സ്തനാർബുദ പ്രതിരോധം അടുക്കളയിൽ നിന്ന്; ഭക്ഷണക്രമത്തിൽ ഉൾപ്പെടുത്തേണ്ട പ്രധാന ആഹാരങ്ങൾ

വനിതകളിൽ കണ്ടുവരുന്ന ഏറ്റവും വ്യാപ്തിയേറിയ അർബുദങ്ങളിൽ പ്രധാനപ്പെട്ട ഒന്നാണ് സ്തനാർബുദം.

സ്തനത്തിലെ കോശങ്ങൾ അനാരോഗ്യകരമായ രീതിയിൽ അനിയന്ത്രിതമായി വളർന്നു ട്യൂമർ രൂപപ്പെടുന്ന ഒരു അവസ്ഥയാണിത്. സ്തനാർബുദം തടയുന്നതിലും രോഗസാധ്യത ലഘൂകരിക്കുന്നതിലും ആരോഗ്യകരമായ ഭക്ഷണക്രമത്തിന് അതീവ പ്രാധാന്യമുണ്ട്.

ഈ മാരക രോഗത്തെ പ്രതിരോധിക്കാൻ ഡയറ്റിൽ ഉൾപ്പെടുത്തേണ്ട ചില പ്രധാന ആഹാരങ്ങളെക്കുറിച്ചറിയാം.

ആന്റിഓക്‌സിഡന്റുകളാലും കാറ്റെച്ചിനുകളാലും സമ്പന്നമായ ഗ്രീൻ ടീ ശരീരത്തിന്റെ മെറ്റബോളിസം വർദ്ധിപ്പിക്കാനും സ്തനാർബുദം പോലുള്ള രോഗങ്ങളുടെ സാധ്യത കുറയ്ക്കാനും ഏറെ ഫലപ്രദമാണ്. ദിവസവും ഗ്രീൻ ടീ കുടിക്കുന്നത് ഡിഎൻഎയെ സംരക്ഷിക്കുന്നതിന് പുറമെ, ശരീരഭാരം കുറയ്ക്കാനും രക്തസമ്മർദ്ദം നിയന്ത്രണവിധേയമായി നിലനിർത്താനും സഹായിക്കും.

അതുപോലെ, സ്തനാർബുദം പോലുള്ള ആരോഗ്യ പ്രശ്നങ്ങളെ അകറ്റി നിർത്താൻ ബ്രൊക്കോളി മികച്ചൊരു പച്ചക്കറിയാണ്. ശരീരത്തിലെ ക്യാൻസർ കോശങ്ങളുടെ അസാധാരണമായ വളർച്ചയെ നിയന്ത്രിക്കുന്ന ‘സൾഫോറാഫെയ്ൻ’ (sulforaphane) എന്ന സംയുക്തം ബ്രോക്കോളിയിൽ ധാരാളമായി അടങ്ങിയിട്ടുണ്ട്.

ഇത് സ്തനം, പ്രോസ്റ്റേറ്റ്, മൂത്രസഞ്ചി, ശ്വാസകോശം എന്നിവയെ ബാധിക്കുന്ന ക്യാൻസർ കോശങ്ങളുടെ വളർച്ചയെ തടയാൻ സഹായിക്കുന്നു. ഭക്ഷണത്തിൽ കൂൺ ഉൾപ്പെടുത്തുന്നത് സ്തനാർബുദ സാധ്യത ഗണ്യമായി കുറയ്ക്കാൻ സഹായിക്കുമെന്ന് പഠനങ്ങൾ വ്യക്തമാക്കുന്നു.

ദിവസവും 10 ഗ്രാം കൂൺ മാത്രം ഭക്ഷണത്തിൽ ഉൾപ്പെടുത്തുന്ന സ്ത്രീകളിൽ സ്തനാർബുദ സാധ്യത മൂന്നിൽ രണ്ട് ഭാഗം കുറവാണെന്നാണ് കണ്ടെത്തൽ. പാകം ചെയ്ത തക്കാളിയിൽ അടങ്ങിയിരിക്കുന്ന ‘ലൈക്കോപീൻ’ എന്ന ശക്തമായ ആന്റിഓക്‌സിഡന്റിന് സ്തനാർബുദത്തെ പ്രതിരോധിക്കാൻ സ്ത്രീകൾക്ക് സഹായകരമാകാൻ കഴിയും.

ശരീരത്തിൽ ലൈക്കോപീന്റെ അളവ് ഉയർന്ന തോതിലുള്ള സ്ത്രീകൾക്ക് സ്തനാർബുദം ബാധിക്കാനുള്ള സാധ്യത 22 ശതമാനം കുറവാണെന്നാണ് ഗവേഷണങ്ങൾ സൂചിപ്പിക്കുന്നത്. കാപ്പിയിലുള്ള കഫീനും ആന്റിഓക്‌സിഡന്റുകളും സ്തനാർബുദ സാധ്യത കുറയ്ക്കാൻ സഹായിക്കുന്ന ഘടകങ്ങളാണ്.

കാപ്പിയിലെ ആന്റിഓക്‌സിഡന്റുകൾ, ക്യാൻസറിന് കാരണമായേക്കാവുന്ന കോശങ്ങളുടെ കേടുപാടുകളിൽ നിന്ന് സംരക്ഷണം നൽകുന്നു. കൂടാതെ, സ്തനാർബുദ സാധ്യത കുറയ്ക്കുന്നതുമായി ബന്ധമുള്ള ‘കരോട്ടിനോയിഡുകൾ’ എന്ന ആന്റിഓക്‌സിഡന്റ് കാററ്റിൽ ധാരാളമായി അടങ്ങിയിട്ടുണ്ട്.

ശരീരത്തിൽ കരോട്ടിനോയിഡുകളുടെ അളവ് കൂടുതലായിരിക്കുന്നത് സ്തനാർബുദ സാധ്യത 28 ശതമാനം വരെ കുറയ്ക്കുന്നതുമായി ബന്ധപ്പെട്ടിരിക്കുന്നു.