ്ഗത്തിൽപ്പെട്ടവയാണ് ഗ്രേറ്റ് വൈറ്റ് ഷാർക്ക്സ് (Great White Sharks).
ശരീരത്തിന്റെ അടിവശത്തെ വെളുത്ത നിറം കാരണമാണ് ഇവയ്ക്ക് ഈ പേര് ലഭിച്ചത്. അതേസമയം, ഇവയുടെ ശരീരത്തിന്റെ മുകൾഭാഗം ചാരനിറത്തിലോ തവിട്ടുനിറത്തിലോ ആയിരിക്കും കാണപ്പെടുന്നത്.
1975-ൽ പുറത്തിറങ്ങിയ പ്രശസ്തമായ ‘Jaws’ എന്ന ചലച്ചിത്രത്തിലൂടെ ലോകമെമ്പാടും ഏറ്റവും അധികം ശ്രദ്ധിക്കപ്പെട്ട സ്രാവ് വർഗ്ഗം കൂടിയാണിത്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
