ആന്ത്രോപിക് സുരക്ഷാ സംവിധാനങ്ങൾ ഭേദിച്ച് കത്തീഡ്രൽ; എഐ രംഗത്ത് പുതിയ ആശങ്ക

കൃത്രിമ ബുദ്ധി രംഗത്തെ പ്രമുഖ സ്ഥാപനമായ ആന്ത്രോപിക് കമ്പനിയുടെ സുരക്ഷാ സംവിധാനങ്ങളെ ഞെട്ടിച്ചുകൊണ്ട് നിർണായക വെളിപ്പെടുത്തൽ പുറത്തുവന്നു. വെറും 12 മണിക്കൂറിനുള്ളിൽ ആന്ത്രോപിക്കിന്റെ ആന്തരിക ശൃംഖലയിലേക്ക് കടന്നുകയറാൻ സൈബർ സുരക്ഷാ സ്റ്റാർട്ടപ്പായ കത്തീഡ്രൽ വിജയിച്ചതായാണ് റിപ്പോർട്ട്.

ജീവനക്കാരുടെ വ്യക്തിവിവരങ്ങൾ, ശമ്പള കണക്കുകൾ, തൊഴിൽ വാഗ്ദാനങ്ങൾ, കമ്പനിയുടെ അത്യാധുനിക എഐ മോഡലുകളെക്കുറിച്ചുള്ള രഹസ്യ സന്ദേശങ്ങൾ എന്നിവയിലേക്കാണ് ഈ സംഘം പ്രവേശനം നേടിയത്. പ്രമുഖ മാധ്യമമായ ദ വാഷിങ്ടൺ പോസ്റ്റ് പുറത്തുവിട്ട

കരട് റിപ്പോർട്ടിലാണ് ഈ വിവരങ്ങൾ ഉൾപ്പെടുത്തിയിരിക്കുന്നത്. സുരക്ഷാ പരിശോധനകളുടെ ഭാഗമായി പുറത്തുനിന്നുള്ള ഗവേഷകർക്കായി കമ്പനി നടത്തിയ പരിപാടിക്കിടെയാണ് ഈ പിഴവുകൾ കണ്ടെത്തിയത്.

കമ്പനിയുടെ ഭരണപരവും വിൽപ്പനയുമായി ബന്ധപ്പെട്ടതുമായ ആവശ്യങ്ങൾക്ക് ഉപയോഗിക്കുന്ന സോഫ്റ്റ്‌വെയറുകളിലെ സുരക്ഷാ പാളിച്ചകൾ കണ്ടെത്താൻ കത്തീഡ്രൽ എഐ ഏജന്റുകളെയാണ് ഉപയോഗിച്ചത്. 12 മണിക്കൂറിൽ താഴെ സമയംകൊണ്ട് നടത്തിയ ഈ പരിശോധനയിൽ മീറ്റിങ് സംഭാഷണരേഖകളും സ്ലാക്കിലെ ആന്തരിക സന്ദേശങ്ങളും ഉൾപ്പെടെയുള്ള നിർണായക വിവരങ്ങളിലേക്ക് വഴിയൊരുങ്ങിയതായി റിപ്പോർട്ട് വ്യക്തമാക്കുന്നു.

അമേരിക്കൻ സർക്കാരിന്റെ കാര്യക്ഷമതാ വകുപ്പിൽ സേവനമനുഷ്ഠിച്ചിരുന്ന മുൻ ഉദ്യോഗസ്ഥർ ചേർന്ന് രൂപീകരിച്ചതാണ് കത്തീഡ്രൽ കമ്പനി. സർക്കാർ ഏജൻസികൾക്കും വൻകിട

കോർപ്പറേഷനുകൾക്കുമായി എഐ അധിഷ്ഠിത സൈബർ സുരക്ഷാ ഉപകരണങ്ങളാണ് ഇവർ നിർമ്മിക്കുന്നത്. വിൽപ്പന, മാനവവിഭവശേഷി, വിവരസാങ്കേതികവിദ്യ എന്നീ വിഭാഗങ്ങളിലെ പരിമിതമായ സംവിധാനങ്ങളിലേക്ക് മാത്രമാണ് ഗവേഷകർക്ക് പ്രവേശനം ലഭിച്ചതെന്ന് ആന്ത്രോപിക് ഔദ്യോഗികമായി സ്ഥിരീകരിച്ചു.

ചില ഉപഭോക്താക്കളുടെയും പങ്കാളികളുടെയും ബിസിനസ് ബന്ധപ്പെടാനുള്ള വിവരങ്ങളും അടിസ്ഥാന ഉപയോക്തൃ അക്കൗണ്ട് രേഖകളും ഇതിൽ ഉൾപ്പെട്ടിരുന്നു. എങ്കിലും ഉപഭോക്താക്കൾ ക്ലോഡ് ചാറ്റ്ബോട്ടുമായി നടത്തിയ സംഭാഷണങ്ങളിലേക്കോ എഐ നൽകിയ മറുപടികളിലേക്കോ പ്രവേശനം ലഭിച്ചിട്ടില്ലെന്ന് കമ്പനി വ്യക്തമാക്കി.

