വിമാന ടിക്കറ്റ് നിരക്ക് കുതിക്കുന്നു; ദില്ലി-ബെംഗളൂരു യാത്രയ്ക്ക് മുടക്കണം 90,000 രൂപ

ഇൻഡിഗോ വിമാന സർവ്വീസുകൾ തുടർച്ചയായി തടസ്സപ്പെടുന്നതിനെ തുടർന്ന് രാജ്യത്തെ പ്രധാന റൂട്ടുകളിലെ വിമാന ടിക്കറ്റ് നിരക്കുകൾ കുതിച്ചുയരുന്നു. ഡൽഹി – ബെംഗളൂരു റൂട്ടിൽ യാത്രാനിരക്ക് 50,000 രൂപ കടന്നു.  ഡൽഹിയിൽ നിന്ന് മുംബൈയിലേക്കുള്ള ടിക്കറ്റ് നിരക്ക് 25,161 രൂപ മുതൽ 48,972 രൂപ വരെയാണ്.

നേരത്തെ 6,000 രൂപയ്ക്കും 6,200 രൂപയ്ക്കും ഇടയിലായിരുന്നു ഈ റൂട്ടിലെ ശരാശരി ടിക്കറ്റ് നിരക്ക്.  മുംബൈയിൽ നിന്ന് ഡൽഹിയിലേക്കുള്ള വിമാന ടിക്കറ്റ് നിരക്ക് 23,589 രൂപയിൽ ആരംഭിച്ച് 46,800 രൂപ വരെ എത്തിയിരിക്കുന്നു. സാധാരണയായി 6,000 രൂപയോളമായിരുന്നു ഈ റൂട്ടിൽ ഒരു വശത്തേക്കുള്ള യാത്രയ്ക്ക് ഈടാക്കിയിരുന്നത്.

ഡൽഹി – കൊൽക്കത്ത റൂട്ടിൽ ഡിസംബർ 6-ലെ ടിക്കറ്റ് നിരക്ക് 23,589 രൂപ മുതൽ 46,899 രൂപ വരെയാണ്. 5,700 രൂപയ്ക്കും 7,000 രൂപയ്ക്കും ഇടയിലായിരുന്നു ഈ റൂട്ടിലെ സാധാരണ നിരക്ക്.

കൊൽക്കത്തയിൽ നിന്ന് ഡൽഹിയിലേക്കുള്ള ഡിസംബർ 6-ലെ യാത്രാനിരക്ക് 27,999 രൂപയിൽ തുടങ്ങി 38,809 രൂപ വരെ ഉയർന്നു. 5,000 രൂപയ്ക്കും 6,000 രൂപയ്ക്കും ഇടയിലായിരുന്നു മുൻപ് ഈ റൂട്ടിലെ ശരാശരി ടിക്കറ്റ് നിരക്ക്.

ഡൽഹിയിൽ നിന്ന് ബെംഗളൂരുവിലേക്കുള്ള വിമാന ടിക്കറ്റിന് 80,069 രൂപ മുതൽ 88,469 രൂപ വരെയാണ് നിലവിൽ ഈടാക്കുന്നത്. 7,173 രൂപയായിരുന്നു ഈ റൂട്ടിലെ മുൻപുണ്ടായിരുന്ന ശരാശരി നിരക്ക്.

ബെംഗളൂരുവിൽ നിന്ന് ഡൽഹിയിലേക്കുള്ള ടിക്കറ്റ് നിരക്ക് 33,838 രൂപയായി ഉയർന്നു. 6,800 രൂപയ്ക്കും 7,000 രൂപയ്ക്കും ഇടയിലായിരുന്നു ഈ റൂട്ടിലെ സാധാരണ യാത്രാ ചെലവ്.

ഡൽഹിയിൽ നിന്ന് ആൻഡമാനിലേക്കുള്ള ടിക്കറ്റ് നിരക്ക് 92,067 രൂപ വരെയായി വർധിച്ചു. 12,000 രൂപ മുതൽ 20,000 രൂപ വരെയായിരുന്നു മുൻപ് ഈ റൂട്ടിലെ ശരാശരി യാത്രാച്ചെലവ്.

ഡൽഹി – ഹൈദരാബാദ് റൂട്ടിൽ ടിക്കറ്റ് നിരക്ക് 49,259 രൂപയ്ക്കും 50,628 രൂപയ്ക്കും ഇടയിലായി ഉയർന്നു. 5,500 രൂപ മുതൽ 6,000 രൂപ വരെയായിരുന്നു ഈ റൂട്ടിലെ സാധാരണ നിരക്ക്.

ഹൈദരാബാദിൽ നിന്ന് ഡൽഹിയിലേക്കുള്ള വിമാന ടിക്കറ്റിന് 33,850 രൂപ മുതൽ 42,794 രൂപ വരെയാണ് നിലവിലെ നിരക്ക്. 6,400 രൂപയ്ക്കും 7,000 രൂപയ്ക്കും ഇടയിലായിരുന്നു മുൻപ് ഒരു വശത്തേക്കുള്ള യാത്രാനിരക്ക്.

മുംബൈയിൽ നിന്ന് ബെംഗളൂരുവിലേക്കുള്ള ടിക്കറ്റ് നിരക്ക് 30,000 രൂപ മുതൽ 40,219 രൂപ വരെയായി വർധിച്ചു. മുൻപ് സാധാരണ ദിവസങ്ങളിൽ 5,900 രൂപയ്ക്കും 7,700 രൂപയ്ക്കും ഇടയിലായിരുന്നു ഈ റൂട്ടിലെ യാത്രാച്ചെലവ്.