രാജ്യത്തെ ആദ്യ എൽഎൻജി ട്രെയിൻ സർവീസ് ആരംഭിച്ചു; ഫ്ലാഗ് ഓഫ് ചെയ്ത് കേന്ദ്ര ആഭ്യന്തരമന്ത്രി

പരിസ്ഥിതി സൗഹൃദ റെയിൽ ഗതാഗത ലക്ഷ്യത്തിലേക്ക് പുതിയ ചുവടുവെയ്പുമായി രാജ്യത്തെ ആദ്യ എൽഎൻജി (ലക്വിഫൈഡ് നാച്ചുറൽ ഗ്യാസ്) ട്രെയിൻ സർവീസ് യാഥാർത്ഥ്യമായി. ഗുജറാത്തിലെ അഹമ്മദാബാദ് സബർമതി റെയിൽവേ സ്റ്റേഷനിൽ നിന്ന് കേന്ദ്ര ആഭ്യന്തരമന്ത്രി അമിത് ഷാ സെപ്റ്റംബർ 27ന് ട്രെയിൻ ഫ്ലാഗ് ഓഫ് ചെയ്തു.

സബർമതി ഡിവിഷനിൽ ഏകദേശം 1,472 കോടി രൂപ ചെലവിൽ നടപ്പാക്കിയ വിവിധ റെയിൽവേ പദ്ധതികളുടെ ഉദ്ഘാടനവും ഈ ചടങ്ങിൽ നടന്നു. ഡീസലിനൊപ്പം എൽഎൻജിയും ഉപയോഗിക്കുന്ന ഇരട്ട

ഇന്ധന സംവിധാനത്തിലാണ് പുതിയ ട്രെയിൻ പ്രവർത്തിക്കുന്നത്. സബർമതി സംയോജിത കോച്ചിംഗ് ഡിപ്പോയിലെ 1,400 കുതിരശക്തി വീതമുള്ള രണ്ട് ഡ്രൈവിംഗ് പവർ കാറുകൾ ഇതിനായി പരിഷ്കരിച്ചു.

ഈ സംവിധാനത്തിലൂടെ ബന്ധപ്പെട്ട റൂട്ടിലെ ഡീസൽ ഉപഭോഗത്തിന്റെ ഏകദേശം 40 ശതമാനം വരെ എൽഎൻജി ഉപയോഗിച്ച് മാറ്റിസ്ഥാപിക്കാനാകുമെന്നാണ് റിപ്പോർട്ട്.

ഡീസലിനെ ആശ്രയിക്കുന്നത് കുറയ്ക്കുന്നതിനൊപ്പം അന്തരീക്ഷ മലിനീകരണം നിയന്ത്രിക്കാനും വിദേശനാണ്യ ചെലവ് കുറയ്ക്കാനും പുതിയ സംവിധാനം സഹായിക്കുമെന്നാണ് പ്രതീക്ഷ. എൽഎൻജി സാങ്കേതികവിദ്യയുടെ കാര്യക്ഷമതയും വിശ്വാസ്യതയും വിലയിരുത്തുന്നതിനായി പരിഷ്കരിച്ച രണ്ട് ഡ്രൈവിംഗ് പവർ കാറുകളിലും 2,000 കിലോമീറ്ററിലധികം പരീക്ഷണ ഓട്ടം പൂർത്തിയാക്കിയിട്ടുണ്ട്.

പരിസ്ഥിതി സൗഹൃദ റെയിൽ ഗതാഗതത്തിലേക്കുള്ള ഇന്ത്യൻ റെയിൽവേയുടെ നീക്കത്തിലെ പ്രധാന ചുവടുവയ്പായാണ് എൽഎൻജി ട്രെയിനിന്റെ സർവീസ് വിലയിരുത്തപ്പെടുന്നത്. ഹൈഡ്രജൻ, എൽഎൻജി, വൈദ്യുതീകരണം തുടങ്ങിയ സാങ്കേതികവിദ്യകൾ ഉപയോഗിച്ച് കുറഞ്ഞ കാർബൺ പുറന്തള്ളലുള്ള റെയിൽ ഗതാഗതം വികസിപ്പിക്കാനുള്ള ശ്രമങ്ങളും രാജ്യത്ത് പുരോഗമിക്കുകയാണ്.

പരിപാടിയുടെ ഭാഗമായി 700 കോടി രൂപ ചെലവിൽ നിർമിച്ച ഡബ്ല്യുഎജി-12 ലോക്കോമോട്ടീവ് പരിപാലന കേന്ദ്രവും ഉദ്ഘാടനം ചെയ്തു. 12,000 കുതിരശക്തി ശേഷിയുള്ള ഇരട്ട

വിഭാഗ ഡബ്ല്യുഎജി-12 ചരക്ക് ലോക്കോമോട്ടീവും കമ്മീഷൻ ചെയ്തു. ഒറ്റ യാത്രയിൽ ഏകദേശം 600 ട്രക്കുകൾക്ക് തുല്യമായ ചരക്ക് വലിച്ചുകൊണ്ടുപോകാൻ ഈ ലോക്കോമോട്ടീവിന് ശേഷിയുണ്ട്.

ഇതേ ശേഷിയിലുള്ള ചരക്ക് ഗതാഗതത്തിന് നേരത്തെ രണ്ട് എൻജിനുകൾ ആവശ്യമായിരുന്നു. സബർമതി–കലോൽ–സബർമതി റെയിൽവേ പാതയിൽ 48 കോടി രൂപ ചെലവിൽ ‘കവച്’ ട്രെയിൻ സംരക്ഷണ സംവിധാനവും നടപ്പാക്കി.

അഹമ്മദാബാദ്–പാലൻപൂർ, അഹമ്മദാബാദ്–സമഖിയാലി പാതകളിലേക്കും സംവിധാനം വ്യാപിപ്പിക്കുന്നതിനുള്ള പ്രവർത്തനങ്ങൾ പുരോഗമിക്കുകയാണ്. അതേസമയം, സബർമതി–സർഖേജ് റെയിൽവേ പാത ഇരട്ടിപ്പിക്കുന്നതിനുള്ള പ്രവർത്തനങ്ങളും ആരംഭിച്ചു.

പദ്ധതിയുടെ പൂർത്തീകരണ തീയതി ഇതുവരെ പ്രഖ്യാപിച്ചിട്ടില്ല.