എഥനോൾ ഉൽപാദനത്തിനുള്ള സർക്കാർ അരി മറിച്ചുവിറ്റ കേസ് എഥനോൾ നിർമ്മാണത്തിനായി സബ്സിഡി നിരക്കിൽ വിതരണം ചെയ്ത അരി സ്വകാര്യ മില്ലുകൾക്ക് മറിച്ചുവിറ്റ സംഭവത്തിൽ കർശന നടപടികളുമായി ഫുഡ് കോർപറേഷൻ ഓഫ് ഇന്ത്യ (എഫ്സിഐ). കുറ്റക്കാരായ പ്ലാന്റ് ഉടമകൾക്കെതിരെ 44.12 ലക്ഷം രൂപ പിഴ ചുമത്തുകയും ഇവരെ കരിമ്പട്ടികയിൽ ഉൾപ്പെടുത്തുകയും ചെയ്തിട്ടുണ്ട്.
സംഭവത്തിൽ വിശദമായ അന്വേഷണത്തിനായി പ്രത്യേക സംഘത്തെയും നിയോഗിച്ചിട്ടുണ്ട്. മധ്യപ്രദേശിലെ 17 ജില്ലകളിലായി പ്രവർത്തിക്കുന്ന 22 എഥനോൾ പ്ലാന്റുകൾക്കാണ് ക്വിന്റലിന് 2,320 രൂപ നിരക്കിൽ സർക്കാർ അരി അനുവദിച്ചത്.
എന്നാൽ, എഥനോൾ ഉൽപാദനത്തിന് ഉപയോഗിക്കുന്നതിന് പകരം, ഈ അരി ക്വിന്റലിന് 2,600 മുതൽ 3,000 രൂപ വരെ നിരക്കിൽ സ്വകാര്യ റൈസ് മില്ലുകൾക്ക് മറിച്ചുവിറ്റ് വലിയ ലാഭം കൊയ്തതായാണ് കണ്ടെത്തൽ. 1,190 കോടി രൂപയുടെ തട്ടിപ്പ് നടന്നതായി റിപ്പോർട്ടുകൾ ഉണ്ടായിരുന്നെങ്കിലും, 5.6 ലക്ഷം രൂപയുടെ അരി മാത്രമാണ് തങ്ങൾ കണ്ടെത്തിയതെന്നും തട്ടിപ്പിന്റെ വ്യാപ്തി അത്രയും വലുതല്ലെന്നുമാണ് എഫ്സിഐയുടെ വാദം.
നിലവിൽ നാല് പേരെ ഈ കേസിൽ അറസ്റ്റ് ചെയ്തിട്ടുണ്ട്. ഇ20 പെട്രോളും വാഹന മൈലേജും: നിതിൻ ഗഡ്കരിയുടെ പരാമർശം ഇ20 പെട്രോൾ ഉപയോഗിക്കുമ്പോൾ വാഹനങ്ങളുടെ മൈലേജ് ഗണ്യമായി കുറയുന്നുവെന്ന പരാതികൾ അശാസ്ത്രീയമാണെന്ന് കേന്ദ്രമന്ത്രി നിതിൻ ഗഡ്കരി വ്യക്തമാക്കി.
സാധാരണക്കാരായ കാറുടമകൾക്ക് വാഹനത്തിന്റെ മൈലേജ് കൃത്യമായി അളക്കാൻ കഴിയില്ലെന്നും, അംഗീകൃത ഡീലർമാർ നടത്തുന്ന ശാസ്ത്രീയ പരിശോധനകളെയാണ് ഇതിനായി ആശ്രയിക്കേണ്ടതെന്നും അദ്ദേഹം പറഞ്ഞു. താൻ വാങ്ങിയ വാഹനത്തിന്റെ മൈലേജ് 11 കിലോമീറ്ററിൽ നിന്ന് 7 കിലോമീറ്ററായി കുറഞ്ഞുവെന്ന് ഒരു മാധ്യമപ്രവർത്തക ചൂണ്ടിക്കാട്ടിയപ്പോഴായിരുന്നു മന്ത്രിയുടെ പ്രതികരണം.
ഡാഷ്ബോർഡിലെ ഡിസ്പ്ലേയെ അടിസ്ഥാനമാക്കിയാണ് ഈ നിഗമനത്തിലെത്തിയതെന്ന മറുപടിക്ക്, “നിങ്ങൾക്കും എനിക്കും വണ്ടിയുടെ മൈലേജ് പരിശോധിക്കാൻ കഴിയില്ല. കമ്പനിയുടെ അംഗീകൃത ഡീലറുടെ മെഷീൻ ഉപയോഗിച്ച് മാത്രമേ കാറിന്റെ മൈലേജ് കൃത്യമായി പരിശോധിക്കാൻ കഴിയൂ” എന്ന് മന്ത്രി മറുപടി നൽകി.
മന്ത്രിയുടെ ഈ വാദത്തെ മറികടന്ന് ഓട്ടോമൊബൈൽ വിദഗ്ധർ രംഗത്തെത്തിയിട്ടുണ്ട്. ആധുനിക വാഹനങ്ങളിലെ എൻജിൻ കൺട്രോൾ യൂണിറ്റിൽ നിന്നുള്ള വിവരങ്ങൾ അടിസ്ഥാനമാക്കിയാണ് ഡാഷ്ബോർഡിൽ മൈലേജ് കാണിക്കുന്നത്.
ഇത് പൂർണ്ണമായും കൃത്യമല്ലെങ്കിലും, യഥാർത്ഥ മൈലേജും ഡാഷ്ബോർഡ് കണക്കും തമ്മിൽ 5% വരെ വ്യത്യാസം മാത്രമേ ഉണ്ടാകാറുള്ളൂ. കൂടാതെ, ഇ20 പെട്രോൾ ഉപയോഗം ഇന്ധനക്ഷമതയിൽ 5% വരെ കുറവുണ്ടാക്കാമെന്ന് കേന്ദ്ര സർക്കാർ തന്നെ നേരത്തെ സമ്മതിച്ചിട്ടുമുണ്ട്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
