ഇറാൻ ആണവായുധം നേടുന്നത് അനുവദിക്കില്ല: നിലപാട് കടുപ്പിച്ച് ബെഞ്ചമിൻ നെതന്യാഹു

അമേരിക്കയും ഇറാനും തമ്മിൽ ഏതെങ്കിലും തരത്തിലുള്ള ആണവ കരാറുകളിൽ ഏർപ്പെട്ടാലും, ഇറാൻ ആണവായുധം നിർമ്മിക്കുന്നത് തടയാൻ ഇസ്രായേൽ പ്രതിജ്ഞാബദ്ധമാണെന്ന് പ്രധാനമന്ത്രി ബെഞ്ചമിൻ നെതന്യാഹു വ്യക്തമാക്കി. ജെറുസലേമിൽ നടത്തിയ പ്രസംഗത്തിലാണ് അദ്ദേഹം ഇക്കാര്യം ആവർത്തിച്ചത്.

താൻ പ്രധാനമന്ത്രിയായിരിക്കുന്ന കാലത്തോളം ഇറാനെ ആണവായുധം സ്വന്തമാക്കാൻ അനുവദിക്കില്ലെന്ന് അദ്ദേഹം വ്യക്തമാക്കി. ഇറാനിൽ നിന്നുള്ള ആണവ ഭീഷണി ഫലപ്രദമായി നേരിടാൻ ഇസ്രായേലിന് സാധിച്ചതായും, ഇതിലൂടെ രാജ്യത്തെ വലിയൊരു വിപത്തിൽ നിന്ന് രക്ഷിക്കാനായെന്നും അദ്ദേഹം അവകാശപ്പെട്ടു.

ഇറാന്റെ ആണവ മോഹങ്ങളെ തടയുക എന്നത് തന്റെ ജീവിതത്തിലെ ഏറ്റവും വലിയ ദൗത്യമാണെന്ന് നെതന്യാഹു പറഞ്ഞു. അമേരിക്കയുമായി സഹകരിച്ച് ചരിത്രത്തിലെ തന്നെ ഏറ്റവും വലിയ ആക്രമണ പരമ്പരയ്ക്കാണ് ഇസ്രായേൽ നേതൃത്വം നൽകിയത്.

ഇറാന്റെ ആണവ ശാസ്ത്രജ്ഞരെ ലക്ഷ്യമിട്ടും, ആണവ നിലയങ്ങൾ തകർത്തും ഭീകര ഭരണകൂടത്തിന്റെ നേതാക്കളെ വധിച്ചും ഇസ്രായേൽ തങ്ങളുടെ കരുത്ത് തെളിയിച്ചിട്ടുണ്ട്. മിസൈൽ നിർമ്മാണ കേന്ദ്രങ്ങൾ തകർത്തതിനൊപ്പം ഇറാന്റെ നാവിക, വ്യോമ സേനകൾക്കും സൈനിക കമാൻഡർമാർക്കും കനത്ത പ്രഹരമേൽപ്പിക്കാൻ ഇസ്രായേലിന് കഴിഞ്ഞു.

ഈ സൈനിക നീക്കങ്ങളിലൂടെ ഇറാനുണ്ടായത് നൂറുകണക്കിന് ബില്യൺ ഡോളർ മുതൽ ഒരു ട്രില്യൺ ഡോളർ വരെ വരുന്ന സാമ്പത്തിക നഷ്ടമാണ്. എന്നാൽ ഈ പോരാട്ടം ഇവിടെ അവസാനിക്കുന്നില്ലെന്നും, കൂടുതൽ ജാഗ്രതയോടെ മുന്നോട്ട് പോകേണ്ടതുണ്ടെന്നും ബെഞ്ചമിൻ നെതന്യാഹു ഓർമ്മിപ്പിച്ചു.

ഇറാനെതിരെ മാത്രമല്ല, ഗാസ, ലബനൻ, സിറിയ, യെമൻ, വെസ്റ്റ് ബാങ്ക് എന്നീ പ്രദേശങ്ങളിൽ ഇറാന്റെ പിന്തുണയോടെ പ്രവർത്തിക്കുന്ന ഭീകര സംഘടനകൾക്കെതിരെയുള്ള പോരാട്ടം തുടരുമെന്നും അദ്ദേഹം വ്യക്തമാക്കി. ഗാസയിലും ലബനനിലും സിറിയയിലും ഇസ്രായേൽ ഇതിനകം തന്നെ ശക്തമായ സുരക്ഷാ മേഖലകൾ സ്ഥാപിച്ചു കഴിഞ്ഞുവെന്നും, രാജ്യസുരക്ഷയ്ക്ക് ആവശ്യമായ കാലത്തോളം സൈന്യം അവിടെ തുടരുമെന്നും അദ്ദേഹം കൂട്ടിച്ചേർത്തു.

അന്താരാഷ്ട്ര തലത്തിൽ പുതിയ സഖ്യങ്ങൾ രൂപീകരിച്ചുകൊണ്ട് ഇസ്രായേലിന്റെ സുരക്ഷാ സ്വയംഭരണാധികാരം ഉറപ്പുവരുത്തുമെന്നും അദ്ദേഹം ഉറപ്പുനൽകിയതായി ടൈംസ് ഓഫ് ഇസ്രയേൽ റിപ്പോർട്ട് ചെയ്യുന്നു.