ലോകകപ്പ് ഫുട്ബോൾ ചരിത്രത്തിലെ എക്കാലത്തെയും മികച്ച ഗോൾവേട്ടക്കാരൻ എന്ന നേട്ടം സ്വന്തമാക്കിയതിന് പിന്നാലെ, മത്സരത്തിനിടെ തനിക്ക് സംഭവിച്ച പെനാൽറ്റി പിഴവിൽ കടുത്ത അതൃപ്തി പ്രകടിപ്പിച്ച് അർജന്റീന നായകൻ ലിയോണൽ മെസി. ടെക്സസിൽ നടന്ന മത്സരത്തിൽ ഓസ്ട്രിയയെ എതിരില്ലാത്ത രണ്ട് ഗോളുകൾക്ക് തകർത്ത് അർജന്റീന നോക്കൗട്ട് ഘട്ടത്തിലേക്ക് പ്രവേശിച്ചു.
മത്സരത്തിന്റെ 38-ാം മിനിറ്റിൽ വലകുലുക്കിയതോടെ ലോകകപ്പിൽ തന്റെ 17-ാം ഗോൾ തികച്ച മെസി ടൂർണമെന്റ് ചരിത്രത്തിലെ ഏറ്റവും ഉയർന്ന ഗോൾവേട്ടക്കാരനായി മാറി. തുടർന്ന് രണ്ടാം പകുതിയുടെ ഇഞ്ചുറി ടൈമിൽ തന്റെ 18-ാം ലോകകപ്പ് ഗോളും നേടി അദ്ദേഹം അർജന്റീനയുടെ വിജയം സുനിശ്ചിതമാക്കി.
എന്നാൽ, ഗോൾരഹിതമായ തുടക്കത്തിൽ ലഭിച്ച പെനാൽറ്റി കിക്ക് ഗോളാക്കി മാറ്റാൻ സാധിക്കാത്തത് താരത്തെ നിരാശനാക്കി. തന്റെ പെനാൽറ്റി പിഴവിനെക്കുറിച്ച് മത്സരശേഷം മെസി പ്രതികരിച്ചത് ഇങ്ങനെയാണ്: “പെനാൽറ്റി നഷ്ടപ്പെടുത്തിയ ആ നിമിഷത്തിൽ എനിക്ക് എന്നോട് തന്നെ കടുത്ത ദേഷ്യമാണ് തോന്നിയത്.
കാരണം ഞാൻ ആ കിക്ക് എടുത്തത് വളരെ മോശം രീതിയിലായിരുന്നു. എന്നാൽ ഭാഗ്യവശാൽ കളിയിലേക്ക് വേഗത്തിൽ തിരിച്ചുവരാനും ലീഡ് നിലനിർത്താനും ഞങ്ങൾക്ക് സാധിച്ചു.
വളരെ നിർണായകമായ മൂന്ന് പോയിന്റുകളാണ് ഇന്ന് സ്വന്തമാക്കിയത്.” നേരത്തെ 2018 ലോകകപ്പിലും, 2022 ലോകകപ്പിൽ പോളണ്ടിനെതിരെയുള്ള ഗ്രൂപ്പ് ഘട്ട മത്സരത്തിലും മെസിക്ക് പെനാൽറ്റി ലക്ഷ്യത്തിലെത്തിക്കാൻ സാധിച്ചിരുന്നില്ല.
ബുധനാഴ്ച 39-ാം ജന്മദിനം ആഘോഷിക്കാനിരിക്കുന്ന താരം, ഹാംസ്ട്രിങ് പരിക്കിന്റെ ചെറിയ ആശങ്കകൾക്കിടയിലും മിന്നും ഫോമിലാണ്. ഗ്രൂപ്പ് ജെ-യിൽ നിന്ന് യോഗ്യത നേടിയ അർജന്റീന ശനിയാഴ്ച ജോർദാനെതിരെയാണ് അടുത്ത മത്സരത്തിനിറങ്ങുന്നത്.
അവസാന മത്സരവും വിജയിച്ച് ഗ്രൂപ്പ് ചാമ്പ്യന്മാരായി മുന്നേറാനാണ് ടീമിന്റെ ലക്ഷ്യമെന്ന് മെസി വ്യക്തമാക്കി. അതേസമയം, ജോർദാനെതിരായ മത്സരത്തിൽ മെസിക്ക് പരിശീലകൻ ലയണൽ സ്കലോണി വിശ്രമം അനുവദിച്ചേക്കുമെന്നും സൂചനകളുണ്ട്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
