പാകിസ്ഥാനിലെ പ്രക്ഷുബ്ധമായ ബലൂചിസ്ഥാൻ പ്രവിശ്യയിൽ കഴിഞ്ഞ ഒരാഴ്ചയ്ക്കിടെയുണ്ടായ വിവിധ ആക്രമണങ്ങളിൽ 52 പാകിസ്ഥാൻ സൈനികർ കൊല്ലപ്പെട്ടതായി ബലൂച് ലിബറേഷൻ ആർമി (ബി.എൽ.എ) അവകാശപ്പെട്ടു. സെപ്റ്റംബർ ഒന്ന് മുതൽ ഏഴ് വരെയുള്ള കാലയളവിൽ നടത്തിയ 28 വ്യത്യസ്ത ഓപ്പറേഷനുകളിലാണ് ഇത്രയധികം സൈനികരെ വധിച്ചതെന്നാണ് സംഘടനയുടെ ഔദ്യോഗിക വിശദീകരണം.
ഈ സായുധ ഏറ്റുമുട്ടലുകളിൽ നിരവധി പാക് സൈനികർക്ക് പരിക്കേറ്റിട്ടുണ്ടെന്നും റിപ്പോർട്ടിൽ വ്യക്തമാക്കുന്നുണ്ട്. പസ്നി, ഖറാൻ, കലാത്, തുർബത്ത്, മസ്തുങ്, സുറാബ്, ടുംബ്, പിഷിൻ, ഝാൽ മാഗ്സി, നോഷ്കി, ചഗായ്, ക്വറ്റ തുടങ്ങിയ മേഖലകളിലാണ് പാകിസ്ഥാൻ സുരക്ഷാ സേനയ്ക്ക് നേരെ ശക്തമായ ആക്രമണങ്ങൾ അഴിച്ചുവിട്ടതെന്ന് ബി.എൽ.എ വക്താവ് ജീയാന്ദ് ബലൂച് പ്രസ്താവനയിലൂടെ അറിയിച്ചു.
അതേസമയം, പാക് സൈന്യവുമായുള്ള കനത്ത പോരാട്ടത്തിനിടയിൽ തങ്ങളുടെ 12 അംഗങ്ങൾ കൊല്ലപ്പെട്ടതായും സംഘടനയുടെ ഔദ്യോഗിക പ്രസ്താവനയിൽ സമ്മതിക്കുന്നുണ്ട്. എന്നാൽ, ബി.എൽ.എ പുറത്തുവിട്ട
കണക്കുകളോ അവകാശവാദങ്ങളോ സ്വതന്ത്ര മാധ്യമങ്ങളോ വാർത്താ ഏജൻസികളോ ഇതുവരെ ഔദ്യോഗികമായി സ്ഥിരീകരിച്ചിട്ടില്ല. ഇതിനിടെ, സെപ്റ്റംബർ ആറ്, ഏഴ് തീയതികളിൽ ഖറാൻ, വാഷുക് ജില്ലകളിൽ സുരക്ഷാ സേന നടത്തിയ പ്രത്യാക്രമണത്തിൽ 11 ബി.എൽ.എ അംഗങ്ങളെ വധിച്ചതായി പാകിസ്ഥാൻ സൈന്യവും അവകാശപ്പെട്ടിട്ടുണ്ട്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
