ലോകത്തിലെ ഏറ്റവും വലിയ ദ്വീപായ ഗ്രീൻലാൻഡിന്റെ സുരക്ഷാകാര്യങ്ങളിൽ സ്ഥിരമായ നിയന്ത്രണം ഉറപ്പാക്കുന്ന ചരിത്രപരമായ കരാറിൽ എത്തിച്ചേർന്നതായി യുഎസ് പ്രസിഡന്റ് ഡൊണാൾഡ് ട്രംപ് വ്യക്തമാക്കി. ന്യൂയോർക്കിൽ അടുത്തയാഴ്ച ആരംഭിക്കുന്ന ജനറൽ അസംബ്ലി സമ്മേളനത്തോടനുബന്ധിച്ച് ഡെന്മാർക്കുമായും ഗ്രീൻലാൻഡുമായും ഈ സുപ്രധാന കരാറിൽ ഔദ്യോഗികമായി ഒപ്പുവെക്കുമെന്ന് അദ്ദേഹം അറിയിച്ചു.
“ഗ്രീൻലാൻഡിന്റെ സുരക്ഷയിലും മറ്റു ആവശ്യങ്ങളിലും അമേരിക്കയ്ക്ക് സ്ഥിരനിയന്ത്രണം നൽകുന്ന കരാറിലെത്തിയിരിക്കുന്നു എന്ന് പ്രഖ്യാപിക്കുന്നതിൽ സന്തോഷമുണ്ട്. ഇനിമുതൽ അമേരിക്കയുടെ രേഖാമൂലമുള്ള അനുമതിയില്ലാതെ അമേരിക്കയുടെ എതിരാളികൾക്ക് ഗ്രീൻലാൻഡിൽ സൈനികതാവളം സ്ഥാപിക്കാനോ സൈനിക സാന്നിധ്യം ഉറപ്പാക്കാനോ നിക്ഷേപങ്ങൾ നടത്താനോ സാധിക്കില്ല.
ഇത് അനന്തമായ കാലത്തേക്കുള്ള കരാറാണ്. ഇതിന് അവസാനമില്ല,” എന്ന് ഡൊണാൾഡ് ട്രംപ് തന്റെ ഔദ്യോഗിക സാമൂഹികമാധ്യമമായ ട്രൂത്ത് സോഷ്യലിൽ കുറിച്ചു.
കൂടാതെ, ദ്വീപിൽ വൻതോതിൽ സൈനിക സാന്നിധ്യം വ്യാപിപ്പിക്കുന്നതിനുള്ള നടപടികൾ അമേരിക്ക ഉടൻ തന്നെ ആരംഭിക്കുമെന്നും അദ്ദേഹം വ്യക്തമാക്കിയിട്ടുണ്ട്. ചൈനയും റഷ്യയും ഗ്രീൻലാൻഡിൽ സൈനിക താവളങ്ങൾ നിർമിക്കുന്നത് പ്രതിരോധിക്കുക എന്നതാണ് ഈ കരാറിന്റെ പ്രധാന ലക്ഷ്യങ്ങളിലൊന്ന് എന്ന് യുഎസ് സ്റ്റേറ്റ് ഡിപ്പാർട്ട്മെന്റും സ്ഥിരീകരിച്ചിട്ടുണ്ട്.
ഇതുകൂടാതെ, ഗ്രീൻലാൻഡിലെ തന്ത്രപ്രധാനമായ മേഖലകളിൽ ഈ രാജ്യങ്ങളുടെ നിക്ഷേപങ്ങൾ പൂർണ്ണമായി തടയുന്നതിനുള്ള കർശനമായ സംവിധാനങ്ങളും കരാറിൽ ഉൾപ്പെടുത്തിയിട്ടുണ്ടെന്ന് അധികൃതർ വ്യക്തമാക്കി. അമേരിക്കയുമായി ഒപ്പുവെക്കുന്ന ഈ പുതിയ കരാറിനെ ഡെന്മാർക്ക് പ്രധാനമന്ത്രി മെറ്റെ ഫ്രെഡെറിക്സൺ സ്വാഗതം ചെയ്തു.
ഡെന്മാർക്കിനും ഗ്രീൻലാൻഡിനും അമേരിക്കയ്ക്കും ഒരുപോലെ ഗുണകരമാകുന്നതാണ് ഈ ധാരണയെന്നും, ഇത് നാറ്റോയുടെയും യൂറോപ്പിന്റെയും മൊത്തത്തിലുള്ള സുരക്ഷയെ കൂടുതൽ ശക്തിപ്പെടുത്തുമെന്നും അവർ അഭിപ്രായപ്പെട്ടു. മേഖലയിലെ സുരക്ഷാ സന്നാഹങ്ങൾ വർധിപ്പിക്കാൻ ഈ കരാർ ഏറെ സഹായകരമാകും എന്ന് ഗ്രീൻലാൻഡ് പ്രധാനമന്ത്രി ജെൻസ് ഫ്രെഡെറിക് നീൽസണും പ്രതികരിച്ചു.
ഡെന്മാർക്കിന്റെ ഭരണകീഴിലുള്ള സ്വയംഭരണാവകാശമുള്ള ഒരു പ്രദേശമാണ് ഗ്രീൻലാൻഡ്. ഗ്രീൻലാൻഡിനെ സ്വന്തമാക്കുകയെന്ന അമേരിക്കയുടെ ലക്ഷ്യത്തിന് ഏകദേശം 150 വർഷത്തെ പഴക്കമുണ്ട്.
2025-ൽ വീണ്ടും അധികാരത്തിൽ എത്തിയതിനുശേഷം ഡൊണാൾഡ് ട്രംപ് ഈ ആവശ്യം ശക്തമായി ഉന്നയിച്ചിരുന്നു. പ്രദേശത്തെ റഷ്യൻ സ്വാധീനങ്ങളും താൽപ്പര്യങ്ങളും പൂർണ്ണമായി തടയുകയെന്നതാണ് യുഎസിന്റെ മുഖ്യ അജണ്ട.
ഇതിനോടൊപ്പം തന്നെ, ഗ്രീൻലാൻഡിൽ ലഭ്യമായ വിപുലമായ ധാതുനിക്ഷേപങ്ങളിലും അമേരിക്കൻ ഭരണകൂടം കണ്ണുവെക്കുന്നുണ്ട്. 2009-ൽ സ്വയംഭരണാധികാരമുള്ള പ്രദേശമായി മാറിയെങ്കിലും, ഗ്രീൻലാൻഡിന്റെ പ്രതിരോധം, വിദേശനയം തുടങ്ങിയ സുപ്രധാന കാര്യങ്ങൾ ഇന്നും കൈകാര്യം ചെയ്യുന്നത് ഡെന്മാർക്കാണ്.
ഭൂരിഭാഗവും അതായത് 80 ശതമാനത്തോളം മഞ്ഞുമൂടിക്കിടക്കുന്ന ഈ ദ്വീപിന്റെ പ്രധാന വരുമാന സ്രോതസ്സ് ഡെന്മാർക്കിൽ നിന്നും ലഭിക്കുന്ന ബജറ്റ് വിഹിതമാണ്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
