കേരള ബാങ്കിന്റെ പ്രസക്തിയിൽ പുനരാലോചനയുമായി സർക്കാർ; ജില്ലാ ബാങ്കുകളുടെ തിരിച്ചുവരവ് ചർച്ചയാകുന്നു

സംസ്ഥാന സഹകരണ മേഖലയിൽ നിലവിൽ പ്രവർത്തിക്കുന്ന കേരള ബാങ്ക് സംവിധാനം ഒഴിവാക്കി, പഴയ രീതിയിലുള്ള ജില്ലാ സഹകരണ ബാങ്കുകൾ പുനഃസ്ഥാപിക്കുന്നതിനെക്കുറിച്ച് സർക്കാർ തലത്തിൽ ഗൗരവമായ ആലോചനകൾ നടക്കുന്നു. ഒന്നാം പിണറായി സർക്കാരിന്റെ കാലത്ത് രൂപീകരിക്കപ്പെട്ട

ഈ സംവിധാനം സഹകരണ മേഖലയ്ക്ക് ഗുണകരമാകുന്നതിന് പകരം വലിയ പ്രതിസന്ധിയാണ് സൃഷ്ടിച്ചതെന്ന് സഹകാരികൾക്കിടയിൽ വലിയൊരു വിഭാഗം അഭിപ്രായപ്പെടുന്നു. ത്രിതല ബാങ്കിങ് സംവിധാനത്തിലെ മാറ്റം മുൻപ് കേരളത്തിൽ നിലനിന്നിരുന്ന പ്രൈമറി സഹകരണ സംഘങ്ങൾ, ജില്ലാ ബാങ്കുകൾ, സംസ്ഥാന സഹകരണ ബാങ്ക് എന്നിങ്ങനെ തരംതിരിച്ചിരുന്ന ത്രിതല ബാങ്കിങ് ഘടനയിൽ 2019-ലാണ് സമൂലമായ മാറ്റങ്ങൾ വരുത്തിയത്.

ജില്ലാ ബാങ്കുകളെ സംസ്ഥാന ബാങ്കുമായി ലയിപ്പിച്ചുകൊണ്ട് കേരള ബാങ്ക് നിലവിൽ വന്നപ്പോൾ, വായ്പകൾക്ക് കുറഞ്ഞ പലിശയും നിക്ഷേപങ്ങൾക്ക് ഉയർന്ന പലിശയും ലഭിക്കുമെന്നായിരുന്നു വാഗ്ദാനം നൽകപ്പെട്ടിരുന്നത്. എന്നാൽ പ്രായോഗികതലത്തിൽ ഈ ആനുകൂല്യങ്ങളൊന്നും സാധാരണക്കാർക്കും പ്രാഥമിക സംഘങ്ങൾക്കും ലഭിച്ചില്ലെന്ന് യുഡിഎഫ് അനുകൂല സഹകാരികൾ ആരോപിക്കുന്നു.

പ്രതിസന്ധികളും കരുവന്നൂർ വിഷയവും പഴയ സംവിധാനത്തിൽ പ്രാഥമിക സഹകരണ സംഘങ്ങൾക്ക് എന്തെങ്കിലും സാമ്പത്തിക പ്രതിസന്ധികൾ ഉണ്ടായാൽ തണലായി നിൽക്കാൻ ജില്ലാ ബാങ്കുകൾക്ക് സാധിക്കുമായിരുന്നു. എന്നാൽ കേരള ബാങ്ക് രൂപീകരണത്തോടെ റിസർവ് ബാങ്കിന്റെ കർശന നിയന്ത്രണങ്ങളിലേക്ക് കാര്യങ്ങൾ നീങ്ങുകയും, സ്വതന്ത്രമായി ഇടപെടാനുള്ള അവസരം നഷ്ടപ്പെടുകയും ചെയ്തു.

ഇത് പല ജില്ലകളിലെയും പ്രാഥമിക സഹകരണ സംഘങ്ങളുടെ പ്രവർത്തനത്തെ പ്രതികൂലമായി ബാധിച്ചു. കരുവന്നൂർ ഉൾപ്പെടെയുള്ള വിഷയങ്ങളിൽ നിക്ഷേപകർക്ക് പണം നഷ്ടപ്പെട്ട

സാഹചര്യത്തിൽ, ജില്ലാ ബാങ്കുകൾ നിലനിന്നിരുന്നെങ്കിൽ ഈ പ്രതിസന്ധികൾ ഒഴിവാക്കാമായിരുന്നുവെന്നും സഹകരണ മേഖലയുടെ വിശ്വാസ്യത തിരിച്ചുപിടിക്കാൻ പഴയ സംവിധാനം അനിവാര്യമാണെന്നുമാണ് ഇവരുടെ വാദം. കൂടാതെ, പ്രാഥമിക സംഘങ്ങളുമായി മത്സരിച്ച് കേരള ബാങ്ക് ബിസിനസ് നടത്തുന്നത് സഹകരണ മേഖലയുടെ തനിമയെ ബാധിക്കുന്നുണ്ടെന്നും വിമർശനമുണ്ട്.

അതേസമയം, റിസർവ് ബാങ്കിന്റെ ഔദ്യോഗിക അനുമതിയോടെ 13 ജില്ലാ ബാങ്കുകളെ ലയിപ്പിച്ച് രൂപീകരിച്ച കേരള ബാങ്കിൽ നിന്ന് പിന്നോട്ടുള്ള ഒരു മാറ്റം പ്രായോഗികമല്ലെന്നാണ് നിലവിലെ ഭരണനേതൃത്വത്തിന്റെ നിലപാട്. ഇത്തരം ഒരു തിരിച്ചുപോക്ക് സഹകരണ മേഖലയെ വർഷങ്ങളോളം പിന്നോട്ട് നയിക്കുമെന്നും ഇവർ മുന്നറിയിപ്പ് നൽകുന്നു.