യുകെയിൽ ലക്ഷക്കണക്കിന് ഭക്ഷണപ്പൊതികൾ വിതരണം ചെയ്തു: ഇന്ദർജിത് ജുഗ്ഡിക്കും മകൾക്കും കോവൻട്രി സിറ്റി കൗൺസിലിന്റെ ആദരം

യുകെയിലെ നിർധനരായ ആളുകൾക്കും വിശപ്പനുഭവിക്കുന്നവർക്കും കൈത്താങ്ങായി പ്രവർത്തിക്കുന്ന സന്നദ്ധസംഘടനയുടെ സേവനങ്ങളെ തേടി ഉന്നത ബഹുമതി. കോവൻട്രി സിറ്റി കൗൺസിലാണ് ‘ലങ്കർ എയ്ഡ്’ എന്ന സംഘടനയുടെ സ്ഥാപകരായ ഇന്ദർജിത് ജുഗ്ഡി, മകൾ അവ്താർ കൗർ എന്നിവർക്ക് ‘ഗുഡ് സിറ്റിസൺ’ പുരസ്കാരം സമ്മാനിച്ചത്.

ഒരു വർഷത്തിനിടെ പത്ത് ലക്ഷത്തിലധികം സൗജന്യ ഭക്ഷണപ്പൊതികൾ വിതരണം ചെയ്തതിലൂടെയാണ് ഇവർ ശ്രദ്ധേയമായത്. കഴിഞ്ഞ ഒരു ദശാബ്ദമായി തുടരുന്ന ഇവരുടെ നിസ്വാർത്ഥ സേവനം വിശക്കുന്നവന്റെ അത്താണിയായി മാറിയിരിക്കുകയാണ്.

2016-ൽ കോവൻട്രിയിലെ തൊഴിൽ കേന്ദ്രത്തിന് മുൻപിൽ വെറും 30 പേർക്ക് ഭക്ഷണം നൽകി ആരംഭിച്ച സംരംഭം, ഇന്ന് ആഴ്ചയിൽ 20,000-ത്തിലധികം ഭക്ഷണപ്പൊതികൾ വിതരണം ചെയ്യുന്ന വലിയൊരു പ്രസ്ഥാനമായി വളർന്നു. സിഖ് മതപാരമ്പര്യമായ ‘ലങ്കർ’ ആശയത്തിൽ നിന്നാണ് ഈ മാതൃകാപരമായ പ്രവർത്തനം ഉത്ഭവിച്ചത്.

ജാതി, മത, വർഗ ഭേദമന്യേ എല്ലാവർക്കും സൗജന്യമായി ഭക്ഷണം നൽകുകയെന്നതാണ് ഇതിന്റെ അടിസ്ഥാന തത്വം. പ്രവർത്തന ശൈലി
ഖൽസ എയ്ഡ് ഇന്‍റർനാഷണലിന്റെ ഭാഗമായി പ്രവർത്തിക്കുന്ന ഈ സംഘടന, സ്കൂളുകൾ കേന്ദ്രീകരിച്ചും അഭയാർത്ഥി കുടുംബങ്ങളെ സഹായിക്കുന്നതിനും മുൻനിരയിലുണ്ട്.

ആഴ്ചയിൽ അഞ്ച് വൈകുന്നേരങ്ങളിൽ സ്ഥിരമായി ഭക്ഷണവിതരണം നടത്തുന്നതിന് പുറമെ, വിവിധ മതവിഭാഗങ്ങൾക്കിടയിൽ സൗഹാർദം വളർത്തുന്നതിനും ഇവർ മുൻകൈ എടുക്കുന്നു. കോവൻട്രി കത്തീഡ്രലുമായി ചേർന്ന് സംഘടിപ്പിച്ച പുതുവത്സരദിന പൊതുഭക്ഷണ പരിപാടി ഇതിനൊരു ഉദാഹരണമാണ്.

ആഗോളതലത്തിലെ സേവനങ്ങൾ
ഇന്ദർജിത് ജുഗ്ഡി നൈജീരിയ, മലാവി, ഇന്ത്യ, മൊറോക്കോ തുടങ്ങിയ രാജ്യങ്ങളിലെ ദുരിതാശ്വാസ പ്രവർത്തനങ്ങളിൽ നേരത്തെ പങ്കാളിയായിരുന്നു. തുർക്കിയിലും ഗാസയിലും നടന്ന പ്രവർത്തനങ്ങളിൽ മകൾ അവ്താർ കൗറും സജീവ സാന്നിധ്യമായിരുന്നു.

അച്ഛന്റെയും മകളുടെയും നിശ്ചയദാർഢ്യത്തെയും സേവനമനോഭാവത്തെയും കോവൻട്രി ലോർഡ് മേയർ കൗൺസിലർ റോജർ ബെയ്‌ലി പ്രത്യേകം അഭിനന്ദിച്ചു. നിരവധി മനുഷ്യരുടെ ജീവിതത്തിൽ പ്രത്യാശയുടെ വെളിച്ചം പകരാൻ ഈ പിതാവിനും മകൾക്കും കഴിഞ്ഞുവെന്ന് അദ്ദേഹം പറഞ്ഞു.