ദേവി ശ്രീ പ്രസാദ് അഭിനയത്തിലേക്ക്; വേണു യെൽദണ്ടിയുടെ ‘യെല്ലമ്മ’ പാൻ-ഇന്ത്യ റിലീസിനൊരുങ്ങുന്നു

പ്രശസ്ത സംവിധായകൻ വേണു യെൽദണ്ടിയുടെ സംവിധാനത്തിൽ ഒരുങ്ങുന്ന പുതിയ ചലച്ചിത്രം ‘യെല്ലമ്മ’ റിലീസിനൊരുങ്ങുന്നു. ഈ ചിത്രത്തിലൂടെ പ്രമുഖ സംഗീത സംവിധായകൻ ദേവി ശ്രീ പ്രസാദ് ആദ്യമായി അഭിനയ രംഗത്തേക്ക് കടന്നുവരുന്നു എന്നത് സിനിമയുടെ പ്രധാന പ്രത്യേകതയാണ്.

ചിത്രത്തിൽ ‘പാർഷി’ എന്ന കഥാപാത്രമായാണ് അദ്ദേഹം വേഷമിടുന്നത്. ദേവി ശ്രീ പ്രസാദിന്റെ ജന്മദിനത്തോടനുബന്ധിച്ച് അണിയറപ്രവർത്തകർ അദ്ദേഹത്തിന്റെ പുതിയ ക്യാരക്ടർ പോസ്റ്റർ പുറത്തുവിട്ടു.

പ്രമുഖ നിർമ്മാതാവ് ദിൽ രാജുവിന്റെ ശ്രീ വെങ്കടേശ്വര ക്രിയേഷൻസ് ബാനറിലാണ് ചിത്രം നിർമ്മിക്കുന്നത്. അഞ്ച് ഭാഷകളിലായി ചിത്രം പാൻ-ഇന്ത്യ റിലീസായി തിയേറ്ററുകളിലെത്തും.

വലിയ മാസ് ചിത്രങ്ങളുടെയും വലിയ ദൃശ്യവിസ്മയങ്ങളുടെയും കാലഘട്ടത്തിൽ, വളരെ ലളിതവും ഹൃദയസ്പർശിയുമായ അവതരണമാണ് ‘യെല്ലമ്മ’യെ വ്യത്യസ്തമാക്കുന്നത്. സാധാരണ വേഷത്തിൽ കൈയിൽ ഒരു കിരീടവുമായി നിൽക്കുന്ന ദേവി ശ്രീ പ്രസാദിന്റെ ലുക്ക് കഥാപാത്രത്തിന്റെ നിഷ്കളങ്കതയും ജീവിതത്തോട് ചേർന്നുനിൽക്കുന്ന സ്വഭാവവുമാണ് വ്യക്തമാക്കുന്നത്.

ആദ്യമായി അഭിനയിക്കുമ്പോഴും തന്റെ കഥാപാത്രത്തെ അതിശയകരമായ സ്വാഭാവികതയോടെ അവതരിപ്പിക്കാൻ അദ്ദേഹത്തിന് കഴിഞ്ഞിട്ടുണ്ട്. ഇത് സംവിധായകൻ വേണു യെൽദണ്ടിയുടെ കാഴ്ചപ്പാടിന്റെ മികവാണ് കാണിക്കുന്നത്.

ചിത്രത്തിന്റെ സംഗീത സംവിധാനവും നിർവ്വഹിച്ചിരിക്കുന്നത് ദേവി ശ്രീ പ്രസാദ് തന്നെയാണ്. മോഷൻ പോസ്റ്ററിനൊപ്പമുള്ള പശ്ചാത്തല സംഗീതത്തിന് ഇതിനോടകം തന്നെ പ്രേക്ഷകരിൽ നിന്നും മികച്ച പ്രതികരണമാണ് ലഭിച്ചുകൊണ്ടിരിക്കുന്നത്.

‘ബലഗം’ എന്ന ചിത്രത്തിലൂടെ സിനിമാലോകത്ത് ശ്രദ്ധേയനായ വേണു യെൽദണ്ടി തന്റെ വർഷങ്ങളുടെ സ്വപ്നവും സമർപ്പണവും ചേർത്താണ് ‘യെല്ലമ്മ’ യാഥാർത്ഥ്യമാക്കിയിരിക്കുന്നത്. ചിത്രത്തിന്റെ പ്രഖ്യാപനം മുതൽ തന്നെ വലിയ പ്രേക്ഷകശ്രദ്ധ ലഭിച്ചിരുന്നെങ്കിലും, പുതിയ ഫസ്റ്റ് ലുക്കും മോഷൻ പോസ്റ്ററും ആ പ്രതീക്ഷകളെ ഇനിയും ഉയർത്തിയിട്ടുണ്ട്.

തെലുങ്ക്, തമിഴ്, മലയാളം, ഹിന്ദി, കന്നഡ എന്നീ ഭാഷകളിലായാണ് ചിത്രം പ്രദർശനത്തിനെത്തുന്നത്. ചിത്രത്തിന്റെ പി.ആർ.ഒ: പ്രതീഷ് ശേഖർ.