ഓപ്പോ റെനോ 16 സ്മാർട്ട്‌ഫോൺ പരമ്പര പുറത്തിറങ്ങുന്നു: സവിശേഷതകൾ പ്രഖ്യാപിച്ച് കമ്പനി

ചൈനയിൽ അടുത്ത ആഴ്‌ച അരങ്ങേറുന്ന ഓപ്പോയുടെ പുതിയ സ്മാർട്ട്‌ഫോൺ പരമ്പരയായ ‘ഓപ്പോ റെനോ 16’ സംബന്ധിച്ച നിർണായക വിവരങ്ങൾ കമ്പനി പുറത്തുവിട്ടു. അത്യാധുനിക ക്യാമറ സംവിധാനങ്ങളോടെ എത്തുന്ന ഈ സീരീസിൽ റെനോ 16, റെനോ 16 പ്രോ എന്നീ മോഡലുകൾ 200-മെഗാപിക്‌സൽ പ്രധാന ക്യാമറയുമായാണ് വിപണിയിലെത്തുക എന്നതാണ് പ്രധാന പ്രത്യേകത.

ചൈനീസ് സോഷ്യൽ മീഡിയ പ്ലാറ്റ്‌ഫോമായ വെയിബോ വഴി കമ്പനി പങ്കുവെച്ച വിവരങ്ങൾ പ്രകാരം, ഫോണുകളുടെ പിൻഭാഗത്ത് ട്രിപ്പിൾ ക്യാമറ സജ്ജീകരണമാണുള്ളത്. 200-മെഗാപിക്‌സൽ പ്രൈമറി സെൻസറിന് പുറമെ 50എംപി അൾട്രാവൈഡ് ക്യാമറയും, 50-മെഗാപിക്‌സൽ പെരിസ്കോപ്പ് ടെലിഫോട്ടോ ലെൻസും ഇതിൽ ഉൾപ്പെടുന്നു.

മെഗാപിക്‌സലിൽ സമാനതകൾ ഉണ്ടെങ്കിലും, റെനോ 16, റെനോ 16 പ്രോ മോഡലുകളുടെ ക്യാമറ ഹാർഡ്‌വെയറിൽ പ്രകടമായ വ്യത്യാസങ്ങൾ പ്രതീക്ഷിക്കാം. ഇന്ത്യൻ വിപണിയിലേക്കുള്ള കടന്നുവരവിനെ സംബന്ധിച്ച സൂചനകളും ഇപ്പോൾ ലഭ്യമാണ്.

ചൈനീസ് ലോഞ്ചിന് ഏകദേശം ഒരു മാസത്തിന് ശേഷം, ജൂലൈ മാസത്തോടെ റെനോ 16 സീരീസ് ഇന്ത്യയിൽ അവതരിപ്പിക്കുമെന്നാണ് റിപ്പോർട്ടുകൾ. റെനോ 16, റെനോ 16 പ്രോ, റെനോ 16 പ്രോ മിനി, റെനോ 16 സി എന്നീ നാല് മോഡലുകൾ ഇന്ത്യൻ വിപണിയിൽ പ്രതീക്ഷിക്കുന്നു.

ഡിസൈനിന് മുൻഗണന നൽകുന്ന സീരീസ് ഗാലക്‌സി പർപ്പിൾ, ഹാർട്ട്ബീറ്റ്, മൂൺലൈറ്റ് ഈസ് ഡാർക്ക് എന്നീ വർണങ്ങളിൽ ലഭ്യമാകും. 12 ജിബി റാം + 256 ജിബി സ്റ്റോറേജ് മുതൽ 16 ജിബി റാം + 1 ടിബി സ്റ്റോറേജ് വരെയുള്ള വിവിധ വേരിയന്റുകളിൽ ഉപയോക്താക്കൾക്ക് ഫോൺ തിരഞ്ഞെടുക്കാം.

മെയ് 25-ന് ചൈനീസ് സമയം വൈകിട്ട് 6 മണിക്ക് (ഇന്ത്യൻ സമയം വൈകിട്ട് 3.30-ന്) നടക്കുന്ന ചടങ്ങിലാണ് ഔദ്യോഗിക ലോഞ്ച്. സ്മാർട്ട്‌ഫോണുകൾക്കൊപ്പം ഓപ്പോ പാഡ് 6 ടാബ്‍ലെറ്റും, ഓപ്പോ എൻകോ എയർ 5s TWS-ഉം ചടങ്ങിൽ അവതരിപ്പിക്കും.

നിലവിൽ ചൈനയിൽ ഫോണുകൾക്കായുള്ള പ്രീ-റിസർവേഷൻ ആരംഭിച്ചിട്ടുണ്ട്.