മധ്യപ്രദേശിൽ ഭാര്യയുടെ സ്വഭാവദൂഷ്യം ആരോപിച്ചു കുടുംബവഴക്ക്; ഭാര്യാപിതാവിനെ മഴുകൊണ്ട് വെട്ടിക്കൊന്നു

ഭാര്യയുടെ സ്വഭാവത്തെച്ചൊല്ലിയുണ്ടായ തർക്കത്തെ തുടർന്ന് മധ്യപ്രദേശിൽ ക്രൂരകൃത്യം. ഭാര്യാപിതാവിനെ യുവാവ് മഴുകൊണ്ട് വെട്ടിക്കൊലപ്പെടുത്തി.

ആക്രമണത്തിനിടയിൽ ശബ്ദം കേട്ട് എത്തിയ ഭാര്യാസഹോദരിയെയും പ്രതി വെട്ടിപ്പരുക്കേൽപ്പിച്ചു. ഗുരുതരമായി പരുക്കേറ്റ യുവതിയെ ആശുപത്രിയിൽ പ്രവേശിപ്പിച്ചു.

മധ്യപ്രദേശിലെ ദാമോ ജില്ലയിലെ പിപ്രൗധ ഗ്രാമത്തിൽ തിങ്കളാഴ്ച പുലർച്ചെ നാലു മണിയോടെയാണ് ഈ ദാരുണ സംഭവം അരങ്ങേറിയത്. അതിക്രമത്തിന് ശേഷം മുഖ്യപ്രതി രാംപ്രസാദ് റായ്ക്വാർ സംഭവസ്ഥലത്തുനിന്ന് ഒളിവിൽ പോവുകയായിരുന്നുവെന്ന് അധികൃതർ വ്യക്തമാക്കി.

പ്രതിയായ രാംപ്രസാദ് റായ്ക്വാർ തന്റെ ഭാര്യ രശ്മിയെ നിരന്തരം സംശയിച്ചിരുന്നുവെന്നും ഇതേച്ചൊല്ലി ഇരുവരും തമ്മിൽ നിരന്തരം വഴക്കിടുന്നത് പതിവായിരുന്നുവെന്നും പൊലീസ് സൂപ്രണ്ട് ആനന്ദ് കലഡ്ഗി മാധ്യമങ്ങളോട് പറഞ്ഞു. ഏതാനും മാസങ്ങൾക്ക് മുൻപ് ദമ്പതികൾ ജോലിക്കായി മുംബൈയിലേക്ക് കുടിയേറിയിരുന്നു.

എന്നാൽ അവിടെയെത്തിയപ്പോഴും തർക്കങ്ങൾ തുടർന്നതോടെ രശ്മി ബമോരി ഗ്രാമത്തിലുള്ള ഭർതൃവീട്ടിലേക്ക് തന്നെ മടങ്ങിയെത്തി. നാട്ടിൽ തിരിച്ചെത്തിയ ശേഷവും പ്രതി പ്രശ്നങ്ങൾ തുടർന്നതിനെ തുടർന്ന്, കുടുംബാംഗങ്ങളുടെ ഉപദേശപ്രകാരം രണ്ട് ദിവസം മുൻപ് രശ്മി പിപ്രൗധയിലുള്ള സ്വന്തം മാതാപിതാക്കളുടെ അടുത്തേക്ക് പോവുകയായിരുന്നു.

തുടർന്ന് ഞായറാഴ്ച മദ്യലഹരിയിൽ ഭാര്യയുടെ വീട്ടിലെത്തിയ പ്രതി അവിടെവച്ച് വലിയ ബഹളമുണ്ടാക്കിയ ശേഷം താൽക്കാലികമായി മടങ്ങിപ്പോകുകയായിരുന്നു. എന്നാൽ തൊട്ടടുത്ത ദിവസം പുലർച്ചെ നാലു മണിയോടെ വീണ്ടും തിരികെയെത്തിയ രാംപ്രസാദ് റായ്ക്വാർ, ആ സമയത്ത് ഉറങ്ങിക്കിടക്കുകയായിരുന്ന 65 വയസ്സുകാരനായ ഭാര്യാപിതാവ് രമേഷ് റായ്ക്വാറിനെ കയ്യിലുണ്ടായിരുന്ന മഴു ഉപയോഗിച്ച് വെട്ടിക്കൊലപ്പെടുത്തുകയായിരുന്നു.

ഈ ആക്രമണത്തിനിടയിലെ ശബ്ദം കേട്ട് ഉണർന്നെത്തിയ ഭാര്യയുടെ സഹോദരി തടയാൻ ശ്രമിച്ചെങ്കിലും പ്രതി അവരെയും ക്രൂരമായി ആക്രമിക്കുകയായിരുന്നു. കൃത്യം നടത്തിയ ശേഷം സംഭവസ്ഥലത്തുനിന്ന് രക്ഷപ്പെട്ട

രാംപ്രസാദിനായി ശക്തമായ തിരച്ചിൽ തുടരുകയാണെന്ന് പൊലീസ് അറിയിച്ചു.