ഇറാൻ പരമോന്നതനേതാവ് മുജ്തബ ഖമനയി ജീവനോടെയുണ്ടെന്ന് സ്ഥിരീകരിച്ച് യുഎസ് സ്റ്റേറ്റ് സെക്രട്ടറി മാർക്കോ റൂബിയോ. സെനറ്റ് ഫോറിൻ റിലേഷൻസ് കമ്മിറ്റിക്ക് മുമ്പാകെ നടത്തിയ നിർണായകമായ പ്രതികരണത്തിലാണ് അദ്ദേഹം ഇക്കാര്യം വ്യക്തമാക്കിയത്.
ഇറാന്റെ ഭരണകാര്യങ്ങളിൽ മുജ്തബ ഖമനയി സജീവമായി ഇടപെട്ടു വരുന്നതിന്റെ വ്യക്തമായ സൂചനകൾ ലഭ്യമാണെന്ന് റൂബിയോ ചൂണ്ടിക്കാട്ടി. കഴിഞ്ഞ ഫെബ്രുവരി 28-ന് നടന്ന യുഎസ്-ഇസ്രയേൽ സംയുക്ത ആക്രമണത്തിനിടെ മുജ്തബ ഖമനയിക്ക് പരുക്കേറ്റിരുന്നു.
ഇതിനുശേഷം അദ്ദേഹത്തിന്റെ ആരോഗ്യസ്ഥിതിയെക്കുറിച്ച് ആശങ്കകൾ നിലനിന്നിരുന്നു. ഈ സാഹചര്യത്തിലാണ് അമേരിക്കൻ ഭരണകൂടത്തിന്റെ ഭാഗത്തുനിന്നും ഔദ്യോഗികമായ വിശദീകരണം വരുന്നത്.
ഇറാനുമായുള്ള നയതന്ത്ര ബന്ധത്തിൽ ശുഭപ്രതീക്ഷ പ്രകടിപ്പിച്ച റൂബിയോ, ഇരുരാജ്യങ്ങളും തമ്മിൽ പുതിയൊരു കരാറിലെത്താൻ സാധ്യതയുണ്ടെന്നും സൂചിപ്പിച്ചു. എന്നാൽ, ഉപരോധങ്ങൾ പിൻവലിക്കണമെങ്കിൽ ഇറാൻ തങ്ങളുടെ ആണവ പദ്ധതികൾ ഗണ്യമായി കുറയ്ക്കാൻ തയ്യാറാകണമെന്ന കർശന നിലപാടാണ് അദ്ദേഹം ആവർത്തിച്ചത്.
കൂടാതെ, ഹോർമുസ് കടലിടുക്കിന്റെ കാര്യത്തിലും അമേരിക്കൻ നിലപാട് അദ്ദേഹം വ്യക്തമാക്കി. ഇറാൻ ഹോർമുസ് കടലിടുക്ക് കപ്പൽ ഗതാഗതത്തിനായി തുറന്നുകൊടുക്കണമെന്നും, അതിലൂടെ സഞ്ചരിക്കുന്ന കപ്പലുകൾക്ക് നേരെ വെടിയുതിർക്കുന്നത് അവസാനിപ്പിക്കണമെന്നും അദ്ദേഹം ആവശ്യപ്പെട്ടു.
കടലിടുക്കിൽ ഇറാൻ നിക്ഷേപിച്ചിട്ടുള്ള മൈനുകൾ നീക്കം ചെയ്യുന്നതിന് അമേരിക്ക എല്ലാവിധ സഹായവും നൽകുമെന്നും മാർക്കോ റൂബിയോ കൂട്ടിച്ചേർത്തു.
