കൊച്ചി മെട്രോ റെയിൽ ലിമിറ്റഡ് (കെഎംആർഎൽ) നടപ്പിലാക്കുന്ന കൊച്ചി മെട്രോയുടെ രണ്ടാംഘട്ട നിർമാണ പ്രവർത്തനങ്ങൾ 2027 ഓഗസ്റ്റോടെ പൂർത്തിയാക്കി കമ്മീഷൻ ചെയ്യാൻ ലക്ഷ്യമിടുന്നു.
ഇതിനായി അടുത്ത വർഷം ജൂണോടെ നിർമാണ പ്രവൃത്തികൾ പൂർത്തിയാക്കാനാണ് അധികൃതരുടെ തീരുമാനം. നേരത്തെ 2026 ഡിസംബറിൽ പദ്ധതി കമ്മീഷൻ ചെയ്യാനായിരുന്നു കെഎംആർഎൽ പദ്ധതിയിട്ടിരുന്നത്.
എന്നാൽ, വിവിധ സാങ്കേതികവും അനിവാര്യവുമായ കാരണങ്ങളാൽ പദ്ധതിയുടെ സമയക്രമത്തിൽ മാറ്റം വരുത്തുകയായിരുന്നു. കലൂർ ജവഹർലാൽ നെഹ്റു സ്റ്റേഡിയം മുതൽ കാക്കനാട് ഇൻഫോപാർക്ക് വരെയുള്ള 10.58 കിലോമീറ്റർ ദൂരത്തിലാണ് ഈ രണ്ടാംഘട്ട
പാത നിർമിക്കുന്നത്. ആകെ 10 സ്റ്റേഷനുകളാണ് ഇതിൽ ഉൾപ്പെടുന്നത്.
പദ്ധതി വൈകിയതിന് പിന്നിലെ പ്രധാന കാരണമായി കെഎംആർഎൽ ചൂണ്ടിക്കാട്ടുന്നത് ഏഷ്യൻ ഇൻഫ്രാസ്ട്രക്ചർ ഇൻവെസ്റ്റ്മെൻ്റ് ബാങ്കിൽനിന്ന് 1116 കോടി രൂപ വായ്പ ലഭിക്കുന്നതിലുണ്ടായ കാലതാമസമാണ്. കൂടാതെ ഭൂമി ഏറ്റെടുക്കലുമായി ബന്ധപ്പെട്ട
നിയമനടപടികളും നിർമാണ പുരോഗതിയെ ബാധിച്ചു. 2024 ഡിസംബറിൽ ആരംഭിച്ച ഭൂമി ഏറ്റെടുക്കൽ നടപടികൾ കോടതി വ്യവഹാരങ്ങളെത്തുടർന്ന് 2026 മാർച്ച് വരെ നീളുകയായിരുന്നു.
ഇതിനുപുറമെ, പൈപ്പ്ലൈൻ ജങ്ഷൻ മുതൽ പടമുഗൾ വരെയുള്ള ഭാഗങ്ങളിൽ ഇന്ത്യൻ ഓയിൽ അദാനി ഗ്യാസ് പൈപ്പ്ലൈൻ കടന്നുപോകുന്നത് നിർമാണ പ്രവൃത്തികൾക്ക് വെല്ലുവിളിയായി. നിലവിൽ പദ്ധതിയുടെ പുരോഗതി സംബന്ധിച്ച് കെഎംആർഎൽ വിശദീകരിക്കുന്നതനുസരിച്ച്, പൈലിങ്, പൈൽ ക്യാപ് നിർമാണം ഉൾപ്പെടെയുള്ള ഫൗണ്ടേഷൻ ജോലികൾ പൂർത്തിയായിട്ടുണ്ട്.
വയഡക്ട് പൈലിങ് പ്രവൃത്തിയുടെ 85 ശതമാനവും പൂർത്തിയായതായും നിലവിൽ പ്രതിദിനം 25 മുതൽ 30 മീറ്റർ വരെ ദൂരത്തിൽ നിർമാണം മുന്നേറുന്നതായും അധികൃതർ വ്യക്തമാക്കി. മഴക്കാലം അവസാനിക്കുന്നതോടെ നിർമാണ പ്രവർത്തനങ്ങളുടെ വേഗത വർധിപ്പിക്കാൻ സാധിക്കുമെന്ന പ്രതീക്ഷയിലാണ് കെഎംആർഎൽ.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
