ഉലകനായകന്റെ പുതിയ ചിത്രം ‘സാണ്ടിയാർ’ ഫസ്റ്റ് ലുക്ക് പോസ്റ്റർ പുറത്തിറങ്ങി

തെന്നിന്ത്യൻ സിനിമാലോകം ഏറെ പ്രതീക്ഷയോടെ കാത്തിരിക്കുന്ന പുതിയ ചിത്രത്തിന്റെ പ്രഖ്യാപനവുമായി അണിയറപ്രവർത്തകർ എത്തി. ഉലകനായകൻ കമൽഹാസൻ നായകനായി എത്തുന്ന പുതിയ തമിഴ് ചിത്രം ‘സാണ്ടിയാർ’ ഔദ്യോഗിക ഫസ്റ്റ് ലുക്ക് പോസ്റ്റർ പുറത്തുവിട്ടു.

സിനിമാപ്രേമികൾക്കിടയിൽ വലിയ ചർച്ചയായി മാറിയിരിക്കുന്ന ഈ ചിത്രം സംവിധാനം ചെയ്യുന്നത് എസ്.യു. അരുൺകുമാർ ആണ്.

രാജ്കമൽ ഫിലിംസ് ഇന്റർനാഷണൽ, ടർമറിക് മീഡിയ എന്നീ ബാനറുകളുടെ സഹകരണത്തിൽ ഒരുങ്ങുന്ന ഈ ബിഗ് ബജറ്റ് ചിത്രം നിർമ്മിക്കുന്നത് കമൽ ഹാസൻ, ആർ. മഹേന്ദ്രൻ എന്നിവർ ചേർന്നാണ്.

ചിത്രത്തിന്റെ സഹനിർമ്മാതാവ് എസ്. ഡിസ്നി ആണ്.

പതിവ് ശൈലിയിൽ നിന്നും തികച്ചും വ്യത്യസ്തമായ ഒരു പരുക്കൻ ഗെറ്റപ്പിലാണ് പോസ്റ്ററിൽ താരം പ്രത്യക്ഷപ്പെട്ടിരിക്കുന്നത്. നരച്ച മുടിയും താടിയും അതീവ ഗൗരവമേറിയ ഭാവവുമുള്ള ലുക്ക് ആരാധകരുടെ ശ്രദ്ധ പിടിച്ചുപറ്റിയിട്ടുണ്ട്.

പഴയൊരു വാഹനത്തിന്റെ വാതിലിൽ ചാരിയിരിക്കുന്നതും കൈയിൽ തോക്കേന്തിയതുമായ രീതിയിലാണ് പോസ്റ്റർ ഡിസൈൻ ചെയ്തിരിക്കുന്നത്. വാഹനത്തിന്റെ വാതിലിലെ രക്തക്കറകൾ ചിത്രത്തിന്റെ ആക്ഷൻ പശ്ചാത്തലത്തെക്കുറിച്ചുള്ള വ്യക്തമായ സൂചനകളാണ് നൽകുന്നത്.

കമൽ ഹാസന്റെ ശക്തമായ കഥാപാത്രത്തെയാണ് ചിത്രം വരച്ചുകാട്ടുന്നത്. ‘ചിത്ത’, ‘വീര ധീര സൂരൻ’ തുടങ്ങിയ ശ്രദ്ധേയമായ സിനിമകളിലൂടെ തന്റേതായ ഇടം കണ്ടെത്തിയ സംവിധായകനാണ് എസ്.യു.

അരുൺകുമാർ. വ്യത്യസ്തമായ പ്രമേയങ്ങളും ശക്തമായ ആഖ്യാനശൈലിയും കൊണ്ടു ശ്രദ്ധേയനായ അദ്ദേഹം ആദ്യമായി കമൽ ഹാസനുമായി കൈകോർക്കുന്നുവെന്ന പ്രത്യേകതയും ഈ ചിത്രത്തിനുണ്ട്.

ചിത്രത്തിന്റെ സംഗീതസംവിധാനം നിർവഹിക്കുന്നത് പ്രമുഖ സംഗീതസംവിധായകൻ അനിരുദ്ധ് രവിചന്ദർ ആണ്. കമൽ ഹാസൻ ചിത്രത്തിനായി അനിരുദ്ധ് വീണ്ടും സംഗീതമൊരുക്കുന്നു എന്നത് സിനിമയുടെ മേക്കിംഗ് ലെവൽ ഉയർത്തുന്നു.

തെന്നിന്ത്യയിലെ പ്രശസ്തരായ സംഘട്ടന സംവിധായകർ അൻപറിവ് മാസ്റ്റേഴ്സ് ആണ് ചിത്രത്തിന്റെ ആക്ഷൻ രംഗങ്ങൾ കൈകാര്യം ചെയ്യുന്നത്. ചിത്രത്തിന്റെ മറ്റ് അണിയറപ്രവർത്തകർ ഇവരാണ്: ഛായാഗ്രഹണം: സുനിൽ കെ.എസ്., പ്രൊഡക്ഷൻ ഡിസൈൻ: സി.എസ്.

ബാലചന്ദർ, കോസ്റ്റ്യൂം ഡിസൈൻ: അമൃത റാം, പിആർഒ : വൈശാഖ് സി വടക്കേവീട്, ജിനു അനിൽകുമാർ. സിനിമയുടെ മറ്റ് താരനിരയെക്കുറിച്ചുള്ള വിവരങ്ങളും മറ്റ് അപ്ഡേറ്റുകളും വരും ദിവസങ്ങളിൽ അണിയറപ്രവർത്തകർ ഔദ്യോഗികമായി പുറത്തുവിടും.