കൊച്ചി നഗരത്തിലെ തീരദേശ മേഖലയായ നായരമ്പലം, ഞാറയ്ക്കൽ എന്നിവിടങ്ങളിൽ ടെട്രാപോഡുകൾ ഉപയോഗിച്ച് ശാസ്ത്രീയമായ കടൽഭിത്തി നിർമിക്കണമെന്നാവശ്യപ്പെട്ടുള്ള പൊതുതാത്പര്യ ഹർജി ഹൈക്കോടതി നവംബർ നാലിന് വീണ്ടും പരിഗണിക്കും. കോടതിയുടെ മുൻ നിർദേശങ്ങൾ കർശനമായി പാലിച്ച് പുതിയ സത്യവാങ്മൂലം സമർപ്പിക്കാൻ ഇറിഗേഷൻ വകുപ്പിനും കോടതി നിർദേശം നൽകിയിട്ടുണ്ട്.
ചീഫ് ജസ്റ്റിസ് സൗമെൻ സെൻ, ജസ്റ്റിസ് വി എം ശ്യാംകുമാർ എന്നിവരടങ്ങിയ ഡിവിഷൻ ബെഞ്ചിന്റേതാണ് ഈ സുപ്രധാന ഉത്തരവ്. നായരമ്പലം സ്വദേശി എ ജി ജോയ് ഉൾപ്പെടെയുള്ളവരാണ് ഈ വിഷയത്തിൽ കോടതിയെ സമീപിച്ചത്.
കേരളത്തിൽ കടലേറ്റ ഭീഷണി രൂക്ഷമായി നിലനിൽക്കുന്ന പത്ത് ഹോട്ട് സ്പോട്ടുകളിൽ ഞാറയ്ക്കൽ, നായരമ്പലം, എടവനക്കാട് പഞ്ചായത്തുകളും ഉൾപ്പെടുന്നുണ്ട്. എന്നാൽ, ജലസേചന വകുപ്പ് കോടതിയിൽ സമർപ്പിച്ച സത്യവാങ്മൂലത്തിൽ ഞാറയ്ക്കൽ, നായരമ്പലം പഞ്ചായത്തുകളെ കുറിച്ച് പരാമർശിച്ചിട്ടില്ലെന്ന് ഹർജിക്കാർ കോടതിയുടെ ശ്രദ്ധയിൽപ്പെടുത്തി.
അതേസമയം, ജില്ലാ കളക്ടറുടെ ഔദ്യോഗിക റിപ്പോർട്ടിൽ ഈ പഞ്ചായത്തുകളെല്ലാം ഉൾപ്പെടുത്തിയിട്ടുണ്ടെന്നും ഹർജിക്കാർ വ്യക്തമാക്കിയിട്ടുണ്ട്. കടലേറ്റ ഭീഷണി നേരിടുന്ന ഇത്തരം ഹോട്ട്സ്പോട്ടുകളിൽ അടിയന്തര പ്രതിരോധ നടപടികൾ സ്വീകരിക്കണമെന്ന് കോടതി ഉത്തരവിട്ടു.
ഏഷ്യൻ ഡെവലപ്മെന്റ് ബാങ്കിൽ നിന്നുള്ള സാമ്പത്തിക സഹായം ലഭ്യമാക്കുന്നതിനായി ഇതുവരെ സ്വീകരിച്ചിട്ടുള്ള നടപടികളുടെ വിശദാംശങ്ങളും കോടതിയെ അറിയിക്കണം. നിർമാണ പ്രവർത്തനങ്ങൾ പൂർത്തിയാക്കുന്നതിനുള്ള സമയപരിധി പരമാവധി കുറയ്ക്കുന്നതിനെക്കുറിച്ച് ആലോചിക്കാനും ജലസേചന വകുപ്പ് പ്രിൻസിപ്പൽ സെക്രട്ടറിക്ക് കോടതി നിർദേശം നൽകിയിട്ടുണ്ട്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
