ആൻഡ്രോയിഡ് ഓട്ടോയിൽ പുതിയ സാങ്കേതിക തകരാർ; ട്രാഫിക് ഓവർലേ പ്രവർത്തനം നിലച്ചതായി പരാതി

ആൻഡ്രോയിഡ് ഓട്ടോ (Android Auto) ഉപയോക്താക്കൾക്ക് വീണ്ടും തിരിച്ചടി. ആപ്പ് സംവിധാനത്തിൽ പുതിയ സാങ്കേതിക തകരാർ റിപ്പോർട്ട് ചെയ്തിരിക്കുകയാണ്.

റോഡിലെ ഗതാഗതക്കുരുക്കുകൾ തത്സമയം തിരിച്ചറിയാൻ സഹായിക്കുന്ന ട്രാഫിക് ഓവർലേ (Traffic Overlay) സംവിധാനമാണ് നിലവിൽ പ്രവർത്തനം നിലച്ച നിലയിലുള്ളത്. ഇതുമൂലം യാത്രക്കാർക്ക് റോഡിലെ തടസ്സങ്ങൾ മുൻകൂട്ടി കണ്ട് യാത്രകൾ ക്രമീകരിക്കാൻ കഴിയാത്ത അവസ്ഥയാണ് സംജാതമായിരിക്കുന്നത്.

പച്ച, മഞ്ഞ, ഓറഞ്ച്, ചുവപ്പ് എന്നീ നിറങ്ങളിലുള്ള വരകളിലൂടെയാണ് ഇതുവരെ മുന്നിലുള്ള റോഡിന്റെ അവസ്ഥ ഉപയോക്താക്കൾക്ക് മനസ്സിലാക്കാൻ സാധിച്ചിരുന്നത്. പച്ച നിറം സാധാരണ ഗതാഗതത്തെയും, മഞ്ഞ, ഓറഞ്ച്, ചുവപ്പ് നിറങ്ങൾ ക്രമേണ വർധിച്ചുവരുന്ന ഗതാഗതക്കുരുക്കിനെയും സൂചിപ്പിച്ചിരുന്നു.

ഗൂഗിൾ മാപ്‌സിന്റെ ഔദ്യോഗിക നിർദ്ദേശങ്ങൾ ലഭിക്കുന്നതിന് മുൻപ് തന്നെ ഈ വർണ്ണ സൂചകങ്ങൾ ഉപയോഗിച്ച് യാത്രക്കാർക്ക് ബദൽ മാർഗ്ഗങ്ങൾ തിരഞ്ഞെടുക്കാൻ സാധിച്ചിരുന്നു. എന്നാൽ നിലവിൽ ഈ സംവിധാനം ലഭ്യമല്ലാത്തത് ഡ്രൈവർമാരെ വലിയ രീതിയിൽ പ്രതികൂലമായി ബാധിച്ചിട്ടുണ്ട്.

റെഡ്ഡിറ്റ് (Reddit) ഉൾപ്പെടെയുള്ള ഓൺലൈൻ കമ്മ്യൂണിറ്റി പ്ലാറ്റ്‌ഫോമുകളിലൂടെയാണ് ഉപയോക്താക്കൾ ഈ പുതിയ പ്രശ്നം പുറംലോകത്തെ അറിയിച്ചത്. സമീപകാലത്ത് അവതരിപ്പിച്ച ഇമ്മേഴ്‌സീവ് നാവിഗേഷൻ (Immersive Navigation) ഫീച്ചറുമായി ഈ തകരാറിന് ബന്ധമുണ്ടെന്ന് സംശയങ്ങൾ ഉയരുന്നുണ്ടെങ്കിലും ഇക്കാര്യത്തിൽ ഔദ്യോഗിക സ്ഥിരീകരണമില്ല.

ചില ഉപയോക്താക്കൾ പഴയ പതിപ്പുകളിലേക്ക് മാറിയപ്പോൾ ഈ ഫീച്ചർ തിരികെ ലഭിച്ചതായി റിപ്പോർട്ട് ചെയ്തിട്ടുണ്ട്. എങ്കിലും ആൻഡ്രോയിഡ് ഓട്ടോയുടെയും ഗൂഗിൾ മാപ്‌സിന്റെയും ഏറ്റവും പുതിയ അപ്‌ഡേറ്റുകൾക്കൊന്നും തന്നെ ഈ പ്രശ്നം പരിഹരിക്കാൻ സാധിച്ചിട്ടില്ല.

എല്ലാ ഉപയോക്താക്കളെയും ഈ തകരാർ ബാധിച്ചിട്ടില്ലെങ്കിലും വലിയൊരു വിഭാഗം ആളുകൾ പ്രതിസന്ധിയിലാണ്. ഗൂഗിൾ (Google) ഈ തകരാർ ഔദ്യോഗികമായി അംഗീകരിച്ച് പരിഹാരം കാണുന്നതുവരെ ഉപയോക്താക്കൾക്ക് കാത്തിരിക്കേണ്ടി വരുമെന്നാണ് നിലവിലെ വിലയിരുത്തൽ.