തമിഴ്‌നാട്ടിൽ ടാസ്മാക് ബാറുകൾ അനിശ്ചിതകാലത്തേക്ക് അടച്ചു; പുതിയ ടെൻഡറുകൾ ഉടൻ

തമിഴ്‌നാട്ടിലെ ടാസ്മാക് മദ്യവിൽപന ശാലകളോട് ചേർന്ന് പ്രവർത്തിക്കുന്ന മുഴുവൻ ബാറുകളും അനിശ്ചിതകാലത്തേക്ക് അടച്ചുപൂട്ടി. നിലവിലെ ലൈസൻസ് കാലാവധി ജൂൺ 30-ഓടെ അവസാനിച്ച സാഹചര്യത്തിലാണ് സർക്കാരിന്റെ ഈ സുപ്രധാന നടപടി.

സംസ്ഥാനത്തുടനീളമുള്ള ഏകദേശം 2,320 ബാറുകളുടെ പ്രവർത്തനത്തെ ഈ തീരുമാനം നേരിട്ട് ബാധിച്ചിട്ടുണ്ട്. പുതിയ ടെൻഡർ നടപടികളിലൂടെയായിരിക്കും ബാറുകൾക്ക് ഇനി ലൈസൻസ് അനുവദിക്കുക.

മദ്യനിരോധന – എക്സൈസ് വകുപ്പ് മന്ത്രി കെ വിഘ്നേഷ് പങ്കെടുത്ത ബോർഡ് യോഗത്തിലാണ് ഇതുസംബന്ധിച്ച അന്തിമ തീരുമാനമുണ്ടായത്. ടെൻഡർ നടപടികൾ പൂർത്തിയാകുന്നത് വരെ ബാറുകൾ അടച്ചിടുന്നത് വഴി സർക്കാരിന് പ്രതിമാസം 400 കോടി രൂപയുടെ വരുമാന നഷ്ടം ഉണ്ടായേക്കാമെന്നാണ് ടാസ്മാക് അധികൃതർ നൽകുന്ന സൂചന.

വരാനിരിക്കുന്ന ടെൻഡർ വ്യവസ്ഥകളിൽ സമൂലമായ മാറ്റങ്ങൾ വരുത്താനും സർക്കാർ ആലോചിക്കുന്നുണ്ട്. ബാറുകൾ അടച്ചതോടെ മദ്യശാലകൾക്ക് മുന്നിൽ പൊതുജനങ്ങൾക്ക് അസൗകര്യമുണ്ടാക്കുന്ന തരത്തിൽ ക്രമസമാധാന പ്രശ്നങ്ങൾ ഉടലെടുക്കുമോ എന്ന ആശങ്ക ജീവനക്കാർ പങ്കുവെക്കുന്നുണ്ട്.

മദ്യം വാങ്ങി വീട്ടിലേക്ക് കൊണ്ടുപോകാൻ താല്പര്യമില്ലാത്ത ഉപഭോക്താക്കൾ കടകൾക്ക് മുന്നിൽ തന്നെ മദ്യപിക്കാൻ സാധ്യതയുണ്ടെന്നും ഇത് പൊതുശല്യമായി മാറുമെന്നും അവർ മുന്നറിയിപ്പ് നൽകുന്നു. അതിനാൽ, ശക്തമായ സുരക്ഷാ മുൻകരുതലുകൾ സ്വീകരിക്കണമെന്നാണ് ജീവനക്കാരുടെ ആവശ്യം.

യഥാർത്ഥത്തിൽ 2024 ജനുവരിയിൽ അനുവദിച്ച ലൈസൻസിന്റെ കാലാവധി 2026 ജനുവരി വരെയായിരുന്നു. എന്നാൽ തമിഴ്‌നാട് നിയമസഭാ തെരഞ്ഞെടുപ്പ് പരിഗണിച്ച് സർക്കാർ ഇത് ജൂൺ വരെ നീട്ടിനൽകുകയായിരുന്നു.

ഈ ദീർഘിപ്പിച്ച കാലാവധിയാണ് ഇപ്പോൾ അവസാനിച്ചിരിക്കുന്നത്. തമിഴ്‌നാട് സർക്കാരിന്റെ പ്രധാന വരുമാന സ്രോതസ്സാണ് ടാസ്മാക്.

നിലവിൽ സംസ്ഥാനത്തുടനീളം 4,048 ചില്ലറ മദ്യവിൽപന ശാലകളാണ് പ്രവർത്തിക്കുന്നത്. പ്രതിദിനം ശരാശരി 150 കോടി രൂപയുടെ വിറ്റുവരവാണ് ഈ ശൃംഖലയ്ക്കുള്ളത്.

അധികാരമേറ്റതിന് പിന്നാലെ മുഖ്യമന്ത്രി വിജയ്, ആരാധനാലയങ്ങൾ, സ്‌കൂളുകൾ, ബസ് സ്റ്റാൻഡുകൾ എന്നിവയുടെ 500 മീറ്റർ പരിധിയിലുള്ള 717 ടാസ്മാക് മദ്യശാലകൾ അടച്ചുപൂട്ടാൻ ഉത്തരവിട്ടിരുന്നു. നിലവിലെ നിയമപ്രകാരം ആരാധനാലയങ്ങൾക്കും സ്കൂളുകൾക്കും 50 മീറ്റർ പരിധിയിൽ മദ്യഷോപ്പുകൾ പാടില്ല എന്ന നിബന്ധന കർശനമാക്കി ദൂരപരിധി 500 മീറ്ററായി ഉയർത്തുകയായിരുന്നു സർക്കാർ.