ഉത്തർപ്രദേശിൽ ജാതി വിവേചനം: ആശുപത്രി പ്രവേശനം നിഷേധിച്ചതിനെ തുടർന്ന് ദളിത് യുവതി റോഡരികിൽ പ്രസവിച്ചു

ഉത്തർപ്രദേശിലെ ഭദോഹിയിൽ ഗുരുതരമായ ജാതി വിവേചനത്തെ തുടർന്ന് ആശുപത്രി അധികൃതർ പ്രവേശനം നിഷേധിച്ച സംഭവത്തിൽ 20 കാരിയായ ദളിത് യുവതിക്ക് റോഡരികിൽ പ്രസവിക്കേണ്ടി വന്നു. ഭദോഹിയിലെ മഹാരാജ ചേത് സിങ് ഗവൺമെന്റ് ആശുപത്രിക്ക് പുറത്താണ് ഈ ദാരുണമായ സംഭവം അരങ്ങേറിയത്.

ദളിത് വിഭാഗമായ മുസഹർ സമുദായത്തിൽപ്പെട്ടവളായതിനാൽ ആശുപത്രി ജീവനക്കാരും ഡ്യൂട്ടിയിലുണ്ടായിരുന്ന നേഴ്സും തങ്ങൾക്ക് പ്രസവചികിത്സ നൽകാൻ തയ്യാറായില്ലെന്ന് യുവതിയുടെ കുടുംബം കടുത്ത ആരോപണം ഉന്നയിച്ചു. അതീവ ഗുരുതരമായ പ്രസവവേദനയോടെയാണ് യുവതി ആശുപത്രിയിലെത്തിയത്.

എന്നാൽ “മുസഹർ സമുദായക്കാരിയാണ്, പ്രസവമെടുക്കില്ല” എന്ന് ആക്രോശിച്ചുകൊണ്ട് ജീവനക്കാർ യുവതിയെ അപമാനിക്കുകയും ആശുപത്രിക്ക് പുറത്തേക്ക് വലിച്ചെറിയുകയുമായിരുന്നു എന്ന് കുടുംബം വ്യക്തമാക്കുന്നു. തുടർന്ന് മറ്റ് വഴികളൊന്നുമില്ലാതെ ആശുപത്രിക്ക് തൊട്ടുവെളിയിലെ റോഡരികിൽ വെച്ച് യുവതി കുഞ്ഞിന് ജന്മം നൽകുകയായിരുന്നു.

ഈ ദയനീയ രംഗം കണ്ടുനിന്ന സമീപവാസികളുടെയും യാത്രാക്കാരുടെയും മാനുഷിക ഇടപെടലിലൂടെയാണ് അമ്മയെയും നവജാത ശിശുവിനെയും പിന്നീട് സംരക്ഷിച്ചത്. സംഭവം നാട്ടുകാർക്കിടയിൽ വലിയ പ്രതിഷേധത്തിന് തിരികൊളുത്തി.

തുടർന്ന് പൊലീസിന്റെ ശക്തമായ ഇടപെടലിനെ തുടർന്നാണ് അമ്മയെയും കുഞ്ഞിനെയും ആശുപത്രിയിലെ അത്യാഹിത വിഭാഗത്തിലേക്ക് മാറ്റി ആവശ്യമായ ചികിത്സ ലഭ്യമാക്കിയത്. ഈ സംഭവം വലിയ രീതിയിൽ വിവാദമായതിനെ തുടർന്ന് കർശന നടപടികളിലേക്ക് അധികാരികൾ കടന്നു.

ആശുപത്രിയിൽ ഡ്യൂട്ടിയിലുണ്ടായിരുന്ന ഡോക്ടറെ സർവീസിൽ നിന്ന് അടിയന്തരമായി പിരിച്ചുവിട്ടു. ഇതിനുപുറമെ, സംഭവത്തിൽ ഉത്തരവാദികളായ മറ്റ് ജീവനക്കാർക്കെതിരെയും വിശദമായ വകുപ്പ് തല അന്വേഷണത്തിനും ഉത്തരവിട്ടിട്ടുണ്ട്.

ആശുപത്രി അധികൃതരുടെ ഭാഗത്തുനിന്നുണ്ടായ ഈ ക്രൂരതയ്ക്കെതിരെ കോൺഗ്രസ് ഉൾപ്പെടെയുള്ള പ്രതിപക്ഷ പാർട്ടികളും വിവിധ സാമൂഹിക പ്രവർത്തകരും ശക്തമായ പ്രതിഷേധമാണ് രേഖപ്പെടുത്തിയിരിക്കുന്നത്. ജീവൻ രക്ഷിക്കേണ്ടതും അടിയന്തര മെഡിക്കൽ സഹായം ഉറപ്പാക്കേണ്ടതുമായ ആരോഗ്യ കേന്ദ്രങ്ങളിൽ പോലും ജാതി വിവേചനം വേരുറച്ചുനിൽക്കുന്നത് ആരോഗ്യ രംഗത്തിന്റെ സമ്പൂർണ്ണ തകർച്ചയാണ് ചൂണ്ടിക്കാണിക്കുന്നതെന്ന് അവർ കുറ്റപ്പെടുത്തി.