മലബന്ധം അകറ്റാൻ ഭക്ഷണക്രമത്തിൽ ശ്രദ്ധിക്കാം; ഒഴിവാക്കേണ്ടതും ഉൾപ്പെടുത്തേണ്ടതുമായ വിഭവങ്ങൾ അറിയാം

ആധുനിക ജീവിതശൈലിയിൽ ഭൂരിഭാഗം ആളുകളും നേരിടുന്ന പ്രധാന ആരോഗ്യപ്രശ്നങ്ങളിലൊന്നാണ് മലബന്ധം. നിസ്സാരമെന്നു തോന്നാമെങ്കിലും, കൃത്യമായ മലവിസർജ്ജനം നടക്കാതിരിക്കുന്നത് വയറു വീർക്കുന്നതിനും ശാരീരിക അസ്വസ്ഥതകൾക്കും കാരണമാകും.

ആഴ്ചയിൽ മൂന്ന് തവണയിൽ താഴെ മാത്രം മലവിസർജ്ജനം നടക്കുന്ന അവസ്ഥയെയാണ് പൊതുവെ മലബന്ധമായി കണക്കാക്കുന്നത്. മലവിസർജ്ജനത്തിന്റെ കാര്യത്തിൽ ഓരോ വ്യക്തിയുടെയും ശീലങ്ങൾ വ്യത്യസ്തമായിരിക്കും.

ചിലർക്ക് ദിവസത്തിൽ പല തവണ മലവിസർജ്ജനം നടക്കുമ്പോൾ, മറ്റ് ചിലർക്ക് ആഴ്ചയിൽ ഒന്നോ രണ്ടോ തവണ മാത്രമായിരിക്കും ഇത് സംഭവിക്കുക. മലം വരണ്ടതും കഠിനവുമായിരിക്കുക, വിസർജ്ജന സമയത്ത് അമിതമായി ആയാസപ്പെടേണ്ടി വരിക, വേദന അനുഭവപ്പെടുക എന്നിവയാണ് മലബന്ധത്തിന്റെ പ്രധാന ലക്ഷണങ്ങൾ.

മലബന്ധത്തിനുള്ള കാരണങ്ങൾ
ഭക്ഷണത്തിലെ നാരുകളുടെ (Fiber) കുറവ്, ശരീരത്തിൽ ആവശ്യത്തിന് വെള്ളം ലഭിക്കാത്ത അവസ്ഥ, വ്യായാമക്കുറവ്, മാനസിക സമ്മർദ്ദം, ദിനചര്യയിലുണ്ടാകുന്ന മാറ്റങ്ങൾ എന്നിവയാണ് ഈ അവസ്ഥയ്ക്ക് വഴിയൊരുക്കുന്ന പ്രധാന ഘടകങ്ങൾ. കൂടാതെ, ചില മരുന്നുകളും മറ്റ് ആരോഗ്യപ്രശ്നങ്ങളും മലബന്ധത്തിന് കാരണമാകാം.

ഭക്ഷണക്രമം എങ്ങനെയായിരിക്കണം?
ജീവിതശൈലിയിലും ഭക്ഷണക്രമത്തിലും കൃത്യമായ മാറ്റങ്ങൾ വരുത്തിയാൽ മലബന്ധം ഒരു പരിധിവരെ നിയന്ത്രിക്കാനാകും. ഗ്യാസ്ട്രോഎൻട്രോളജിസ്റ്റ് സൗരഭ് സേഥി നിർദ്ദേശിക്കുന്നതനുസരിച്ച്, താഴെ പറയുന്ന ഭക്ഷണങ്ങൾ ഉൾപ്പെടുത്തുന്നത് ദഹനം മെച്ചപ്പെടുത്താനും മലം മൃദുവാക്കാനും സഹായിക്കും: * കിവിപ്പഴം
* ഫ്ളാക്സ് സീഡുകൾ
* മധുരക്കിഴങ്ങ്
* പ്ളം
* ചീര
* കാപ്പി
* ഓട്സ്
* പിയർ പഴം
* ചിയ സീഡ് അതേസമയം, മലബന്ധം വർദ്ധിപ്പിക്കുന്ന ഭക്ഷണങ്ങൾ ഒഴിവാക്കാനും ശ്രദ്ധിക്കണം.

ചീസ്, ചോക്ലേറ്റ്, എണ്ണയിൽ വറുത്ത ഭക്ഷണങ്ങൾ, മദ്യം, വൈറ്റ് ബ്രെഡ്, ഫാസ്റ്റ് ഫുഡ് തുടങ്ങിയവ ദഹനത്തിന് പ്രയാസമുണ്ടാക്കുകയും നാരുകൾ തീരെയില്ലാത്തതുമായ ഭക്ഷണങ്ങളാണ്. ഇവ നിയന്ത്രിക്കുന്നത് ദഹനവ്യവസ്ഥയുടെ സുഗമമായ പ്രവർത്തനത്തിന് അത്യന്താപേക്ഷിതമാണ്.