നീണ്ട ഇരുപത് വർഷത്തെ ജയിൽവാസത്തിന് ശേഷം അബ്ദുൽ റഹീം ഇന്ന് നാട്ടിലെത്തും

സൗദി അറേബ്യയിലെ ജയിലിൽ രണ്ട് പതിറ്റാണ്ടോളം നീണ്ട തടവുശിക്ഷ അനുഭവിച്ച കോഴിക്കോട് ഫറോക്ക് സ്വദേശി അബ്ദുൽ റഹീം ഇന്ന് നാട്ടിലെത്തും.

രാവിലെ 7.25-ന് കരിപ്പൂർ അന്താരാഷ്ട്ര വിമാനത്താവളത്തിലാണ് അദ്ദേഹം എത്തിച്ചേരുന്നത്. സൗദി ബാലന്റെ മരണവുമായി ബന്ധപ്പെട്ട

കേസിലാണ് അബ്ദുൽ റഹീമിന് ശിക്ഷ ലഭിച്ചത്. നിയമനടപടികൾക്കൊടുവിൽ 34.35 കോടി രൂപ ദയാധനമായി നൽകിയാണ് അദ്ദേഹത്തിന്റെ മോചനം സാധ്യമായത്.

പ്രവാസി മലയാളികളുടെയും സുമനസ്സുകളുടെയും വലിയ തോതിലുള്ള കൂട്ടായ ഇടപെടലുകളാണ് ഈ വലിയ തുക സമാഹരിക്കാൻ സഹായിച്ചത്. കഴിഞ്ഞ 19-ാം തീയതിയാണ് ഇദ്ദേഹത്തിന്റെ തടവുശിക്ഷാ കാലാവധി പൂർത്തിയായത്.

സൗദിയിൽ പൊതു അവധി ദിനമായിരുന്നിട്ടും നടപടിക്രമങ്ങൾ പൂർത്തിയാക്കി മോചനത്തിനുള്ള വഴികൾ തുറക്കുകയായിരുന്നു. നാട്ടിലെത്തുന്ന അബ്ദുൽ റഹീമിനെ സ്വീകരിക്കാൻ ബന്ധുക്കളും നാട്ടുകാരും ഉൾപ്പെടെ വലിയൊരു നിര തന്നെ വിമാനത്താവളത്തിൽ കാത്തിരിപ്പുണ്ട്.