കൊൽക്കത്തയിലെ സാൾട്ട് ലേക്ക് സ്റ്റേഡിയത്തിൽ നടന്ന സൗഹൃദ മത്സരത്തിൽ അഞ്ചു തവണ ലോക ചാമ്പ്യൻമാരായ ബ്രസീലിനെതിരെ മികച്ച പോരാട്ടവീര്യം പുറത്തെടുത്ത ഇന്ത്യൻ ടീമിന് ബ്രസീലിയൻ പരിശീലകൻ കാർലോ ആഞ്ചലോട്ടിയുടെ പ്രശംസ. ശനിയാഴ്ച നടന്ന മത്സരത്തിൽ 4-0 എന്ന സ്കോറിനാണ് ബ്രസീൽ വിജയം സ്വന്തമാക്കിയത്.
മത്സരത്തിന്റെ തുടക്കം മുതൽ ആക്രമിച്ചു കളിച്ച മഞ്ഞപ്പടയെ ആദ്യ 28 മിനിറ്റോളം കൃത്യമായ പ്രതിരോധത്തിലൂടെ തടഞ്ഞു നിർത്താൻ ഇന്ത്യക്ക് സാധിച്ചിരുന്നു. എന്നാൽ 28-ാം മിനിറ്റിൽ എസ്തേവാവോയിലൂടെ ബ്രസീൽ ആദ്യ ഗോൾ കണ്ടെത്തി.
തുടർന്ന് ആദ്യ പകുതി അവസാനിക്കുന്നതിന് മുൻപ് പെഡ്രോ ടീമിന്റെ രണ്ടാം ഗോളും നേടി. രണ്ടാം പകുതിയിൽ സാമുവൽ ലിനോ ഇരട്ട
ഗോളുകൾ കൂടി നേടിയതോടെ ബ്രസീൽ വിജയം പൂർത്തിയാക്കുകയായിരുന്നു. “ആദ്യ ഗോൾ നേടുക എന്നത് ഏറെ പ്രയാസകരമായിരുന്നു.
എന്നാൽ എസ്തേവാവോയിലൂടെ ലീഡ് എടുത്തതോടെ മത്സരത്തിന്റെ നിയന്ത്രണം ഏറ്റെടുക്കാൻ ഞങ്ങൾക്ക് സാധിച്ചു. ഇന്ത്യ മികച്ച രീതിയിലാണ് പ്രതിരോധിച്ചതും പ്രത്യാക്രമണങ്ങൾക്ക് ശ്രമിച്ചതും.
അവർ മികച്ച കളിയാണ് പുറത്തെടുത്തത്,” മത്സരശേഷം കാർലോ ആഞ്ചലോട്ടി വ്യക്തമാക്കി. കൂടാതെ കൊൽക്കത്തയിലെ കാണികളുടെ ആവേശകരമായ പിന്തുണയ്ക്കും അദ്ദേഹം നന്ദി അറിയിച്ചു.
ഗുർപ്രീതിനെ പിന്തുണച്ച് ഇന്ത്യൻ പരിശീലകൻ മത്സരത്തിന്റെ ആദ്യ പകുതിയിലെ രണ്ടു ഗോളുകൾക്ക് ശേഷം ഗോൾകീപ്പർ ഗുർപ്രീത് സിംഗ് സന്ധുവിനെ പിൻവലിച്ചതിനെക്കുറിച്ചുള്ള തീരുമാനത്തിൽ ഇന്ത്യൻ പരിശീലകൻ ഖാലിദ് ജമീൽ പ്രതികരിച്ചു. ഇന്ത്യക്കായി തന്റെ 90-ാം മത്സരം കളിച്ച നായകൻ ഗുർപ്രീതിനെ മാത്രം ഈ തോൽവിയിൽ കുറ്റപ്പെടുത്താനാവില്ലെന്നാണ് ജമീൽ വ്യക്തമാക്കിയത്.
“ഗുർപ്രീത് രാജ്യത്തെ ഏറ്റവും മികച്ച ഗോൾകീപ്പർമാരിൽ ഒരാളാണ്. ഒരു വ്യക്തിയുടെ മാത്രം പിഴവല്ല അത്, മൊത്തത്തിലുള്ള വീഴ്ചയാണ്,” ഖാലിദ് ജമീൽ പറഞ്ഞു.
അടുത്ത മത്സരത്തിൽ സോം കുമാറോ അൽബിനോ ഗോമസോ ഗോൾവലയ്ക്ക് കീഴിൽ ഇറങ്ങിയേക്കാമെങ്കിലും ഗുർപ്രീത് ടീമിലേക്ക് ശക്തമായി തിരിച്ചെത്തുമെന്നും അദ്ദേഹം കൂട്ടിച്ചേർത്തു. ലോകോത്തര താരങ്ങൾ അണിനിരക്കുന്ന ബ്രസീലിനെതിരെ കളിക്കുന്നത് അമൂല്യമായ അനുഭവമാണെന്നും, ഇത്തരത്തിലുള്ള ഉയർന്ന നിലവാരത്തിലുള്ള മത്സരങ്ങൾ കളിക്കാരുടെ ആത്മവിശ്വാസം ഇരട്ടിപ്പിക്കുമെന്നും ജമീൽ അഭിപ്രായപ്പെട്ടു.
മത്സരശേഷം ബ്രസീൽ പരിശീലകൻ ആഞ്ചലോട്ടി തനിക്ക് നൽകിയ പ്രോത്സാഹന വാക്കുകളും അദ്ദേഹം നന്ദിയോടെ സ്മരിച്ചു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