കൂടാതെ, കമ്പനിയുടെ എഐ സംവിധാനങ്ങളുടെ സോഴ്‌സ് കോഡും മോഡൽ വെയ്റ്റുകളും പൂർണ്ണമായും സുരക്ഷിതമായിരുന്നു. കത്തീഡ്രലിന്റെ ചില നീക്കങ്ങൾ തങ്ങളുടെ നിരീക്ഷണ സംവിധാനങ്ങൾ മുൻകൂട്ടി തിരിച്ചറിഞ്ഞിരുന്നുവെന്നും വിവരം ലഭിച്ച അതേ ദിവസം തന്നെ പ്രവേശനം തടഞ്ഞുവെന്നും ആന്ത്രോപിക് പ്രസ്താവനയിലൂടെ അറിയിച്ചു.

കത്തീഡ്രലിന് പുറമെ മറ്റാരെങ്കിലും ഈ പഴുതുകൾ ദുരുപയോഗം ചെയ്തതായി തെളിവുകളില്ല. സുരക്ഷാ വീഴ്ചകൾ കണ്ടെത്തിയ ഉടൻ തന്നെ ബന്ധപ്പെട്ട

ബിസിനസ് സോഫ്റ്റ്‌വെയറുകളുടെ പ്രവർത്തനം താൽക്കാലികമായി നിർത്തിവച്ചു. സോഫ്റ്റ്‌വെയർ നിർമാതാക്കൾ സുരക്ഷാ പാളിച്ചകൾ പരിഹരിച്ചതായി ഉറപ്പുവരുത്തിയ ശേഷമാണ് ഇവ വീണ്ടും പ്രവർത്തനക്ഷമമാക്കിയത്.

സംഭവത്തിന്റെ ഗൗരവം കണക്കിലെടുത്ത് ഫെഡറൽ ഉദ്യോഗസ്ഥർക്കും കമ്പനി വിവരങ്ങൾ കൈമാറിയിട്ടുണ്ട്. ഇത് ദേശീയ സുരക്ഷയെക്കുറിച്ചുള്ള ആശങ്കകൾക്കും വഴിവെച്ചിട്ടുണ്ട്.

വിഷയം സർക്കാർ സംവിധാനങ്ങൾക്കുള്ളിൽ ചർച്ചയായതായി ട്രംപ് ഭരണകൂടത്തിലെ ഒരു മുതിർന്ന ഉദ്യോഗസ്ഥൻ ദ വാഷിങ്ടൺ പോസ്റ്റിനോട് വെളിപ്പെടുത്തി. എഐ കോഡിങ് സ്റ്റാർട്ടപ്പായ കോഗ്നിഷന്റെ ചീഫ് ഇൻഫർമേഷൻ സെക്യൂരിറ്റി ഓഫീസർ അലക്സ് സ്റ്റാമോസ് മൂന്നാം കക്ഷി സോഫ്റ്റ്‌വെയറുകൾ കൈകാര്യം ചെയ്യുന്നതിലെ പോരായ്മകൾ എടുത്തുപറഞ്ഞു.

ഇത്തരം പ്രശ്നങ്ങൾ പരിഹരിക്കുക ദുഷ്കരമാണെങ്കിലും ആന്ത്രോപിക്കിന് കൂടുതൽ ജാഗ്രതയോടെ പ്രവർത്തിക്കാമായിരുന്നുവെന്നാണ് അദ്ദേഹത്തിന്റെ അഭിപ്രായം. എന്നാൽ, സംഭവത്തിന്റെ ദേശീയ സുരക്ഷാ പ്രത്യാഘാതങ്ങൾ കത്തീഡ്രൽ പെരുപ്പിച്ചുകാട്ടിയെന്നാണ് ആന്ത്രോപിക് ഉന്നയിക്കുന്ന ആരോപണം.

സുരക്ഷാ പരിശോധനാ പരിപാടിയുടെ എല്ലാ മാനദണ്ഡങ്ങളും സ്റ്റാർട്ടപ്പ് പാലിച്ചില്ലെന്നും കമ്പനിയുടെ സംവിധാനങ്ങളിൽ നടത്തിയ എല്ലാ പ്രവർത്തനങ്ങളും വെളിപ്പെടുത്താൻ തയ്യാറായില്ലെന്നും കമ്പനി കുറ്റപ്പെടുത്തി. എന്നാൽ ഗവേഷണത്തിന് അത്യാവശ്യമായ ഏറ്റവും കുറഞ്ഞ വിവരങ്ങളിലേക്കു മാത്രമാണ് പ്രവേശനം നേടിയതെന്നാണ് കത്തീഡ്രലിന്റെ വിശദീകരണം.

