കൊൽക്കത്തയിലെ ശാരദാപാർക്കിലെ ദുർഗാപൂജ പന്തലിലുണ്ടായ തിക്കിലും തിരക്കിലുംപെട്ട് 19 പേർ ജീവനൊടുക്കേണ്ടി വന്ന സംഭവത്തിൽ ഞെട്ടിക്കുന്ന വെളിപ്പെടുത്തലുകളുമായി ദൃക്സാക്ഷികളും പരുക്കേറ്റവരും. ഇടുങ്ങിയ പ്രവേശന കവാടവും പുറത്തേക്കുള്ള വഴിയും, പെയ്തിറങ്ങിയ കനത്ത മഴ, വാരാന്ത്യമായതിനാൽ പതിവിലും കവിഞ്ഞുണ്ടായ വൻ ജനക്കൂട്ടം എന്നിവയാണ് ആൾക്കൂട്ട
ദുരന്തത്തിന്റെ വ്യാപ്തി വർധിപ്പിച്ചത്. അപകടത്തിൽ പരുക്കേറ്റ 25കാരനായ സോനു പാൽ മാധ്യമങ്ങളോടു പറഞ്ഞത് ഇങ്ങനെയാണ്: “എന്റെ കൺമുന്നിൽവച്ചാണ് എന്റെ അമ്മ മരിച്ചത്.
ഞാനും മരിച്ചെങ്കിൽ…”. കുമോർതുലി സ്വദേശിയായ സോനു അമ്മയ്ക്കൊപ്പമാണ് പൂജ പന്തലിലെത്തിയത്.
സംഭവത്തെക്കുറിച്ച് സോനു വിവരിച്ചത് ഇങ്ങനെ: “ഞങ്ങൾ പന്തലിലെത്തി അൽപം കഴിഞ്ഞപ്പോൾ പെട്ടെന്ന് മഴ പെയ്തു. പന്തലിലുള്ളവർ അവിടെത്തന്നെ നിന്നു.
ഈ സമയം പുറത്തുനിന്ന് വന്നവരും പന്തലിലേക്ക് ഇടിച്ചുകയറുകയായിരുന്നു. ഇതോടെ വൻ ജനക്കൂട്ടമായി.
ശ്വാസംമുട്ടി. എല്ലാവരും പരസ്പരം തള്ളിമാറ്റാൻ തുടങ്ങി.
ഓരോരുത്തരും ആരുടെയെങ്കിലും പുറത്തേക്കു വീഴാൻ തുടങ്ങി. ഞാനും വീഴാൻ തുടങ്ങിയതാണ്.
പക്ഷേ എങ്ങനെയോ പിടിച്ചുനിന്നു. പക്ഷേ അമ്മയ്ക്ക് കഴിഞ്ഞില്ല.” വളരെ ഇടുങ്ങിയ വാതിലും പുറത്തേക്കുള്ള വഴിയുമായിരുന്നു പന്തലിലേക്കെന്ന് മറ്റൊരു പ്രദേശവാസിയും ഐഎഎൻഎസിനോട് വ്യക്തമാക്കി.
അദ്ദേഹത്തിന്റെ മകൾക്കും പേരക്കുട്ടിക്കും ഈ അപകടത്തിൽ പരുക്കേറ്റിട്ടുണ്ട്. “പ്രവേശന കവാടവും പുറത്തേക്കുള്ള വഴിയും വളരെ ഇടുങ്ങിയതായിരുന്നു.
പ്രദേശത്ത് ലൈറ്റ് ഉണ്ടായിരുന്നില്ല. പ്രവേശന കവാടത്തിൽ 1.5 മണിക്കൂറോളം നീണ്ട
ക്യു ഉണ്ടായിരുന്നു. മഴ തുടങ്ങിയതോടെ ആളുകൾ ഇടിച്ചുകയറാൻ തുടങ്ങി.
ഇരുട്ടത്ത് ഒരു ചെറിയ പെൺകുട്ടിയും ആൺകുട്ടിയും വീണു. ഞാനും വീണെങ്കിലും തപ്പിത്തടഞ്ഞ് എഴുന്നേറ്റു.
പക്ഷേ കുട്ടികൾക്കു മുകളിലേക്ക് മറ്റുള്ളവർ വീണു കിടപ്പുണ്ടായിരുന്നു. പൊലീസോ വൊളന്റിയർമാരോ ആരും അവിടെയുണ്ടായിരുന്നില്ല,” പ്രദേശവാസി കൂട്ടിച്ചേർത്തു.
