മാഞ്ചസ്റ്റർ ടി20 ക്രിക്കറ്റ്: ഇന്ത്യക്കെതിരെ ഇംഗ്ലണ്ടിന് ആവേശജയം; തിളങ്ങി ജേക്കബ് ബെതൽ, വൈഭവ് സൂര്യവംശിക്ക് റെക്കോർഡ് അരങ്ങേറ്റം

മാഞ്ചസ്റ്റർ സാക്ഷ്യം വഹിച്ച രണ്ടാമത് ടി20 പോരാട്ടത്തിൽ ഇന്ത്യക്കെതിരെ ഇംഗ്ലണ്ടിന് മിന്നും വിജയം. ഇന്ത്യ ഉയർത്തിയ 191 റൺസിന്റെ വിജയലക്ഷ്യം പിന്തുടർന്ന ഇംഗ്ലണ്ട് നിരയെ ജേക്കബ് ബെതലിന്റെ തകർപ്പൻ ബാറ്റിംഗ് പ്രകടനമാണ് വിജയത്തിലേക്ക് നയിച്ചത്.

വെറും 46 പന്തുകളിൽ നിന്ന് 76 റൺസാണ് ബെതൽ അടിച്ചുകൂട്ടിയത്. തുടക്കത്തിൽ വിക്കറ്റുകൾ നഷ്ടമായി പതറിയ ഇംഗ്ലണ്ടിനെ ബെതലിനൊപ്പം 32 പന്തിൽ 39 റൺസ് നേടിയ ടോം ബാന്റണും, 15 പന്തിൽ 39 റൺസുമായി തകർത്തടിച്ച ക്യാപ്റ്റൻ ഹാരി ബ്രൂക്കും ചേർന്ന് മത്സരത്തിലേക്ക് തിരികെ കൊണ്ടുവരികയായിരുന്നു.

ഇന്ത്യൻ ബൗളിംഗ് നിരയിൽ അർഷ്ദീപ് സിംഗ് മൂന്ന് വിക്കറ്റുകൾ വീഴ്ത്തി മികച്ച പോരാട്ടം കാഴ്ചവെച്ചെങ്കിലും ഇംഗ്ലീഷ് ബാറ്റിംഗ് നിരയുടെ കരുത്തിനെ മറികടക്കാൻ ഇന്ത്യക്കായില്ല. നേരത്തെ ടോസ് നേടി ആദ്യം ബാറ്റിംഗിനിറങ്ങിയ ഇന്ത്യ നിശ്ചിത 20 ഓവറിൽ 7 വിക്കറ്റ് നഷ്ടത്തിലാണ് 190 റൺസ് എന്ന മികച്ച സ്കോർ പടുത്തുയർത്തിയത്.

49 റൺസ് നേടിയ വിക്കറ്റ് കീപ്പർ ബാറ്റർ ഇഷാൻ കിഷന്റെയും, 43 റൺസ് എടുത്ത അഭിഷേക് ശർമയുടെയും ബാറ്റിംഗ് മികവിലാണ് ഇന്ത്യക്ക് മികച്ച ടോട്ടൽ കണ്ടെത്താനായത്. ഇംഗ്ലണ്ടിനായി ബൗളിംഗിൽ സാം കരൺ മൂന്ന് വിക്കറ്റുകൾ വീഴ്ത്തി തിളങ്ങി.

മറുപടി ബാറ്റിംഗിൽ ഇംഗ്ലണ്ടിന്റെ തുടക്കം തകർച്ചയോടെയായിരുന്നു. മത്സരത്തിലെ ആദ്യ പന്തിൽ തന്നെ ഓപ്പണർ ഫിലിപ്പ് സാൾട്ടിനെ അർഷ്ദീപ് സിംഗ് പുറത്താക്കി.

ഇഷാൻ കിഷന് ക്യാച്ച് നൽകിയാണ് സാൾട്ട് മടങ്ങിയത്. തൊട്ടുപിന്നാലെ, ആദ്യ ഓവറിലെ അഞ്ചാം പന്തിൽ സൂപ്പർ താരം ജോസ് ബട്ട്ലറെയും പുറത്താക്കാൻ അർഷ്ദീപിന് സാധിച്ചു.

ഇതോടെ പ്രതിരോധത്തിലായ ഇംഗ്ലണ്ടിനെ പിന്നീട് മധ്യനിര ബാറ്റിംഗ് കരുത്താണ് കരകയറ്റിയത്. അതേസമയം, ഇന്ത്യൻ ക്രിക്കറ്റിൽ ചരിത്രനേട്ടത്തോടെയാണ് ഈ മത്സരം കടന്നുപോയത്.

ഇന്ത്യക്കായി അന്താരാഷ്ട്ര ക്രിക്കറ്റിൽ അരങ്ങേറുന്ന ഏറ്റവും പ്രായം കുറഞ്ഞ താരം എന്ന അപൂർവ റെക്കോർഡ് യുവതാരം വൈഭവ് സൂര്യവംശി സ്വന്തമാക്കി. അഭിഷേക് ശർമയ്ക്കൊപ്പം ഇന്നിംഗ്സ് ഓപ്പൺ ചെയ്ത സൂര്യവംശിക്ക് അരങ്ങേറ്റ മത്സരത്തിൽ വലിയ സ്കോർ കണ്ടെത്താനായില്ലെങ്കിലും പത്ത് പന്തുകളിൽ രണ്ട് സിക്സറുകൾ ഉൾപ്പെടെ 14 റൺസ് താരം അടിച്ചുകൂട്ടി.

പവർപ്ലേ പൂർത്തിയായ ഘട്ടത്തിൽ (ആറ് ഓവറിൽ) രണ്ട് വിക്കറ്റ് നഷ്ടത്തിൽ 65 റൺസാണ് ഇന്ത്യ നേടിയിരുന്നത്. ഇംഗ്ലണ്ട് പ്ലേയിംഗ് ഇലവൻ
ഫിലിപ്പ് സാൾട്ട്, ജോസ് ബട്ട്‌ലർ (വിക്കറ്റ് കീപ്പർ), ഹാരി ബ്രൂക്ക് (ക്യാപ്റ്റൻ), ജേക്കബ് ബെഥേൽ, ടോം ബാന്റൺ, സാം കറൻ, വിൽ ജാക്സ്, ലിയാം ഡാവ്സൺ, ആദിൽ റഷീദ്, ജോഫ്ര ആർച്ചർ, ജോഷ് ടങ്.

ഇന്ത്യ പ്ലേയിംഗ് ഇലവൻ
വൈഭവ് സൂര്യവംശി, അഭിഷേക് ശർമ്മ, ഇഷാൻ കിഷൻ (വിക്കറ്റ് കീപ്പർ), ശ്രേയസ് അയ്യർ (ക്യാപ്റ്റൻ), തിലക് വർമ്മ, ശിവം ദുബെ, ഹർഷിത് റാണ, അക്സർ പട്ടേൽ, രവി ബിഷ്ണോയ്, അർഷ്ദീപ് സിംഗ്, വരുൺ ചക്രവർത്തി.