ഷെയ്ഖ് ഹസീന ഇന്ത്യയിൽ ആദ്യ പൊതുവേദിയിലേക്ക്; നിർണായക പ്രഖ്യാപനങ്ങൾ ഉണ്ടായേക്കുമെന്ന് സൂചന

ബംഗ്ലദേശിൽ വിദ്യാർഥി പ്രക്ഷോഭത്തെ തുടർന്ന് അധികാരം നഷ്ടപ്പെട്ട് രാജ്യം വിട്ട ഷെയ്ഖ് ഹസീന ഇന്ത്യയിൽ തന്റെ ആദ്യ പൊതുവേദിയിൽ സംസാരിക്കാൻ ഒരുങ്ങുന്നു.

ഭരണത്തിൽ നിന്ന് പുറത്താക്കപ്പെട്ട് കൃത്യം രണ്ട് വർഷം തികയുന്ന ആഗസ്റ്റ് 5ന് വൈകിട്ട് 6 മണിക്ക് ന്യൂഡൽഹിയിലെ ഫോറിൻ കറസ്പോണ്ടന്റ്സ് ക്ലബ് ഓഫ് സൗത്ത് ഏഷ്യ (എഫ്സിസി) സംഘടിപ്പിക്കുന്ന വെർച്വൽ പരിപാടിയിലാണ് അവർ അഭിസംബോധന ചെയ്യുക. ഡൽഹി മഥുര റോഡിലുള്ള സർ മാർക്ക് ടള്ളി ഓഡിറ്റോറിയമാണ് ചടങ്ങിന്റെ പ്രധാന വേദി.

തന്റെ ഭാവി രാഷ്ട്രീയ പദ്ധതികളെക്കുറിച്ചും തിരിച്ച് ബംഗ്ലദേശിലേക്കുള്ള മടങ്ങിവരവിനെക്കുറിച്ചും ഷെയ്ഖ് ഹസീന ഈ ചടങ്ങിൽ വ്യക്തമാക്കുമെന്നാണ് പുറത്തുവരുന്ന റിപ്പോർട്ടുകൾ സൂചിപ്പിക്കുന്നത്. 2024 ആഗസ്റ്റ് 5ന് അരങ്ങേറിയ വിപ്ലവകരമായ ജനകീയ പ്രക്ഷോഭത്തിനൊടുവിലാണ് ഹസീനയുടെ 16 വർഷം നീണ്ട

ഭരണകാലം അവസാനിച്ചതും തുടർന്ന് അവർ ഇന്ത്യയിൽ അഭയം പ്രാപിച്ചതും. അതിനുശേഷമുള്ള കാലയളവിൽ പലപ്പോഴായി പ്രസ്താവനകളും അഭിമുഖങ്ങളും നൽകിയിട്ടുണ്ടെങ്കിലും, അവർ നേരിട്ട് പങ്കെടുക്കുന്ന ഏറ്റവും വലിയ പൊതുപരിപാടിയാണിത്.

ഈ ചടങ്ങിൽ ഷെയ്ഖ് ഹസീനയ്‌ക്കൊപ്പം ബംഗ്ലദേശിലെ പ്രമുഖരായ നിരവധി രാഷ്ട്രീയ നേതാക്കളും നയതന്ത്ര വിദഗ്ധരും പങ്കാളികളാകുന്നുണ്ട്. ഹസീനയുടെ മകനും മുൻ ഐസിടി ഉപദേശകനുമായ സജീബ് വാസിദ് ജോയ്, മുൻ വിദ്യാഭ്യാസ മന്ത്രി മോഹിബുൽ‌ ഹസൻ ചൗധരി നൗഫൽ, ബംഗ്ലദേശ് ഹ്യൂമൻ റൈറ്റ്സ് വാച്ച് ജനറൽ സെക്രട്ടറി മഹമ്മദ് അലി സിദ്ദിഖ് എന്നിവരുടെ സാന്നിധ്യം ഇതിനോടകം ഉറപ്പായിട്ടുണ്ട്.

ഇവർക്ക് പുറമേ, മുൻ ബംഗ്ലദേശ് ക്രിക്കറ്ററും മുൻ പാർലമെന്റ് അംഗവുമായ ഷാക്കിബ് അൽ ഹസൻ, മുൻ നയതന്ത്രജ്ഞൻ അമിനുൽ ഹഖ് പലാഷ്, കൗണ്ടർ ടെററിസം അനലിസ്റ്റ് അബു ഉബൈദ അരിൻ, ബംഗ്ലദേശ് ഹ്യൂമൻ റൈറ്റ്സ് വാച്ച് യുഎസ്എ ഡയറക്ടർ ഷാ മുഹമ്മദ് ബക്തിയാർ എന്നിവരും പ്രസ്തുത പാനലിൽ അണിനിരക്കും.