റഷ്യൻ ഡീസൽ ഇറക്കുമതി കരാർ: ട്രംപിന്റെ തീരുമാനത്തിനെതിരെ അമേരിക്കയിലും യുക്രെയ്നിലും പ്രതിഷേധം ശക്തം

റഷ്യയിൽ നിന്ന് അമേരിക്കയിലേക്കും ആഗോള വിപണിയിലേക്കും ലക്ഷക്കണക്കിന് ടൺ ഡീസൽ ഇന്ധനം ഇറക്കുമതി ചെയ്യാൻ അനുമതി നൽകിക്കൊണ്ട് അമേരിക്കൻ പ്രസിഡന്റ് ഡൊണാൾഡ് ട്രംപ് ഉണ്ടാക്കിയ ധാരണയ്ക്കെതിരെ വ്യാപക പ്രതിഷേധം ഉയരുന്നു. അമേരിക്കൻ വിപണിയിൽ ഇന്ധന വില നിയന്ത്രിക്കുന്നതിന്റെ ഭാഗമായാണ് ഈ നടപടിയെന്നാണ് വിശദീകരണമെങ്കിലും, ഇരു രാഷ്ട്രീയ പാർട്ടികളിലെയും പ്രമുഖ നേതാക്കൾ ഇതിനെതിരെ രംഗത്തുവന്നിട്ടുണ്ട്.

തീരുമാനം ഉടൻ പിൻവലിക്കണമെന്നാണ് റിപ്പബ്ലിക്കൻ പാർട്ടിയിലെ പ്രമുഖ നിയമനിർമ്മാതാക്കൾ ഉൾപ്പെടെയുള്ളവർ ആവശ്യപ്പെടുന്നത്. റഷ്യയുടെ യുക്രൈൻ അധിനിവേശത്തിന് പിന്നാലെ മോസ്കോയ്ക്ക് മേൽ അമേരിക്ക കനത്ത സാമ്പത്തിക ഉപരോധങ്ങൾ ഏർപ്പെടുത്തിയിരുന്നു.

ഇതിന്റെ ഭാഗമായി 2022-ൽ റഷ്യൻ ഊർജ്ജ ഉൽപ്പന്നങ്ങൾ ഇറക്കുമതി ചെയ്യുന്നത് കർശനമായി നിരോധിച്ച് അമേരിക്കൻ കോൺഗ്രസ് നിയമം പാസാക്കുകയും ചെയ്തിരുന്നു. എന്നാൽ നിലവിലെ ട്രംപിന്റെ പുതിയ നീക്കം ഈ സാമ്പത്തിക ഉപരോധങ്ങളുടെ വീര്യം കുറയ്ക്കുന്നതാണെന്നാണ് നിയമനിർമ്മാതാക്കളുടെ പ്രധാന വിലയിരുത്തൽ.

ആദ്യഘട്ടത്തിൽ മൂന്ന് ലക്ഷം ടൺ ഡീസൽ ഇറക്കുമതി ചെയ്യാനാണ് ധാരണയായിട്ടുള്ളത്. ഇതിനുപുറമേ നവംബർ മാസത്തിൽ അഞ്ച് ലക്ഷം ടൺ ഡീസലും, പിന്നാലെ പത്ത് ലക്ഷം ടൺ ഡീസലും അമേരിക്കയിലേക്ക് എത്തിക്കാനാണ് തീരുമാനം.

അതേസമയം, ട്രംപിന്റെ നടപടിക്കെതിരെ യുക്രൈൻ പ്രസിഡന്റ് വ്ലാദിമർ സെലൻസ്കിയും കടുത്ത വിമർശനവുമായി രംഗത്തെത്തി. തങ്ങളെയും കുട്ടികളെയും കൊന്നൊടുക്കി വ്ലാഡിമിർ പുടിന് പിറന്നാൾ സമ്മാനമൊരുക്കുന്ന തീരുമാനമാണിതെന്നാണ് അദ്ദേഹം വിശേഷിപ്പിച്ചത്.

ഊർജ്ജ വെടിനിർത്തൽ ട്രംപ് പ്രഖ്യാപിച്ചെങ്കിലും അത്തരം ഒരു കരാറിനെക്കുറിച്ച് മുൻകൂട്ടി അറിവില്ലായിരുന്നുവെന്നും യുക്രെയ്ൻ നേതൃത്വം വ്യക്തമാക്കി. റഷ്യൻ ഡീസൽ വിപണിയിൽ എത്തിക്കുന്നത് യുദ്ധം നീണ്ടുനിൽക്കാൻ മാത്രമേ ഉപകരിക്കൂവെന്നാണ് അവരുടെ നിലപാട്.

കോൺഗ്രസുമായി ആലോചിക്കുകയോ വ്യക്തമായ പരിശോധനകൾ നടത്തുകയോ ചെയ്യാതെ ട്രംപ് കോൺഗ്രസിന്റെ നിയമം ലംഘിച്ചുവെന്നാണ് സെനറ്റർ ഷഹീൻ ഉൾപ്പെടെയുള്ളവരുടെ ആരോപണം. റഷ്യയ്ക്കെതിരെ കർശന സാമ്പത്തിക നടപടികൾ തുടരേണ്ട

സമയത്ത് ഇത്തരമൊരു ഇന്ധനക്കരാർ ഉണ്ടാക്കുന്നത് പുടിന്റെ യുദ്ധതന്ത്രങ്ങൾക്ക് നേരിട്ട് സാമ്പത്തിക സഹായം നൽകുന്നതിന് തുല്യമാണെന്ന് സെനറ്റർ റിചാർഡ് ബ്ലൂമൻതാൽ അടക്കമുള്ള പ്രമുഖ അംഗങ്ങളും ചൂണ്ടിക്കാണിക്കുന്നു. ഈ തീരുമാനത്തെ പ്രതിരോധിക്കാൻ റൊണാൾഡ് റീഗൻന്റെ പേരിലുള്ള പുതിയൊരു ഉഭയകക്ഷി ബില്ല് കൊണ്ടുവരാൻ കോൺഗ്രസിലെ ഇരുപാർട്ടി അംഗങ്ങളും ആലോചിക്കുന്നുണ്ട്.

അന്താരാഷ്ട്ര തലത്തിലും അമേരിക്കൻ രാഷ്ട്രീയത്തിലും വലിയ പ്രത്യാഘാതങ്ങൾ സൃഷ്ടിക്കുന്ന ഈ ഇന്ധനക്കരാറിനെതിരെ ശക്തമായ നിയമപോരാട്ടത്തിനാണ് നിലവിൽ കളമൊരുങ്ങിയിരിക്കുന്നത്.