കൊച്ചിയിൽ ഗതാഗത നിയന്ത്രണങ്ങളും മെട്രോ റെയിൽ നിർമാണ പ്രവർത്തനങ്ങളും സൃഷ്ടിക്കുന്ന തിരക്ക് മുതലെടുത്ത് വ്യാജ ഇ-ചെല്ലാൻ തട്ടിപ്പ് വ്യാപകമാകുന്നു. വാഹന ഉടമകൾക്ക് ലഭിക്കുന്ന വ്യാജ സന്ദേശങ്ങളിലൂടെയാണ് പണം തട്ടിയെടുക്കുന്നത്.
തട്ടിപ്പുകാർ വാഹന ഉടമകളുടെ രജിസ്ട്രേഷൻ നമ്പർ ഉപയോഗിച്ചാണ് സന്ദേശങ്ങൾ അയക്കുന്നത്. ഔദ്യോഗിക സർക്കാർ വെബ്സൈറ്റുകളോട് സാമ്യമുള്ള വ്യാജ പേയ്മെന്റ് പോർട്ടലുകളിലേക്ക് ആളുകളെ നയിച്ചാണ് പണം കവരുന്നത്.
തിരക്കേറിയ റോഡുകളിലൂടെ യാത്ര ചെയ്യുമ്പോൾ അറിയാതെ എന്തെങ്കിലും നിയമലംഘനം നടത്തിക്കാണുമെന്ന് ഭയന്ന് പലരും യാതൊരു പരിശോധനയും കൂടാതെ പിഴ അടയ്ക്കുന്നു. 500 രൂപ മുതലാണ് തട്ടിപ്പുകാർ ആവശ്യപ്പെടുന്ന തുക.
ചെറിയ തുകയായതിനാൽ പലരും നിയമനടപടികൾക്ക് മുതിരാറില്ല. പിഴത്തുക ഉടൻ അടച്ചില്ലെങ്കിൽ കൂടുതൽ തുക ഈടാക്കുമെന്നും, വാഹന രേഖകൾ റദ്ദാക്കുമെന്നും, നിയമനടപടികൾ സ്വീകരിക്കുമെന്നും ഭീഷണിപ്പെടുത്തിയാണ് എസ്എംഎസ് അഥവാ വാട്സാപ്പ് സന്ദേശങ്ങൾ അയക്കുന്നത്.
സാമൂഹ്യമാധ്യമങ്ങളിൽ പങ്കുവെക്കുന്ന വാഹനങ്ങളുടെ ചിത്രങ്ങളിൽ നിന്നോ, പൊതുസ്ഥലങ്ങളിൽ പാർക്ക് ചെയ്ത വാഹനങ്ങളിൽ നിന്നോ തട്ടിപ്പുകാർ രജിസ്ട്രേഷൻ നമ്പറുകൾ ശേഖരിക്കുന്നു. അനാവശ്യമായ ലിങ്കുകൾ വഴി പിഴ അടയ്ക്കരുതെന്ന് പോലീസ് കർശനമായി നിർദ്ദേശിക്കുന്നു.
ഔദ്യോഗിക സർക്കാർ വെബ്സൈറ്റായ പരിവാഹൻ പോർട്ടൽ അല്ലാത്ത മറ്റേതെങ്കിലും ലിങ്കുകളിലേക്കാണ് സന്ദേശം നയിക്കുന്നതെങ്കിൽ അവ പൂർണ്ണമായും അവഗണിക്കണം. ഏതെങ്കിലും തരത്തിലുള്ള ഗതാഗത നിയമലംഘന നോട്ടീസുകൾ ലഭിച്ചാൽ, പണമടയ്ക്കുന്നതിന് മുൻപ് ഔദ്യോഗിക പരിവാഹൻ പോർട്ടലിൽ കയറി വിവരങ്ങൾ കൃത്യമാണോ എന്ന് ഉറപ്പുവരുത്തണമെന്ന് അധികൃതർ അറിയിച്ചു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
