സ്മാർട്ട്ഫോൺ ബാറ്ററി പെട്ടെന്ന് തീരുന്നുണ്ടോ? ലൊക്കേഷൻ പെർമിഷനുകൾ നിയന്ത്രിക്കാം

നാല് ദശലക്ഷത്തോളം ആപ്പുകൾ ലഭ്യമായ ഗൂഗിൾ പ്ലേ സ്റ്റോറിൽ നിന്ന് ആവശ്യമില്ലാത്ത ആപ്പുകൾ ഡൗൺലോഡ് ചെയ്ത് സൂക്ഷിക്കുന്ന ശീലം പലർക്കുമുണ്ട്. സ്മാർട്ട്ഫോൺ ഉപയോഗത്തിലെ ബാറ്ററി ഉപഭോഗത്തെക്കുറിച്ച് നടത്തിയ ഒരു ചെറിയ പരിശോധനയിൽ ശ്രദ്ധേയമായ ചില വിവരങ്ങൾ പുറത്തുവന്നിരിക്കുന്നു.

അമിതമായി ആപ്പുകൾ ഡൗൺലോഡ് ചെയ്ത് ഉപയോഗിക്കുന്നതും, ഉപയോഗമില്ലാത്ത ആപ്പുകൾ ഫോണിൽ സൂക്ഷിക്കുന്നതും ബാറ്ററിയുടെ ആരോഗ്യത്തെ ഗുരുതരമായി ബാധിക്കുന്നുണ്ട്. ബാറ്ററി വേഗത്തിൽ തീരുന്നതിന്റെ പ്രധാന വില്ലന്മാരിൽ ഒന്നാണ് ജി.പി.എസ് (GPS) ഉപയോഗം.

നാം ആപ്പുകൾ സജീവമായി ഉപയോഗിക്കാത്ത സമയത്തും പശ്ചാത്തലത്തിൽ പ്രവർത്തിക്കുന്ന ഇത്തരം ആപ്പുകൾ ലൊക്കേഷൻ പരിശോധിക്കുന്നതിനായി ബിൽറ്റ്-ഇൻ ജി.പി.എസ് ചിപ്പുകളോ വൈഫൈയോ ഉപയോഗിക്കുന്നു. സോഷ്യൽ മീഡിയ ആപ്പുകൾ ഉൾപ്പെടെയുള്ളവ ഡാറ്റ ശേഖരണത്തിന്റെ ഭാഗമായി ലൊക്കേഷൻ ട്രാക്ക് ചെയ്യാറുണ്ട്.

പലരും ഫോൺ ഉപയോഗിക്കാത്തപ്പോൾ ഫ്ലൈറ്റ് മോഡ് (Airplane Mode) ആക്ടീവാക്കി ഇത് പരിഹരിക്കാമെന്ന് കരുതുന്നുണ്ടെങ്കിലും, ഫ്ലൈറ്റ് മോഡ് ഉപയോഗിച്ചാൽ പോലും പശ്ചാത്തലത്തിലെ ജി.പി.എസ് റിസീവർ ഓഫാകില്ല. സാറ്റലൈറ്റ് സിഗ്നലുകൾ ഉപയോഗിച്ച് ലൊക്കേഷൻ ഡാറ്റ പ്രോസസ്സ് ചെയ്യപ്പെടാം.

ഇതിനുള്ള ഏറ്റവും മികച്ച പരിഹാരം ആപ്പുകളുടെ ലൊക്കേഷൻ പെർമിഷനുകൾ പിൻവലിക്കുക എന്നതാണ്. ആപ്പ് മാനേജ്‌മെന്റ് സെറ്റിങ്സ് വഴിയോ പ്രൈവസി ഡാഷ്‌ബോർഡ് വഴിയോ ഇത് നിയന്ത്രിക്കാം.

പ്രൈവസി ഡാഷ്‌ബോർഡ് പരിശോധിക്കുന്നതിലൂടെ ഏത് ആപ്പാണ് അനുമതി ദുരുപയോഗം ചെയ്യുന്നതെന്ന് തിരിച്ചറിയാൻ സാധിക്കും. ആവശ്യമില്ലാത്ത ആപ്പുകളുടെ പശ്ചാത്തല ലൊക്കേഷൻ ആക്സസ് വിച്ഛേദിക്കുന്നത് വഴി സി.പി.യു വേക്ക് ലോക്കുകൾ തടയാൻ സാധിക്കും.

ജി.പി.എസ് ചിപ്പ്, ബ്ലൂടൂത്ത് സ്കാനർ, വൈഫൈ റേഡിയോ തുടങ്ങിയ ഹാർഡ്‌വെയർ ഘടകങ്ങളുടെ അമിത വൈദ്യുതി ഉപഭോഗം കുറയ്ക്കാൻ ഇത് സഹായിക്കും. വൈഫൈയോ മൊബൈൽ ഡാറ്റയോ ഉപയോഗിച്ച് നെറ്റ്‌വർക്ക് ഡാറ്റാ പ്രോസസ്സിങ് നടക്കുമ്പോൾ റേഡിയോ തരംഗങ്ങൾ അയക്കാനും സ്വീകരിക്കാനും കൂടുതൽ ഊർജം ആവശ്യമായി വരുന്നു.

ലൊക്കേഷൻ പെർമിഷനുകൾ കർശനമാക്കുന്നതിലൂടെ സി.പി.യുവും മറ്റ് റേഡിയോ സംവിധാനങ്ങളും അനാവശ്യമായി പ്രവർത്തിക്കുന്നത് ഒഴിവാക്കാനാകും. പെർമിഷൻ മാനേജർ വഴി ഇത് എളുപ്പത്തിൽ മാറ്റാം.

സാംസങ് ഉപകരണങ്ങളിൽ (One UI 8.5) Settings > Privacy or Security and privacy > More privacy settings > Permission manager എന്ന വിഭാഗത്തിലൂടെ ഇത് ചെയ്യാം. ഗൂഗിൾ പിക്സൽ (Android 16) ഫോണുകളിൽ Security & privacy > Privacy controls > Permission manager വഴി ലൊക്കേഷൻ പെർമിഷൻ നിയന്ത്രിക്കാവുന്നതാണ്.

അവശ്യമല്ലാത്ത ആപ്പുകളുടെ ലൊക്കേഷൻ ആക്സസ് ‘Not allowed’ ആയോ ‘Allowed only while in use’ ആയോ മാറ്റാം. ഈ ക്രമീകരണങ്ങൾ മാറ്റിയ ശേഷം ചില ആപ്പുകൾ കൃത്യമായ ലൊക്കേഷൻ വിവരങ്ങൾ നൽകാതെ വരാം.

അത്തരം സാഹചര്യങ്ങളിൽ ആപ്പ് മാനേജർ വഴി വീണ്ടും അനുമതി നൽകാവുന്നതാണ്. പുതിയ അപ്ഡേറ്റുകൾക്ക് ശേഷവും പുതിയ ഡിവൈസ് വാങ്ങുമ്പോഴും അഡാപ്റ്റിവ് ബാറ്ററി പാറ്റേൺ പഠിച്ചെടുക്കുന്നത് വരെ ബാറ്ററി ഉപഭോഗം സാധാരണയേക്കാൾ കൂടുതലായിരിക്കാം.

എങ്കിലും കൃത്യമായ ഇടവേളകളിൽ ബാറ്ററി സെറ്റിങ്സ് പരിശോധിക്കുന്നത് ഫോണിന്റെ ആയുസ്സ് വർദ്ധിപ്പിക്കാൻ സഹായിക്കും.