ദക്ഷിണേന്ത്യയിൽ മഴയുടെ സ്വഭാവത്തിൽ മാറ്റം; കേരളം ഉഷ്ണമേഖലാ മൺസൂൺ കാലാവസ്ഥാ മേഖലയിലേക്ക് വ്യാപിക്കുന്നുവെന്ന് പഠനം

തിരുവനന്തപുരം: രാജ്യത്ത് കാലാവസ്ഥാ വ്യതിയാനവുമായി ബന്ധപ്പെട്ട് നിർണായക കണ്ടെത്തലുമായി ശാസ്ത്രലോകം. 1951 മുതൽ 2020 വരെയുള്ള കാലയളവിൽ ദക്ഷിണേന്ത്യയിൽ മഴയുടെ അളവിൽ വർധനവുണ്ടായിട്ടുണ്ടെന്ന് പഠനങ്ങൾ വ്യക്തമാക്കുന്നു.

ഇതിന്റെ ഫലമായി കേരളം ഉൾപ്പെടെയുള്ള പടിഞ്ഞാറൻ തീരപ്രദേശങ്ങളിലേക്ക് രാജ്യത്തെ ഏറ്റവും കൂടുതൽ മഴ ലഭിക്കുന്ന ഉഷ്ണമേഖലാ മൺസൂൺ കാലാവസ്ഥാ മേഖല വ്യാപിച്ചതായി ഇന്ത്യൻ കാലാവസ്ഥാ വകുപ്പും (ഐഎംഡി) ഇന്ത്യൻ ഇൻസ്റ്റിറ്റ്യൂട്ട് ഓഫ് ട്രോപ്പിക്കൽ മീറ്റിയറോളജിയിലെയും ശാസ്ത്രജ്ഞർ നടത്തിയ പഠനത്തിൽ ചൂണ്ടിക്കാണിക്കുന്നു. തുടർച്ചയായ 30 വർഷത്തെ കാലയളവുകളിലെ താപനിലയും വർഷപാതവും സൂക്ഷ്മമായി വിശകലനം ചെയ്തുകൊണ്ടാണ് ഗവേഷകർ ഈ നിഗമനത്തിൽ എത്തിച്ചേർന്നത്.

കാലാവസ്ഥാ മേഖലകളിലെ ഇത്തരം മാറ്റങ്ങൾ കാർഷിക മേഖലയെയും വിളകൾ വിതയ്ക്കേണ്ട സമയക്രമങ്ങളെയും നേരിട്ട് ബാധിക്കുമെന്നതിനാൽ, ഭാവിയിലെ ദീർഘകാല കാർഷിക ആസൂത്രണങ്ങളിൽ ഈ ഘടകങ്ങൾ കർശനമായി പരിഗണിക്കേണ്ടതുണ്ടെന്നും പഠനം ഓർമിപ്പിക്കുന്നു.

ദീർഘകാലാടിസ്ഥാനത്തിൽ മഴയുടെ അളവ് പൊതുവെ വർധിച്ചിട്ടുണ്ടെങ്കിലും, എൽ നിനോ പ്രതിഭാസത്തിന്റെ ശക്തമായ സ്വാധീനം മൂലം കഴിഞ്ഞ മൺസൂൺ കാലത്ത് കേരളത്തിൽ തെക്കുപടിഞ്ഞാറൻ മഴയിൽ 28 ശതമാനത്തിന്റെ കുറവാണ് രേഖപ്പെടുത്തിയത്. സാധാരണയായി ജൂൺ മുതൽ സെപ്റ്റംബർ വരെയുള്ള മാസങ്ങളിൽ 2,018.6 മില്ലിമീറ്റർ മഴ ലഭിക്കേണ്ട

സ്ഥാനത്ത് ഇത്തവണ ലഭിച്ചത് 1,446.5 മില്ലിമീറ്റർ മഴ മാത്രമാണ്. 1901-നുശേഷം കേരളത്തിൽ രേഖപ്പെടുത്തിയ ഏറ്റവും കുറഞ്ഞ മഴ ലഭിച്ച ഏഴാമത്തെ തെക്കുപടിഞ്ഞാറൻ മൺസൂൺ കാലമാണിത്.

സംസ്ഥാനത്ത് വയനാട്ടിൽ 53 ശതമാനവും ഇടുക്കിയിൽ 47 ശതമാനവും മഴ കുറഞ്ഞപ്പോൾ, മറ്റ് ആറ് ജില്ലകളിൽ മാത്രമാണ് മഴ സാധാരണ പരിധിക്കുള്ളിൽ നിന്നത്. ദീർഘകാല മഴയുടെ പൊതുവായ പ്രവണതകൾക്കൊപ്പം തന്നെ ഓരോ മൺസൂൺ സീസണിലുമുണ്ടാകുന്ന വ്യതിയാനങ്ങളും ഒരുപോലെ ഗൗരവത്തോടെ കാണേണ്ടതുണ്ടെന്ന് പഠനം വ്യക്തമാക്കുന്നു.

കാലാവസ്ഥാ മേഖലകളിലെ ഈ മാറ്റങ്ങൾ ജലവിഭവ പരിപാലനത്തെയും കാർഷിക മേഖലയുടെ ഭാവി ആസൂത്രണത്തെയും ഒരുപോലെ സ്വാധീനിക്കുമെന്ന് പഠനത്തിന് നേതൃത്വം നൽകിയ ഐഎംഡി ശാസ്ത്രജ്ഞൻ അനന്യ കർമാകറും ഐഎംഡി ഡയറക്ടർ ജനറൽ ഓഫ് മീറ്റിയറോളജി മൃത്യുഞ്ജയ് മൊഹപാത്രയും വ്യക്തമാക്കി. അതിനാൽ ദീർഘകാല കാലാവസ്ഥാ പ്രവണതകൾക്കും ഓരോ സീസണിലെയും മഴയുടെ ഏറ്റക്കുറച്ചിലുകൾക്കും ഒരുപോലെ പ്രാധാന്യം നൽകി മുന്നോട്ടുപോകണമെന്ന് ഇരുവരും അഭിപ്രായപ്പെട്ടു.