ഇടുക്കിയിൽ ഇറച്ചി വ്യാപനം പ്രതിസന്ധിയിൽ: കടകൾ അനിശ്ചിതകാലത്തേക്ക് അടച്ചിടാൻ വ്യാപാരികളുടെ തീരുമാനം

ഇടുക്കി ജില്ലയിൽ കന്നുകാലികളുടെ ലഭ്യത ഗണ്യമായി കുറഞ്ഞതോടെ ബീഫ് വിപണി കടുത്ത പ്രതിസന്ധിയിലേക്ക്. കന്നുകാലികളെ ലഭിക്കാത്ത സാഹചര്യത്തിൽ ജില്ലയിലെ ഇറച്ചിക്കടകൾ വെള്ളിയാഴ്ച മുതൽ അനിശ്ചിതകാലത്തേക്ക് അടച്ചിടുമെന്ന് വ്യാപാരി സംഘടനകൾ അറിയിച്ചു.

നിലവിലെ സാഹചര്യത്തിൽ വ്യാപാരം തുടർന്നു കൊണ്ടുപോകാൻ സാധിക്കാത്ത അവസ്ഥയാണെന്ന് വ്യാപാരികൾ ചൂണ്ടിക്കാട്ടുന്നു. കേരളത്തിലേക്ക് ആവശ്യമായ കന്നുകാലികളിൽ ഭൂരിഭാഗവും എത്തുന്നത് വടക്കേ ഇന്ത്യൻ സംസ്ഥാനങ്ങളിൽ നിന്നാണ്.

എന്നാൽ, അന്തർസംസ്ഥാന ചരക്കു നീക്കത്തിൽ നേരിടുന്ന തടസ്സങ്ങളും ചെലവ് വർധനവും കച്ചവടത്തെ സാരമായി ബാധിച്ചിട്ടുണ്ട്. ഒരു ലോഡ് കന്നുകാലികളെ എത്തിക്കാൻ ലക്ഷങ്ങളാണ് ചെലവാകുന്നത്.

ഗോശാലാ ഫീസും അതിർത്തികളിലെ പിരിവുകളും തീറ്റച്ചെലവും ചേരുമ്പോൾ കിലോയ്ക്ക് 450 രൂപയ്ക്ക് മുകളിൽ വില നൽകേണ്ടി വരുന്നു. ആനന്ദ് സാബു (ഇറച്ചി വ്യാപാരി, ഇരട്ടയാർ) പറയുന്നു: “മറ്റു സംസ്ഥാനങ്ങളിൽ നിന്ന് മാടുകൾ വരാതായതോടെ വിൽപനവില ഇരട്ടിയായി.

ഉയർന്ന വിലയ്ക്ക് മാട് വാങ്ങി കച്ചവടം നടത്തുമ്പോൾ വിൽപനവിലയെക്കാൾ അധികമാണ് ചെലവ്. ഇത്തരത്തിൽ അധിക നാൾ കച്ചവടം ചെയ്യാനാകില്ല.

കടക്കെണിയിലായ കച്ചവടക്കാർ പലരും ഇതിനോടകം തന്നെ വ്യാപാരം ഉപേക്ഷിച്ചു.” നിലവിൽ 500 രൂപയ്ക്ക് മുകളിൽ വില ഈടാക്കുന്നത് സാധാരണക്കാർക്ക് താങ്ങാനാവില്ലെന്ന് വ്യാപാരികൾ സമ്മതിക്കുന്നു. മുൻപ് നാലോ അഞ്ചോ കന്നുകാലികളെ വെട്ടിയിരുന്ന സ്ഥാനത്ത് ഇന്ന് ഒരെണ്ണം പോലും വിറ്റഴിക്കാൻ കഴിയാത്ത അവസ്ഥയാണുള്ളത്.

പ്രതിസന്ധികൾക്ക് പിന്നിലെ കാരണങ്ങൾ
വടക്കൻ സംസ്ഥാനങ്ങളിൽ നിന്ന് ഉരുക്കളുമായി എത്തുന്ന വാഹനങ്ങൾ ഗോശാലകളിലേക്ക് മാറ്റുന്നതാണ് പ്രധാന വെല്ലുവിളി. ആരോഗ്യ സർട്ടിഫിക്കറ്റ് നൽകുന്നത് ആന്ധ്രാപ്രദേശ് ഉൾപ്പെടെയുള്ള സംസ്ഥാനങ്ങൾ നിർത്തിയതോടെ കന്നുകാലികളെ വാഹനങ്ങളിൽ നിന്ന് ഇറക്കി ഗോശാലകളിലേക്ക് മാറ്റുന്നത് വ്യാപകമായിരിക്കുകയാണ്.

ഇത്തരം സാഹചര്യങ്ങളിൽ 30 ദിവസം വരെ വാഹനങ്ങൾ പിടിച്ചുവെക്കാറുണ്ട്. ഓരോ ദിവസവും ഒരു ഉരുവിന് 250 രൂപ വീതം പിഴ ഈടാക്കുകയും ചെയ്യുന്നു.

35 കന്നുകാലികളുള്ള ഒരു ലോറി തിരികെ ലഭിക്കാൻ ഏകദേശം മൂന്ന് ലക്ഷം രൂപയോളം അധികമായി ചെലവാക്കേണ്ടി വരുന്നു. ഇതിനുപുറമെ ജില്ലാ-സംസ്ഥാന അതിർത്തികളിലെ പിരിവുകളും വ്യാപാരികൾക്ക് ബാധ്യതയാകുന്നു.

സുബൈർ (ഇറച്ചി വ്യാപാരി, തൊടുപുഴ) വ്യക്തമാക്കുന്നത് ഇങ്ങനെ: “ഇറച്ചി വ്യാപാരികൾ നേരിടുന്ന പ്രതിസന്ധികൾ ചൂണ്ടിക്കാണിച്ച് മുഖ്യമന്ത്രിക്ക് നിവേദനം നൽകിയിരുന്നു. അനുകൂല നടപടിയുണ്ടാകുമെന്ന് ഉറപ്പു ലഭിച്ചിട്ടുണ്ട്.

മറ്റു സംസ്ഥാനങ്ങളിലെ അധികാരികളുമായി ധാരണയിലെത്തി ഇറച്ചി വ്യാപാര മേഖലയിലെ പ്രശ്നങ്ങളിൽ പരിഹാരമുണ്ടാക്കുമെന്നാണ് പ്രതീക്ഷ.” വ്യാപാരികൾക്കും ജനങ്ങൾക്കും ഒരുപോലെ ഗുണകരമാകുന്ന രീതിയിൽ സർക്കാർ അടിയന്തര ഇടപെടൽ നടത്തണമെന്നാണ് വ്യാപാരികളുടെ ആവശ്യം.