മാനന്തവാടി ജില്ലാ ആശുപത്രിയെ ഗവ. മെഡിക്കൽ കോളജായി ഉയർത്തി പ്രവർത്തനം ആരംഭിച്ചതിന് പിന്നാലെ, സ്ഥാപനം മടക്കിമലയിലേക്ക് മാറ്റണമെന്ന ആവശ്യം ഉയരുന്നത് ജില്ലയിൽ വലിയ പ്രതിഷേധങ്ങൾക്ക് വഴിവെച്ചിരിക്കുകയാണ്.
നിലവിൽ മാനന്തവാടിയിൽ തന്നെ മെഡിക്കൽ കോളേജ് തുടരണമെന്ന ആവശ്യവുമായി വിവിധ കോണുകളിൽ നിന്ന് ശക്തമായ പ്രതികരണങ്ങളാണ് ഉയർന്നുവരുന്നത്. മെഡിക്കൽ കോളജിനായി നേരത്തെ അമ്പുകുത്തിയിൽ വനംവകുപ്പിന്റെ ഉടമസ്ഥതയിലുള്ള 28 ഏക്കർ ഭൂമി കണ്ടെത്തിയിരുന്നു.
ഇതിനായി വനംവകുപ്പ് മരങ്ങളുടെ കണക്കെടുപ്പും പൂർത്തിയാക്കിയിരുന്നു. ബത്തേരി താലൂക്കിലെ നൂൽപുഴ വില്ലേജിൽ പരിഹാര വനവൽക്കരണത്തിനായി ഭൂമി കൈമാറാൻ സർക്കാർ ഉത്തരവിട്ടിരുന്നു.
എന്നാൽ, വനംവകുപ്പിന്റെ ഭൂമി ആരോഗ്യ വകുപ്പിന് ലഭിക്കണമെങ്കിൽ പകരം ഇരട്ടി ഭൂമിയും മരങ്ങളുടെ മൂല്യത്തിന്റെ 3 ഇരട്ടി തുകയും കൈമാറേണ്ടതുണ്ട്. ഈ നടപടിക്രമങ്ങളിലുള്ള കാലതാമസമാണ് ഇപ്പോഴത്തെ അനിശ്ചിതത്വത്തിന് കാരണം.
വനംവകുപ്പിന്റെ ഭൂമി ലഭിക്കുന്നതിൽ തടസ്സം നേരിട്ടാൽ മാനന്തവാടി നഗരപരിസരത്തു തന്നെ സ്വകാര്യ ഭൂമി കണ്ടെത്തി മെഡിക്കൽ കോളജ് സ്ഥാപിക്കുമെന്ന് ബന്ധപ്പെട്ടവർ വ്യക്തമാക്കിയിട്ടുണ്ട്. മെഡിക്കൽ കോളജ് മാനന്തവാടിയിൽ നിന്ന് മാറ്റേണ്ടതില്ലെന്ന കാര്യത്തിൽ തദ്ദേശ ഭരണകൂടവും യുഡിഎഫ് നേതൃത്വവും ഒരേ അഭിപ്രായമാണ് പങ്കുവെക്കുന്നത്.
ഇക്കാര്യം എംഎൽഎ ഉഷ വിജയൻ മുഖ്യമന്ത്രിയുമായുള്ള കൂടിക്കാഴ്ചയിൽ ഉന്നയിച്ചിട്ടുണ്ട്. ഈ വിഷയത്തിൽ പ്രതികരിച്ചുകൊണ്ട് ജില്ലാ കോൺഗ്രസ് കമ്മിറ്റി ജനറൽ സെക്രട്ടറിയും മാനന്തവാടി നഗരസഭ സ്ഥിരസമിതി അധ്യക്ഷനുമായ പി.വി.ജോർജ് പറഞ്ഞത് ഇങ്ങനെ: “മാനന്തവാടിയിൽ പ്രവർത്തിക്കുന്ന വയനാട് ഗവ.
മെഡിക്കൽ കോളജ് മടക്കിമലയിലേക്കു മാറ്റി സ്ഥാപിക്കണമെന്ന് ആവശ്യപ്പെടുന്ന പ്രവർത്തനങ്ങൾ അവസാനിപ്പിക്കണം.” പേരാവൂർ, കൊട്ടിയൂർ തുടങ്ങിയ കേരളത്തിലെ പ്രദേശങ്ങൾക്കു പുറമെ കർണാടകയിലെ കുടക്, ബൈരക്കുപ്പ തുടങ്ങിയ സ്ഥലങ്ങളിൽ നിന്നുള്ളവരും ചികിത്സയ്ക്കായി മാനന്തവാടി മെഡിക്കൽ കോളജിനെയാണ് ആശ്രയിക്കുന്നത്. അതിനാൽ, വിവാദങ്ങൾ അവസാനിപ്പിച്ച് മെഡിക്കൽ കോളജിന്റെ വികസന പ്രവർത്തനങ്ങൾക്കാണ് മുൻഗണന നൽകേണ്ടതെന്ന് അദ്ദേഹം വ്യക്തമാക്കി.
മുഖ്യമന്ത്രിയുടെ ഉറപ്പും ആരോഗ്യ വകുപ്പിന്റെ പിന്തുണയും ഉണ്ടെന്നും കൃത്യമായ പദ്ധതി സമർപ്പിച്ച് മെഡിക്കൽ കോളജിന്റെ വികസനം ഉറപ്പാക്കുമെന്നും പി.വി.ജോർജ് കൂട്ടിച്ചേർത്തു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