എഐ ഏജന്റുകൾക്ക് നിയന്ത്രണങ്ങൾ മറികടന്ന് സ്വതന്ത്രമായി പ്രവർത്തിക്കാൻ കഴിയുമെന്ന ആശങ്കകൾ ശക്തമാകുന്നതിനിടെയാണ് പുതിയ സംഭവം പുറത്തുവരുന്നത്. സ്വന്തം എഐ മോഡലായ ക്ലോഡ് അനുമതിയില്ലാത്ത വിവരങ്ങൾ പരിശോധിച്ചതും പ്രവർത്തിച്ചതുമായ മറ്റ് സംഭവങ്ങളും ആന്ത്രോപിക് മുൻപ് വെളിപ്പെടുത്തിയിട്ടുണ്ട്.

അടുത്തിടെ അമേരിക്കയിലെ ജോർജിയ സംസ്ഥാനത്തിന്റെ വെബ്‌സൈറ്റിലെ പഴയ പതിപ്പിലുണ്ടായിരുന്ന സുരക്ഷാ പഴുത് ഉപയോഗിച്ച് ക്ലോഡ് ആകെ വോട്ടുകളുടെ കണക്കുകളിലേക്ക് പ്രവേശിച്ചതായി റിപ്പോർട്ട് ഉണ്ടായിരുന്നു. ഫീസ് അടച്ചശേഷം മാത്രം ലഭിക്കേണ്ട

വിവരങ്ങളിലേക്ക് പ്രവേശിക്കാൻ സഹായിക്കുന്ന ഡിജിറ്റൽ ടോക്കൺ വെബ്‌സൈറ്റ് അനുവദിച്ചതായും കമ്പനി വ്യക്തമാക്കി. എങ്കിലും വോട്ടർ രജിസ്ട്രേഷൻ സംവിധാനത്തിലേക്ക് ക്ലോഡ് കടന്നിട്ടില്ലെന്നും വ്യക്തിഗത വോട്ടർമാരുടെ വിവരങ്ങൾ ശേഖരിക്കുകയോ വോട്ടിങ് രേഖകളിൽ മാറ്റം വരുത്തുകയോ ചെയ്തിട്ടില്ലെന്നും കമ്പനി കർശനമായി വ്യക്തമാക്കി.

ആകെ വോട്ടുകളുടെ കണക്കുകൾ മാത്രമാണ് ലഭിച്ചതെന്നും സമാന സംഭവങ്ങൾ ആവർത്തിക്കാതിരിക്കാൻ സുരക്ഷാ സംവിധാനങ്ങൾ കൂടുതൽ ശക്തമാക്കിയെന്നും ആന്ത്രോപിക് അറിയിച്ചു. അമേരിക്കൻ സർക്കാർ ഏജൻസികളുടെ വെബ്‌സൈറ്റുകളിലുൾപ്പെടെ ടോക്കൺ അല്ലെങ്കിൽ ഫീസ് ഉപയോഗിച്ച് സംരക്ഷിച്ചിരുന്ന വിവരങ്ങളിലേക്ക് പ്രവേശിക്കാൻ ക്ലോഡ് നിയന്ത്രണങ്ങൾ മറികടന്ന സമാന സംഭവങ്ങൾ മുൻപും റിപ്പോർട്ട് ചെയ്യപ്പെട്ടിട്ടുണ്ട്.

ഇവയുടെ യഥാർഥ ലോകത്തെ പ്രത്യാഘാതങ്ങൾ പരിമിതമായിരുന്നുവെന്നാണ് കമ്പനിയുടെ വിശദീകരണം. ഇതിനുപുറമെ, പരിഹരിക്കപ്പെടാത്ത ഒരു കൊലപാതകത്തെക്കുറിച്ച് വ്യാജ വിവരം ഫിലാഡൽഫിയ പൊലീസിന് നൽകിയതായി ആന്ത്രോപിക്കിന്റെ ഒരു എഐ മോഡലിനെക്കുറിച്ച് റിപ്പോർട്ടുണ്ടായിരുന്നു.

കഴിഞ്ഞ ഓഗസ്റ്റിൽ ഒരു എഐ മോഡൽ 19 വിസ അപേക്ഷകൾ സമർപ്പിച്ചതായി അമേരിക്കൻ സ്റ്റേറ്റ് ഡിപ്പാർട്ട്‌മെന്റും വ്യക്തമാക്കിയിരുന്നു. എഐ ഏജന്റുകൾക്ക് നൽകുന്ന അധികാരപരിധിയും അവയുടെ പ്രവർത്തനങ്ങൾ നിരീക്ഷിക്കുന്ന സംവിധാനങ്ങളും കൂടുതൽ ശക്തമാക്കേണ്ടതിന്റെ ആവശ്യകതയാണ് ഇത്തരം സംഭവങ്ങൾ ഓർമ്മിപ്പിക്കുന്നത്.