ബംഗ്ലാദേശിലെ ഒരു സ്വകാര്യ ആശുപത്രിയിൽ ആറ് നവജാതശിശുക്കൾ ദാരുണമായി മരിച്ചു. അദ്–ദിൻ ആശുപത്രി വാർഡിൽ ചികിത്സയിലായിരുന്ന, ജനിച്ച് ഒരു ദിവസം മുതൽ മൂന്നുദിവസം വരെ മാത്രം പ്രായമുള്ള കുഞ്ഞുങ്ങളാണ് മരണത്തിന് കീഴടങ്ങിയത്.
ആശുപത്രിയിലെ എയർ കണ്ടീഷണർ നിർത്തിവെച്ചതുമായി ബന്ധപ്പെട്ട സംഭവവികാസങ്ങളാണ് കുട്ടികളുടെ മരണത്തിലേക്ക് നയിച്ചതെന്നാണ് പ്രാഥമിക റിപ്പോർട്ടുകൾ സൂചിപ്പിക്കുന്നത്.
സംഭവത്തിന്റെ പശ്ചാത്തലം
പുലർച്ചെ 2 മണിയോടെ വാർഡിൽ ഉണ്ടായിരുന്ന കുഞ്ഞുങ്ങൾക്ക് അമിതമായി തണുക്കുന്നുവെന്നാരോപിച്ച് കൂട്ടിരിപ്പുകാരിലൊരാൾ പരാതി ഉന്നയിച്ചിരുന്നു. ഇതിനെത്തുടർന്ന് മുറിയിലെ എസി ഏകദേശം ഒരു മണിക്കൂറോളം നിർത്തിവെച്ചു.
എന്നാൽ, പിന്നീട് ചൂട് അനുഭവപ്പെട്ടതിനെ തുടർന്ന് എസി വീണ്ടും പ്രവർത്തിപ്പിച്ചു. ഇതിനുശേഷം രണ്ട് കുട്ടികൾക്ക് ശാരീരിക അസ്വസ്ഥതകൾ അനുഭവപ്പെടുകയും അവരെ ഉടൻ തന്നെ എൻഐസിയുവിലേക്ക് മാറ്റുകയും ചെയ്തു.
ചികിത്സയ്ക്കുശേഷം ഇവരെ വാർഡിലേക്ക് തിരികെ കൊണ്ടുവന്നെങ്കിലും, പുലർച്ചെ 6 മണിയോടെ വീണ്ടും നില വഷളായി. തുടർന്ന് എൻഐസിയുവിലും വെന്റിലേറ്ററിലും പ്രവേശിപ്പിച്ചെങ്കിലും ആറ് കുഞ്ഞുങ്ങളുടെയും ജീവൻ രക്ഷിക്കാനായില്ലെന്ന് മെട്രോപൊളിറ്റൻ പൊലീസ് വ്യക്തമാക്കി.
രാവിലെ 6 മണിക്ക് ആദ്യ മരണം റിപ്പോർട്ട് ചെയ്യപ്പെട്ടതിന് പിന്നാലെ 9.30-ഓടെയാണ് മറ്റ് കുട്ടികളും മരണത്തിന് കീഴടങ്ങിയത്. അന്വേഷണം ഊർജിതമാക്കി
സംഭവം നടക്കുമ്പോൾ ധാക്കയിലെ അന്തരീക്ഷ താപനില ഏകദേശം 32 ഡിഗ്രി സെൽഷ്യസ് ആയിരുന്നു.
എസി ഓഫാക്കിയതോടെ മുറിക്കുള്ളിൽ വായുസഞ്ചാരം നിലയ്ക്കുകയും ശ്വാസം മുട്ടുന്ന അവസ്ഥ സംജാതമാവുകയും ചെയ്തതായി ആരോഗ്യ വകുപ്പ് മേധാവി പ്രഭാത് ചന്ദ്ര ബിശ്വാസ് വിശദീകരിച്ചു. എസിയിലുണ്ടായ സാങ്കേതിക തകരാറിനെ തുടർന്ന് വാതക ചോർച്ച ഉണ്ടായിട്ടുണ്ടോ എന്നും ഇത് കുട്ടികളുടെ ആരോഗ്യനിലയെ ബാധിച്ചോ എന്നും പരിശോധിച്ചുവരികയാണ്.
ഈ സംഭവത്തിൽ സമഗ്രമായ അന്വേഷണം നടത്താൻ ആരോഗ്യ മന്ത്രാലയത്തിലെ ജോയിന്റ് സെക്രട്ടറിയുടെ നേതൃത്വത്തിൽ മൂന്നംഗ അന്വേഷണ സമിതിയെ നിയോഗിച്ചു. മൂന്ന് ദിവസത്തിനുള്ളിൽ റിപ്പോർട്ട് സമർപ്പിക്കാനാണ് നിർദ്ദേശം നൽകിയിരിക്കുന്നത്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
