ഐപിഎൽ സീസണിലെ ദയനീയ പ്രകടനം: ആരാധകരോട് ക്ഷമ ചോദിച്ച് ലഖ്‌നൗ സൂപ്പർ ജയന്റ്‌സ് ക്യാപ്റ്റൻ റിഷഭ് പന്ത്

ഐപിഎൽ സീസണിലെ തങ്ങളുടെ അവസാന മത്സരത്തിന് മുന്നോടിയായി ആരാധകരോട് പരസ്യമായി ക്ഷമ ചോദിച്ച് ലഖ്‌നൗ സൂപ്പർ ജയന്റ്‌സ് ക്യാപ്റ്റൻ റിഷഭ് പന്ത്. ഈ സീസണിൽ കളിച്ച 13 മത്സരങ്ങളിൽ നിന്ന് വെറും നാല് വിജയങ്ങൾ മാത്രം സ്വന്തമാക്കിയ ലഖ്‌നൗ, പോയിന്റ് പട്ടികയിൽ അവസാന സ്ഥാനത്താണ്.

ഞായറാഴ്ച ഏകാന സ്റ്റേഡിയത്തിൽ പഞ്ചാബ് കിങ്‌സുമായുള്ള മത്സരത്തിന്റെ ടോസ് വേളയിലാണ് ക്യാപ്റ്റൻ തന്റെ നിരാശയും ഖേദവും പങ്കുവെച്ചത്. ടീമിനും ആരാധകർക്കും ഒരുപോലെ കടുപ്പമേറിയതായിരുന്നു ഈ സീസണമെന്ന് റിഷഭ് പന്ത് സമ്മതിച്ചു.

ഉത്തർപ്രദേശിന്റെ വിവിധ ഭാഗങ്ങളിൽ നിന്ന് വലിയ തോതിൽ പിന്തുണ നൽകിയ ആരാധകർക്ക് നന്ദി അറിയിച്ച താരം, അടുത്ത സീസണിൽ ശക്തമായി തിരിച്ചുവരുമെന്ന് ഉറപ്പുനൽകി. പന്ത് പറഞ്ഞ വാക്കുകൾ ഇപ്രകാരമാണ്: ”ഞങ്ങളെ സംബന്ധിച്ചിടത്തോളം ഇതൊരു പ്രയാസകരമായ സീസണായിരുന്നുവെന്ന് എല്ലാവർക്കും അറിയാം.

ടീം എന്ന നിലയിലും വ്യക്തിഗതമായും ഒരുപാട് കാര്യങ്ങൾ പഠിക്കാൻ ഈ സീസൺ സഹായിച്ചു. ഞങ്ങളുടെ ആരാധകരോട് ക്ഷമ ചോദിക്കുന്നു.

ഉത്തർ പ്രദേശിന്റെ വിവിധ ഭാഗങ്ങളിൽ നിന്ന് വലിയ തോതിലാണ് അവർ ഞങ്ങളെ പിന്തുണയ്ക്കാൻ എത്തിയത്. ഞങ്ങൾ ശക്തമായി തിരിച്ചുവരും, അതിനായി 100 ശതമാനവും പരിശ്രമിക്കും.” അർജുൻ ടെണ്ടുൽക്കറുടെ അരങ്ങേറ്റം
സീസണിലെ അവസാന മത്സരത്തിൽ നിർണ്ണായക മാറ്റങ്ങളുമായാണ് ലഖ്‌നൗ ഇറങ്ങിയത്.

ക്രിക്കറ്റ് ഇതിഹാസം സച്ചിൻ ടെണ്ടുൽക്കറുടെ മകൻ അർജുൻ ടെണ്ടുൽക്കറുടെ അരങ്ങേറ്റമാണ് ഇതിൽ ശ്രദ്ധേയമായത്. 2026 സീസണിന് മുന്നോടിയായി മുംബൈ ഇന്ത്യൻസിൽ നിന്ന് 30 ലക്ഷം രൂപയ്ക്കാണ് അർജുൻ ലഖ്‌നൗ ടീമിലെത്തിയത്.

13 മത്സരങ്ങളിൽ ബെഞ്ചിലിരുന്ന ശേഷമാണ് താരത്തിന് അവസരം ലഭിച്ചത്. പ്ലേഓഫ് റേസിൽ നിന്ന് ലഖ്‌നൗ നേരത്തെ പുറത്തായ സാഹചര്യത്തിൽ, മായങ്ക് യാദവിന് പകരക്കാരനായാണ് ഇടംകയ്യൻ പേസറായ അർജുൻ ടീമിലിടം പിടിച്ചത്.

പാളിയ തന്ത്രങ്ങളും ക്യാപ്റ്റന്റെ വിമർശനവും
ഈ സീസണിൽ ടീം വലിയ ആശയക്കുഴപ്പങ്ങളിലൂടെയാണ് കടന്നുപോയത്. ടീമിനുള്ളിൽ തീരുമാനങ്ങൾ എടുക്കുന്നതിൽ അമിതമായ ഇടപെടലുകൾ നടക്കുന്നുണ്ടെന്ന സൂചന റിഷഭ് പന്ത് പലപ്പോഴും നൽകിയിരുന്നു.

മിച്ചൽ മാർഷ്, എയ്ഡൻ മർക്രം എന്നിവരടങ്ങുന്ന മികച്ച ഓപ്പണിംഗ് ജോഡിയെ മാറ്റിയതും, പന്തിന് കൃത്യമായ ബാറ്റിംഗ് പൊസിഷൻ നൽകാത്തതും ടീമിന്റെ ബാലൻസിനെ ബാധിച്ചു. ക്യാപ്റ്റൻ എന്ന നിലയിൽ റിഷഭ് പന്തും കടുത്ത വിമർശനങ്ങൾ നേരിട്ടു.

സ്പിന്നർമാരെ ഉപയോഗിക്കുന്നതിൽ വരുത്തിയ പിഴവുകളും കൃത്യമല്ലാത്ത ബൗളിംഗ് മാറ്റങ്ങളും ലഖ്‌നൗവിന് പല മത്സരങ്ങളും നഷ്ടപ്പെടാൻ കാരണമായി.