2010 ആവർത്തിക്കാൻ സ്പെയിൻ; ലോകകപ്പ് ഫൈനലിന് മുൻപ് കൗതുകകരമായ സാമ്യങ്ങൾ

ഫുട്ബോൾ ലോകകപ്പ് ഫൈനലിൽ കിരീടം സ്വപ്നം കാണുന്ന സ്പെയിൻ ടീമിന് ആത്മവിശ്വാസം നൽകുന്ന ഒട്ടേറെ കണക്കുകളും ചരിത്രപരമായ സാമ്യങ്ങളും പുറത്തുവരുന്നു. 2010-ൽ ലോക ചാമ്പ്യന്മാരായപ്പോൾ ഉണ്ടായ പത്തിലധികം സാഹചര്യങ്ങൾ ഇത്തവണത്തെ ടൂർണമെന്റിലും അതേപടി ആവർത്തിക്കപ്പെടുന്നത് ആരാധകരിൽ വലിയ പ്രതീക്ഷയാണ് ഉണർത്തുന്നത്.

2010-ലെയും 2026-ലെയും സമാനതകൾ പരിശോധിക്കുമ്പോൾ കൗതുകകരമായ പല കാര്യങ്ങളും കാണാം. യൂറോ ചാമ്പ്യന്മാരായാണ് സ്പെയിൻ 2010-ൽ ലോകകപ്പിനെത്തിയത്, ഇത്തവണയും സ്ഥിതി വ്യത്യസ്തമല്ല.

ഇരു ലോകകപ്പുകളിലും ഗ്രൂപ്പ് എച്ചിലായിരുന്നു ടീം ഉൾപ്പെട്ടത്. 2010-ലെ ഉദ്ഘാടന മത്സരത്തിൽ ദക്ഷിണാഫ്രിക്കയും മെക്സിക്കോയും തമ്മിൽ ഏറ്റുമുട്ടിയതുപോലെ, ഇത്തവണയും ഉദ്ഘാടന മത്സരം ഇതേ ടീമുകൾ തമ്മിലായിരുന്നു.

കൂടാതെ, ആദ്യ മത്സരത്തിൽ സ്പെയിൻ ഗോൾ രഹിതമായി പിരിഞ്ഞതും, പ്രീ ക്വാർട്ടറിൽ പോർച്ചുഗലിനെ പരാജയപ്പെടുത്തിയതും ചരിത്രത്തിന്റെ ആവർത്തനമാണ്. 2010-ലെ സെമിഫൈനലിൽ ഉറുഗ്വെ എന്ന ഏക ലാറ്റിനമേരിക്കൻ ടീം ഉണ്ടായിരുന്നുവെങ്കിൽ, ഇത്തവണയും അത് ആവർത്തിച്ചു.

സ്പാനിഷ് ക്ലബ്ബ് ബാഴ്‌സലോണയിൽ നിന്നുള്ള എട്ട് താരങ്ങൾ 2010-ലെ ടീമിലുണ്ടായിരുന്നു, ഇത്തവണ ഫൈനലിൽ കളിക്കുന്ന ടീമിലും എട്ട് ബാഴ്സലോണ കളിക്കാരുണ്ട്. മറ്റ് ക്ലബ്ബ് തലത്തിലെ സാമ്യങ്ങളും ശ്രദ്ധേയമാണ്.

2010-ൽ റയൽ മാഡ്രിഡ് കിരീടങ്ങളില്ലാതെ സീസൺ അവസാനിപ്പിച്ചത് പോലെ ഇത്തവണയും സംഭവിച്ചു. റയൽ പരിശീലകനായി മൗറീന്യോ എത്തിയതും, ബാഴ്സലോണ ലാ ലീഗയും സ്പാനിഷ് സൂപ്പർ കപ്പും സ്വന്തമാക്കിയതും 2010-ന് സമാനമാണ്.

മാർസലോ ബിയേൽസ പരിശീലിപ്പിച്ച ടീമിനെ സ്പെയിൻ ഗ്രൂപ്പ് ഘട്ടത്തിലെ അവസാന മത്സരത്തിൽ നേരിട്ടതും, സാവിയർ അഗ്വയ്ര്‍ മെക്സിക്കോയുടെ പരിശീലകനായി എത്തിയതും 2010-ലെ ഓർമ്മകൾ പുതുക്കുന്നു. 2010-ൽ ലോകകപ്പ് തീം സോങ്ങ് പാടിയ ഷാക്കിറ ഇത്തവണയും പാടുന്നു എന്നതും ആകസ്മികതയുടെ മാറ്റുകൂട്ടുന്നു.

ഇതെല്ലാം കേവലം നിമിത്തങ്ങൾ മാത്രമാണെങ്കിലും സ്പാനിഷ് ആരാധകർ വലിയ പ്രതീക്ഷയിലാണ്.