സംസ്ഥാനത്ത് സ്പാകൾ ആരംഭിക്കുന്നതിനുള്ള കൃത്യമായ മാനദണ്ഡങ്ങൾ ഇല്ലാത്തത് നിയമലംഘനങ്ങൾക്കും കുറ്റവാളികൾക്കും പഴുതാകുന്നുവെന്ന് റിപ്പോർട്ട്. ഈ അവ്യക്തത മുതലാക്കിയാണ് മതിയായ രേഖകളില്ലാതെ പലയിടത്തും സ്പാകൾ പ്രവർത്തിക്കുന്നത്.
സാധാരണ വാണിജ്യസ്ഥാപനത്തിനുള്ള ലൈസൻസ് നടപടിക്രമങ്ങൾ മാത്രമാണ് നിലവിൽ സ്പായ്ക്കും ആവശ്യമുള്ളത്. സ്പാ എന്ന കാറ്റഗറിയിൽ ഉൾപ്പെടുത്തി ലൈസൻസ് നൽകും എന്ന് മാത്രം.
ഇത്തരം സ്ഥാപനങ്ങൾ ആരംഭിക്കാൻ ആയുർവേദ ഡോക്ടർ, അംഗീകൃത സ്ഥാപനത്തിൽനിന്നു പഠനം പൂർത്തിയാക്കിയ തെറപ്പിസ്റ്റ്, ഹെൽത്ത് കാർഡുള്ള ജീവനക്കാർ എന്നിവർ വേണമെന്നു നിഷ്കർഷിക്കുന്നുണ്ടെങ്കിലും പലരും ഇത് പാലിക്കാറില്ല. തദ്ദേശസ്ഥാപന സെക്രട്ടറിക്കുവേണ്ടി സീനിയർ ഹെൽത്ത് ഇൻസ്പെക്ടർ നേരിട്ടു പരിശോധിച്ചാണ് ലൈസൻസ് നൽകേണ്ടത്.
എന്നാൽ, കെ സ്മാർട്ട് വഴി ലഭിക്കുന്ന അപേക്ഷകൾ ഉടനടി പരിശോധിച്ച് അനുമതി നൽകണമെന്നും കാലതാമസം വരുത്തരുതെന്നുമുള്ള നിർദേശമുള്ളതിനാൽ, ലഭിക്കുന്ന രേഖകളുടെ മാത്രം അടിസ്ഥാനത്തിൽ ലൈസൻസ് നൽകുന്ന രീതിയാണ് നിലവിലുള്ളത്. ലൈസൻസിന് മറുവഴി സ്പാ ലൈസൻസിനുള്ള അപേക്ഷ, ആവശ്യമായ രേഖകൾ ഇല്ലെന്ന കാരണത്താൽ തദ്ദേശസ്ഥാപനം നിരസിച്ചാൽ, പകരം കെ സ്വിഫ്റ്റ് വഴി ചെറുകിട
സംരംഭക ലൈസൻസ് തരപ്പെടുത്തുന്ന രീതിയുണ്ട്. ഇത്തരം ലൈസൻസ് ഉപയോഗിച്ച് മൂന്ന് വർഷംവരെ സ്ഥാപനം നടത്താം.
അടിസ്ഥാനസൗകര്യങ്ങൾ വികസിപ്പിക്കാനുള്ള ഈ സാവകാശ കാലയളവിൽ സ്പായിൽ പരിശോധന നടത്താൻ തദ്ദേശസ്ഥാപനங்களுக்கும் പരിമിതികളുണ്ട്. കെട്ടിടത്തിന്റെ പേരിൽ ലഭിക്കുന്ന ഈ ലൈസൻസ് ഉപയോഗിച്ച് സ്പാ ആരംഭിക്കുമ്പോൾ, സ്ഥാപനം യഥാർത്ഥത്തിൽ കെട്ടിടഉടമയുടെ പേരിലായാണ് കണക്കാക്കപ്പെടുക.
ഇതുമൂലം സ്പാ ആരംഭിക്കുന്ന യഥാർത്ഥ നടത്തിപ്പുകാർക്ക് നിയമപ്രശ്നങ്ങളിൽനിന്നു എളുപ്പത്തിൽ രക്ഷപ്പെടാൻ സാധിക്കുന്നു. വിദേശ തൊഴിലാളികളുടെ സാന്നിധ്യം സാധാരണ സ്പാകൾ ആയി പ്രവർത്തിക്കുന്ന വെൽനെസ് സെന്ററുകളിൽ ജോലിചെയ്യുന്നവരുടെ യഥാർത്ഥ വിവരങ്ങളോ തൊഴിൽപരിചയമോ തദ്ദേശസ്ഥാപനങ്ങൾക്ക് അറിയാൻ സാധിക്കാറില്ലെന്ന് അധികൃതർ വ്യക്തമാക്കുന്നു.
പൊലീസ് ക്ലിയറൻസും പരിശോധനയും പേരിനു മാത്രമായി ഒതുങ്ങുന്നതിനാലാണ്, യാതൊരുവിധ ഔദ്യോഗിക രേഖകളുമില്ലാതെ ബംഗ്ലദേശ്, ശ്രീലങ്ക എന്നിവിടങ്ങളിൽനിന്നുള്ള സ്ത്രീകൾ പോലും സ്പാകളിൽ ജോലിക്കായി എത്തുന്നത്. ഷോപ്സ് ആൻഡ് എസ്റ്റാബ്ലിഷ്മെന്റ്സ് ആക്ടിലെ വ്യവസ്ഥകൾ കൂടുതൽ കർശനമാക്കുന്നതും പുതിയ നിയമനിർമാണം നടത്തുന്നതും സർക്കാർ ഗൗരവമായി ആലോചിക്കുന്നുണ്ട്.
‘ഓപ്പറേഷൻ സ്പാ’യുടെ ഭാഗമായി ചട്ടങ്ങൾ പാലിക്കാത്തതായി കണ്ടെത്തിയ 44 സ്ഥാപനങ്ങൾക്കു ഇതിനോടകം നോട്ടിസ് നൽകിയിട്ടുണ്ട്. ലൈസൻസില്ലാതെ പ്രവർത്തിക്കുന്നതും അനധികൃത പ്രവർത്തനങ്ങളിൽ ഏർപ്പെടുന്നതുമായ സ്പാകൾ ഉടൻ പൂട്ടണമെന്നും ഇല്ലെങ്കിൽ ശക്തമായ നിയമനടപടികൾ ഉണ്ടാകുമെന്നും മന്ത്രി രമേശ് ചെന്നിത്തല മുന്നറിയിപ്പ് നൽകി.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
