ബിഗ് ബോസ് മലയാളം സീസണ്‍ 8-ല്‍ പ്രേക്ഷകരെ ഞെട്ടിച്ചുകൊണ്ട് മറ്റൊരു പുറത്താക്കല്‍ കൂടി നടന്നിരിക്കുന്നു. അഗ്നിപരീക്ഷയിലൂടെ ഈ സീസണിലേക്ക് ആദ്യം പ്രവേശനം നേടിയ മത്സരാര്‍ത്ഥിയായ എല്‍ദോയാണ് അഞ്ചാം വാരത്തിലെ എവിക്ഷനിലൂടെ കളിമൈതാനത്തുനിന്ന് പടിയിറങ്ങിയത്.
ഈ സീസണിന്റെ മുഖ്യ ആകര്‍ഷണങ്ങളില്‍ ഒരാളായിരുന്നു അദ്ദേഹം. ഷോയിലേക്ക് എത്തിയ ഘട്ടത്തില്‍ത്തന്നെ ഒരു രാഷ്ട്രീയ നേതാവിനെ ഓര്‍മ്മിപ്പിക്കുന്ന തരത്തിലുള്ള വാക്ചാതുരിയാണ് എല്‍ദോ പ്രകടിപ്പിച്ചത്.
ആദ്യ ആഴ്ചകളില്‍ ഹൗസിനുള്ളില്‍ മികച്ച പേരുണ്ടാക്കാന്‍ ഇത് അദ്ദേഹത്തിന് തുണയായി. ജസീല ലീഡര്‍ ആയ ആദ്യ വാരത്തില്‍ പ്രതിപക്ഷ നേതാവിന്റെ വേഷം കെട്ടി കയ്യടി നേടിക്കൊണ്ടാണ് എല്‍ദോ തന്റെ സീസണ്‍ 8 യാത്രയ്ക്ക് തുടക്കം കുറിച്ചത്.
എന്നാല്‍ അഞ്ച് ആഴ്ചകള്‍ പിന്നിടുമ്പോള്‍ അദ്ദേഹത്തിന് മത്സരത്തില്‍ തുടരാനായില്ല. എല്‍ദോയെക്കൂടാതെ ഗൗതം ശശി, ഐശ്വര്യ, താഷി, വിക്കി തഗ്, ആസിഫ്, രാഹുല്‍ ഈശ്വര്‍, ഷിജിന്‍, കടല്‍ കൊമ്പന്‍ എന്നിവരും ഇത്തവണത്തെ നോമിനേഷന്‍ പട്ടികയില്‍ ഇടംപിടിച്ചിരുന്നു.
മത്സരാര്‍ത്ഥികളുടെ പേരുകള്‍ അടങ്ങിയ കാര്‍ഡുകള്‍ വേദിയില്‍ നിരത്തുകയും, ഓരോരുത്തരോടായി സ്വന്തം കാര്‍ഡുകള്‍ എടുത്ത് പരിശോധിക്കാന്‍ അവതാരകനായ മോഹന്‍ലാല്‍ ആവശ്യപ്പെടുകയും ചെയ്തു. ഓരോരുത്തരായി കാര്‍ഡ് തുറന്ന് സേവ്ഡ് എന്ന് എഴുതിയത് ഉറക്കെ വായിച്ചു.
ഒടുവില്‍ അവസാന ഘട്ടത്തില്‍ അവശേഷിച്ചത് ഗൗതം ശശിയും എല്‍ദോയുമായിരുന്നു. ആ നിമിഷത്തില്‍ മുഖത്ത് ഏറെ ആത്മവിശ്വാസം പ്രകടിപ്പിച്ചത് എല്‍ദോ ആയിരുന്നുവെങ്കിലും, പ്രേക്ഷകവിധി മറ്റൊന്നായിരുന്നു.
സീസണ്‍ 8-ന്റെ ഇതുവരെയുള്ള ചരിത്രത്തിലെ ഏറ്റവും അപ്രതീക്ഷിത പുറത്താക്കലുകളില്‍ ഒന്നായാണ് ഇത് വിലയിരുത്തപ്പെടുന്നത്. സാധാരണ എവിക്ഷനുകളില്‍ കാണാത്ത രീതിയില്‍, എല്‍ദോയിലുള്ള ഏതെങ്കിലും ഒരു പോസിറ്റീവ് കാര്യം പങ്കുവെക്കാന്‍ സഹമത്സരാര്‍ത്ഥികളോട് മോഹന്‍ലാല്‍ ആവശ്യപ്പെടുകയും, അവര്‍ അത് വ്യക്തമാക്കുകയും ചെയ്തു.
തലയുയര്‍ത്തിപ്പിടിച്ച് തന്റെ അരികിലേക്ക് വരാനാണ് ഒടുവില്‍ മോഹന്‍ലാല്‍ അദ്ദേഹത്തോട് നിര്‍ദ്ദേശിച്ചത്. തന്റെ യഥാര്‍ത്ഥ ബിഗ് ബോസ് പുറത്താണെന്നും ഇതൊരു തുടക്കം മാത്രമാണെന്നും വ്യക്തമാക്കി യാത്രാമൊഴി പറഞ്ഞാണ് എല്‍ദോ പടിയിറങ്ങിയത്.
കഴിഞ്ഞ ആഴ്ച നടന്ന കൂട്ട എവിക്ഷനില്‍ ശ്രീലക്ഷ്മി അറയ്ക്കല്‍ ഉള്‍പ്പെടെയുള്ള പ്രമുഖ മത്സരാര്‍ത്ഥികള്‍ പുറത്തുപോയിരുന്നു.
തുടര്‍ന്ന് എത്തിയ നാല് വൈല്‍ഡ് കാര്‍ഡ് എന്‍ട്രികളില്‍ ഒരാള്‍ സ്വന്തം തീരുമാനപ്രകാരം ഗെയിമില്‍ നിന്ന് പിന്മാറുകയും ചെയ്തിരുന്നു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
