ആലങ്ങാട് നീറിക്കോട്ടെ വീട്ടുമുറ്റത്ത് കംബോഡിയൻ കാട്ടുമുന്തിരിയുടെ വിസ്മയം; മൂന്ന് കിലോഗ്രാം വരെ ഭാരത്തിൽ കുലകൾ

ആലങ്ങാട് ഗ്രാമപഞ്ചായത്തിലെ നീറിക്കോട് പ്രദേശം ഇപ്പോൾ നാട്ടുകാരുടെ കൗതുകകേന്ദ്രമായി മാറിക്കഴിഞ്ഞു. പട്ടണംതറ പി.പി.

ജെസിയുടെ വീട്ടുപിറകിലെ മുന്തിരിച്ചെടിയിൽ കായ്ച്ചുനിൽക്കുന്നത് വൻകിട കുലകളാണ്.

ഒരുകുലയ്ക്ക് തന്നെ ഏകദേശം രണ്ടു മുതൽ മൂന്നു കിലോഗ്രാം വരെ ഭാരമുണ്ട്. മേത്താനത്തെ ഒരു നഴ്സറിയിൽ നിന്നാണ് ജെസ് ഈ കംബോഡിയൻ കാട്ടുമുന്തിരിയുടെ തൈ സ്വന്തമാക്കിയത്.

മുൻപ് ചെടിക്ക് കേടുപാടുകൾ സംഭവിച്ചതിനെത്തുടർന്ന് ഒരു വർഷം മുൻപ് ഇത് പൂർണ്ണമായി വെട്ടിക്കളഞ്ഞിരുന്നു. എന്നാൽ അതിനുശേഷം തനിയെ കിളിർത്തു വന്ന പുതിയ ചെടിയാണ് ഇപ്പോൾ അതിശയകരമായ രീതിയിൽ കായ്ച്ചുനിൽക്കുന്നത്.

ഈ പ്രത്യേകതരം മുന്തിരിയുടെ വളർച്ചയും കായ്ഫലവും ഏറെ കൗതുകകരമാണ്. പൂക്കൾ വിരിഞ്ഞ് കായ്കൾ രൂപപ്പെടുന്നതിന് അനുസരിച്ച് കുലകൾ കൂടുതൽ നീളത്തിൽ വളരുകയും, അതോടൊപ്പം പുതിയ പൂക്കൾ വീണ്ടും ഉണ്ടാവുകയും ചെയ്യുന്നതാണ് ഇതിന്റെ പ്രത്യേകത.

നന്നായി പഴുത്തുപാകമാകുന്ന ഈ മുന്തിരിക്ക് പുളിരസം വളരെ കുറവാണെന്നും വീട്ടുകാർ വ്യക്തമാക്കുന്നു.