വനമേഖലയും കബനിപ്പുഴയും അതിരിടുന്ന ചേകാടി ഗ്രാമത്തിലേക്കുള്ള പാതയുടെ ശോച്യാവസ്ഥ പ്രദേശവാസികൾക്കും യാത്രക്കാർക്കും വലിയ ദുരിതമാണ് സമ്മാനിക്കുന്നത്. ചേകാടി നിവാസികൾക്ക് പുറമേ, കർണാടകയിലെ എച്ച്.ഡി.കോട്ട, ഹുൺസൂരു താലൂക്കുകളിലേക്ക് കൃഷിയാവശ്യങ്ങൾക്കായി ദിനംപ്രതി യാത്ര ചെയ്യുന്ന നൂറുകണക്കിന് ആളുകളാണ് ഈ റോഡിനെ ആശ്രയിക്കുന്നത്.
പുൽപള്ളി–പെരിക്കല്ലൂർ റൂട്ടിലെ വടാനക്കവലയിൽ നിന്നാണ് ഈ പാത ആരംഭിക്കുന്നത്. ബാവലിയിലേക്ക് വെറും 10 കിലോമീറ്റർ ദൂരമാണെങ്കിലും, റോഡിലെ വലിയ കുഴികളും തകർച്ചയും കാരണം യാത്ര അത്യന്തം ദുഷ്കരമായി മാറിയിരിക്കുന്നു.
പാളക്കൊല്ലി ഭാഗത്തെ റോഡിന്റെ അവസ്ഥ അതീവ ഗുരുതരമാണ്. ഉദയക്കര മുതൽ കുണ്ടുവാടി വരെയുള്ള വനപാതയിലൂടെയുള്ള യാത്ര ഭയാനകമാണ്.
പകൽ സമയങ്ങളിൽ പോലും കാട്ടാനശല്യം രൂക്ഷമായ ഇവിടെ, വാഹനങ്ങൾ കേടായി നിന്നാൽ യാത്രക്കാർ വലിയ അപകടസാധ്യതയാണ് നേരിടുന്നത്. കൂടാതെ, വിലങ്ങാടി മുതൽ പന്നിക്കൽ വരെയുള്ള ഭാഗവും പൂർണമായും തകർന്നിരിക്കുകയാണ്.
ദുർഘടമായ ഈ പാതയിലൂടെയാണ് പരിമിതമായ തോതിലെങ്കിലും ബസ് സർവീസുകൾ നടക്കുന്നത്. ഇത് മാത്രമാണ് വിദ്യാർത്ഥികൾക്കും ഗ്രാമീണർക്കും പുൽപള്ളിയിലേക്ക് എത്തിച്ചേരാനുള്ള ഏക ആശ്രയം.
റോഡിന്റെ ശോച്യാവസ്ഥ കാരണം ടാക്സികളും ഓട്ടോറിക്ഷകളും ഇങ്ങോട്ടേക്ക് സർവീസ് നടത്താൻ മടിക്കുകയാണ്. പണ്ട് തദ്ദേശസ്ഥാപനങ്ങൾ നടത്തിയ അറ്റകുറ്റപ്പണികൾ കാലപ്പഴക്കത്താൽ പൂർണമായും നശിച്ചു.
റോഡിന്റെ അടിത്തറ ബലപ്പെടുത്തി വീതികൂട്ടി നിർമിക്കുന്നതിനായി ഊരാളുങ്കൽ സംഘം 14 കോടി രൂപയുടെ എസ്റ്റിമേറ്റ് സമർപ്പിച്ചിട്ട് വർഷങ്ങളായി. മരാമത്ത് വകുപ്പിന്റെ പരിഗണനയിലുള്ള ഈ പദ്ധതി ഇതുവരെ യാഥാർത്ഥ്യമായിട്ടില്ല.
വനപാതയിലെ 11 മരങ്ങൾ മുറിച്ചുമാറ്റാൻ വനംവകുപ്പ് അനുമതി നൽകിയെങ്കിലും, 7 മരങ്ങൾ മുറിച്ചതോടെ ഫണ്ട് തീർന്നതിനെത്തുടർന്ന് നടപടികൾ പാതിവഴിയിൽ നിലച്ചു. കബനിപ്പുഴയ്ക്ക് കുറുകെയുള്ള പാലം മാത്രമാണ് പ്രദേശവാസികൾക്ക് അൽപമെങ്കിലും ആശ്വാസമാകുന്നത്.
റോഡ് നവീകരണത്തിനായി സർക്കാർ അടിയന്തരമായി ഇടപെടണമെന്നാണ് പ്രദേശവാസികളുടെ ആവശ്യം.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
