സാമൂഹ്യമാധ്യമങ്ങളിൽ വേറിട്ട മീൻപിടിത്ത ശൈലിയിലൂടെ വലിയ ആരാധകവൃന്ദത്തെ നേടിയെടുത്ത ഫിഷറിങ് ഇൻഫ്ലുവൻസറും മത്സ്യത്തൊഴിലാളിയുമായ തംബുരു കെ.കെ (36) യെ വീട്ടിനുള്ളിൽ മരിച്ച നിലയിൽ കണ്ടെത്തി.
വൈക്കം ചേമ്പ് കാട്ടിക്കുന്ന് തുരുത്ത് സ്വദേശിനിയാണ് തംബുരു. വൈക്കം പുളിഞ്ചുവടിലെ വാടകവീട്ടിൽ ഇന്നലെ ഉച്ചയോടെയായിരുന്നു സംഭവം.
വൈകീട്ട് അഞ്ചു മണിയോടെ സ്കൂൾ വിട്ടെത്തിയ 13 വയസ്സുള്ള മകളാണ് തംബുരുവിനെ വീടിനുള്ളിൽ തൂങ്ങിയ നിലയിൽ കണ്ടത്. സംഭവത്തിൽ വൈക്കം പൊലീസ് അസ്വാഭാവിക മരണത്തിന് കേസെടുത്തിട്ടുണ്ട്.
പോസ്റ്റ്മോർട്ടത്തിന് ശേഷം മൃതദേഹം കാട്ടിക്കുന്നിലെ തറവാട്ടു വീട്ടിലെത്തിച്ച് സംസ്കരിച്ചു. ഭർത്താവുമായി വേർപിരിഞ്ഞ് കഴിയുകയായിരുന്ന തംബുരു തനിക്കെതിരെ ഉയർന്ന അപവാദപ്രചാരണങ്ങൾക്കുള്ള മറുപടിയായാണ് സ്വന്തം ഉപജീവനമാർഗമായ ‘കൈകൾ കൊണ്ട് മീൻ തപ്പിക്കിപ്പിടിക്കുന്ന’ പരമ്പരാഗത തൊഴിൽ ക്യാമറയ്ക്ക് മുന്നിലെത്തിക്കാൻ തീരുമാനിച്ചത്.
‘ക്വീൻ ഫിഷർ’ എന്ന പേരിൽ തുടങ്ങിയ സോഷ്യൽ മീഡിയ പേജുകളിലൂടെ പങ്കുവെച്ച ആദ്യ മീൻപിടിത്ത വീഡിയോ തന്നെ 90 ലക്ഷത്തിലധികം കാഴ്ചക്കാരെ നേടിയിരുന്നു. പിന്നാലെ ഫെയ്സ്ബുക്കിലും ഇൻസ്റ്റാഗ്രാമിലും യൂട്യൂബിലും തംബുരുവിന് വലിയ ആരാധകരെ ലഭിച്ചു.
തലമുറകളായി കുടുംബത്തിലുള്ള പരമ്പരാഗത മീൻപിടിത്ത രീതിയാണ് തംബുരു സോഷ്യൽ മീഡിയയിലൂടെ ലോകത്തിന് മുന്നിൽ എത്തിച്ചത്. പത്താം ക്ലാസ് പഠനത്തിന് ശേഷം അമ്മയോടൊപ്പം മീൻപിടിത്തത്തിലേക്കിറങ്ങിയ തംബുരു ഈ വരുമാനം കൊണ്ടാണ് തന്റെ ഇളയ സഹോദരങ്ങളുടെ പഠനം പൂർത്തിയാക്കിയത്.
തൊഴിലുറപ്പ് ജോലികളും ഡ്രൈവിങ് സ്കൂളിലെയും വസ്ത്ര നിർമാണ യൂണിറ്റിലെയും ജോലികളും ചെയ്യുന്നതിനൊപ്പം തന്നെ തംബുരു പരമ്പരാഗത രീതിയിൽ മീൻപിടിത്തവും തുടർന്നുപോന്നു. വേലിയേറ്റ സമയങ്ങളിൽ വഞ്ചികളിൽ കായലിലേക്കിറങ്ങി വലയോ ചൂണ്ടയോ ഉപയോഗിക്കാതെ ചെളിയിലും കല്ലിടുക്കുകളിലും കൈകൾ കൊണ്ട് തിരഞ്ഞ് മീൻപിടിക്കുന്ന അപൂർവ രീതിയാണ് തംബുരുവും കുടുംബവും അവതരിപ്പിച്ചിരുന്നത്.
അതേസമയം, തംബുരുവിന്റെ മരണത്തിന് കാരണം ഓൺലൈൻ വഴി പരിചയപ്പെട്ട പാലക്കാട് സ്വദേശിയായ സുഹൃത്തിന്റെ മാനസിക പീഡനമാണെന്ന് കുടുംബവും സുഹൃത്തുക്കളും ആരോപിച്ചിരുന്നു.
സോഷ്യൽ മീഡിയയിലൂടെ ബന്ധം സ്ഥാപിച്ച ഇയാൾ തംബുരുവിനെ കടുത്ത മാനസിക സമ്മർദ്ദത്തിലാക്കുകയും വിഡിയോകൾ ചിത്രീകരിച്ച് പോസ്റ്റ് ചെയ്യുന്നതിൽ നിന്ന് തടയുകയും ചെയ്തിരുന്നുവെന്ന് ബന്ധുക്കളും സുഹൃത്തുക്കളും സാക്ഷ്യപ്പെടുത്തുന്നു. മാനസിക പീഡനം മൂലം തംബുരുവിന് അടുത്തിടെ ചികിത്സ തേടേണ്ടി വന്നിരുന്നതായും ബന്ധുക്കൾ വെളിപ്പെടുത്തി.
ഈ ആരോപണങ്ങളെക്കുറിച്ച് സമഗ്രമായ അന്വേഷണം നടത്തുമെന്ന് പൊലീസ് വ്യക്തമാക്കിയിട്ടുണ്ട്.
