ശാരീരിക അവശതകളെ മണ്ണിലെ അധ്വാനം കൊണ്ട് തോൽപ്പിച്ച ഹമീദ്കുട്ടി; കൃഷിയിൽ കണ്ടെത്തിയത് പുതിയ ജീവിതം

പത്തനംതിട്ട നാരങ്ങാനം നോർത്ത് കണമുക്ക് അഞ്ചുതോട് ആഷ്‌ലി മൻസിലിൽ താമസിക്കുന്ന സി.എച്ച്.ഹമീദ്കുട്ടി എന്ന 70 വയസ്സുകാരൻ ഇന്ന് ഒട്ടേറെ പേർക്ക് പ്രചോദനമാണ്.

അരയ്ക്കു കീഴ്പ്പോട്ടുള്ള ചലനശേഷി നഷ്ടപ്പെട്ട അവസ്ഥയിലും, വലതുകാലിന്റെ സ്വാധീനക്കുറവിലും തളരാതെ, രണ്ട് ഏക്കറോളം വരുന്ന ഭൂമിയിൽ ഹമീദ്കുട്ടി കൃഷി ചെയ്യുന്നു.

രണ്ടായിരം മൂട് കപ്പ, ഇരുന്നൂറിലധികം വാഴകൾ, കൂടാതെ ചേമ്പ്, കാച്ചിൽ, ചേന, പയർ എന്നിവ അദ്ദേഹത്തിന്റെ കൃഷിയിടത്തെ സമ്പന്നമാക്കുന്നു. “പറമ്പിൽ പണിയെടുക്കുമ്പോൾ ശാരീരിക അവശതകളെ മറക്കുമെന്നു” അദ്ദേഹം സാക്ഷ്യപ്പെടുത്തുന്നു.

19 വർഷം മുൻപ് മസ്കത്തിൽ അക്കൗണ്ടന്റായി ജോലി ചെയ്തിരുന്ന സമയത്താണ് സി.എച്ച്.ഹമീദ്കുട്ടിയുടെ ജീവിതം മാറ്റിമറിച്ച അപകടം സംഭവിച്ചത്. പരുക്കുകളിൽ നിന്ന് മുക്തനായെങ്കിലും പിന്നീട് അദ്ദേഹത്തിന്റെ ചലനശേഷി നഷ്ടപ്പെടുകയായിരുന്നു.

വിമാനമാർഗ്ഗം നാട്ടിലെത്തിച്ച് ആശുപത്രിയിൽ മാസങ്ങളോളം ഫിസിയോതെറപ്പി ചെയ്തെങ്കിലും വലതുകാലിന്റെ സ്വാധീനം പൂർണ്ണമായും തിരികെ ലഭിച്ചില്ല. എന്നാൽ, ശാരീരികമായ പരിമിതികൾ തന്റെ ജീവിതത്തിന്റെ അവസാനമല്ലെന്ന് തിരിച്ചറിഞ്ഞ അദ്ദേഹം വീടിനുള്ളിൽ ഒതുങ്ങിയിരിക്കാൻ തയ്യാറായില്ല.

ചെറുപ്പകാലത്ത് ചിറ്റാറിലെ കുടുംബഭൂമിയിൽ ലഭിച്ച കൃഷിപരിചയം കൈമുതലാക്കി അദ്ദേഹം വീണ്ടും മണ്ണിനെ ആശ്രയിച്ചു. കഴിഞ്ഞ 16 വർഷമായി അദ്ദേഹം കൃഷിയിടത്തിൽ സജീവമാണ്.

ഭാര്യ സിൽസയുടെ സഹോദരൻ മുഹമ്മദ് കാസിയുടെ ഭൂമി പാട്ടത്തിനെടുത്താണ് അദ്ദേഹം കൃഷി ചെയ്യുന്നത്. വലിയ ജോലികൾക്ക് ഒരാളുടെ സഹായം തേടുമെങ്കിലും, കാട് തെളിക്കൽ, വളമിടീൽ, തടം ഒരുക്കൽ തുടങ്ങിയ ദൈനംദിന കാര്യങ്ങളെല്ലാം അദ്ദേഹം തന്നെയാണ് നിർവ്വഹിക്കുന്നത്.

താൻ വിളയിച്ചെടുക്കുന്ന കാർഷിക ഉൽപ്പന്നങ്ങൾ മുച്ചക്ര സ്കൂട്ടറിൽ വിപണിയിലെത്തിക്കുന്നതും ഇദ്ദേഹം തന്നെയാണ്. കാലിപ്പർ ധരിച്ചും ഊന്നുവടിയുടെ സഹായത്തോടെയും തൂമ്പയുമേന്തി കൃഷിയിടത്തിൽ കർമ്മനിരതനായി അദ്ദേഹം മുന്നേറുന്നു.

നട്ടെല്ലിന്റെ പരുക്ക് കാരണം ഇടവേളകളെടുത്ത് ജോലി ചെയ്യേണ്ടി വരുന്നത് മാത്രമാണ് പ്രധാന തടസ്സം. കാലിന്റെ സ്വാധീനക്കുറവ് മൂലം ഇടയ്ക്കിടെ വീഴാറുണ്ടെന്നും, ഒരു വർഷം മുൻപ് വീഴ്ചയിൽ നട്ടെല്ലിന് വീണ്ടും പരുക്കേറ്റിരുന്നതായും അദ്ദേഹം പങ്കുവെക്കുന്നു.

എങ്കിലും, ഭാര്യ സിൽസയുടെ പിന്തുണയോടെ വീണ്ടും കൃഷിയിടത്തിൽ സജീവമാകുകയാണ് ഈ കർഷകൻ. മക്കളായ ആഷ്നയും ആഷ്‌ലിയും വിവാഹിതരാണ്.