കേരളത്തിന്റെ എഴുപതാം പിറന്നാളിനൊപ്പം സാംസ്കാരിക രംഗത്തെ വഴികാട്ടിയായ കേരള സാഹിത്യ അക്കാദമിയും 70-ാം വാർഷികത്തിലേക്ക് കടക്കുന്നു. 1956 ഒക്ടോബർ 15ന് തിരുവനന്തപുരം കനകക്കുന്നിൽ ചിത്തിര തിരുനാൾ ഉദ്ഘാടനം ചെയ്ത ഈ സ്ഥാപനം, പിന്നീട് തൃശൂരിലേക്ക് പ്രവർത്തനം മാറ്റുകയായിരുന്നു.
പ്രാദേശിക ഭാഷകളിൽ സാഹിത്യ അക്കാദമികൾ വേണമെന്ന കേന്ദ്ര സാഹിത്യ അക്കാദമിയുടെ ആദ്യ പ്രസിഡന്റ് ജവാഹർലാൽ നെഹ്റുവിന്റെ കാഴ്ചപ്പാടാണ് കേരളത്തിൽ ഇതിന് അടിത്തറ പാകിയത്. സ്ഥാപനത്തിന് അക്കാദമിക് സ്വയംഭരണ പദവി വേണമെന്ന് ശക്തമായി വാദിച്ച അന്നത്തെ തിരു–കൊച്ചി മുഖ്യമന്ത്രി പനമ്പിള്ളി ഗോവിന്ദ മേനോൻ ഇതിൽ നിർണായക പങ്ക് വഹിച്ചു.
പ്രശസ്തനായ സർദാർ കെ.എം. പണിക്കർ ആയിരുന്നു അക്കാദമിയുടെ പ്രഥമ പ്രസിഡന്റ്.
അപൂർവ രേഖകളുടെ കലവറ 1970ൽ പ്രശസ്ത വാസ്തുശില്പി ലാറി ബേക്കർ രൂപകൽപ്പന ചെയ്ത ആധുനിക കെട്ടിടത്തിലാണ് അക്കാദമി പ്രവർത്തിക്കുന്നത്. പ്രശസ്ത എഴുത്തുകാരി ലളിതാംബിക അന്തർജനത്തിന്റെ പേരിലുള്ള ഗ്രന്ഥശാലയിൽ ഒന്നരലക്ഷത്തിലധികം പുസ്തകങ്ങളും പതിനായിരത്തോളം കയ്യെഴുത്തുപ്രതികളും സൂക്ഷിച്ചിരിക്കുന്നു.
വൈക്കം മുഹമ്മദ് ബഷീറിന്റെ കത്തുകൾ, എം.ടി. വാസുദേവൻ നായരുടെ തിരക്കഥകൾ തുടങ്ങിയവ ഉൾപ്പെടുന്ന ഈ ചരിത്ര ശേഖരം ഡിജിറ്റൈസ് ചെയ്യുന്നതിനുള്ള പ്രവർത്തനങ്ങൾ പുരോഗമിക്കുകയാണ്.
കൂടാതെ, അപ്പൻ തമ്പുരാൻ സ്മാരക വായനശാലയും സജീവമായി പ്രവർത്തിക്കുന്നുണ്ട്. തുടക്കകാലത്ത് ബംഗാളി, കന്നഡ, തമിഴ് ഭാഷകളിൽ നിന്നുള്ള കൃതികളുടെ വിവർത്തനങ്ങൾക്കാണ് അക്കാദമി പ്രധാനമായും മുൻഗണന നൽകിയത്.
യാതൊരുവിധ വിട്ടുവീഴ്ചകളുമില്ലാതെ കർശന പരിശോധനകൾക്ക് ശേഷമാണ് പ്രസിദ്ധീകരണത്തിനായി കൃതികൾ തിരഞ്ഞെടുത്തിരുന്നത്. ഇതുവരെയായി ഏകദേശം 1200 പുസ്തകങ്ങളാണ് അക്കാദമി പ്രസിദ്ധീകരിച്ചിട്ടുള്ളത്.
ഭാവിപദ്ധതികൾ “എഴുത്തുകാരുടെ മാത്രമല്ല, വായനക്കാരുടെയും പൊതുസമൂഹത്തിന്റെയും ഇടമായി അക്കാദമി മാറണം. ഗ്രന്ഥശാലയെ മികവിന്റെ കേന്ദ്രമാക്കാനും അപ്പൻ തമ്പുരാൻ മ്യൂസിയം വികസിപ്പിക്കാനും പദ്ധതിയുണ്ട്.
സംസ്ഥാനത്തിന്റെ വിവിധ ഭാഗങ്ങളിലേക്ക് അക്കാദമിയുടെ പ്രവർത്തനങ്ങൾ വ്യാപിപ്പിക്കുകയാണ് ലക്ഷ്യം” എന്ന് കേരള സാഹിത്യ അക്കാദമി സെക്രട്ടറി എം.പി.സുരേന്ദ്രൻ വ്യക്തമാക്കി.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
