അർബുദ ലക്ഷണങ്ങളെ തിരിച്ചറിയാം: അവഗണിക്കരുത് ഈ മുന്നറിയിപ്പുകൾ

ശരീരത്തിലെ കോശങ്ങളുടെ അനിയന്ത്രിതമായ വിഭജനവും വ്യാപനവും മൂലമുണ്ടാകുന്ന ഗുരുതരമായ രോഗാവസ്ഥയാണ് അർബുദം (ക്യാൻസർ). ശരീരത്തിന്റെ ഏത് ഭാഗത്തെയും ബാധിക്കാൻ ശേഷിയുള്ള ഈ രോഗം, കോശങ്ങളുടെ സ്വാഭാവിക വളർച്ചാ ക്രമീകരണങ്ങളെ അട്ടിമറിക്കുകയും ട്യൂമറുകൾ രൂപപ്പെടുത്തുകയും ചെയ്യുന്നു.

രോഗം പ്രാരംഭ ഘട്ടത്തിൽ തന്നെ കണ്ടെത്തിയാൽ ഫലപ്രദമായ ചികിത്സയിലൂടെ പൂർണ്ണമായും ഭേദമാക്കാൻ സാധിക്കുമെന്ന് ആരോഗ്യ വിദഗ്ധർ ചൂണ്ടിക്കാട്ടുന്നു. രോഗത്തിന്റെ തീവ്രതയും വ്യാപ്തിയും അനുസരിച്ച് ലക്ഷണങ്ങളിൽ പ്രകടമായ വ്യത്യാസങ്ങൾ കാണപ്പെടാം.

പ്രധാനപ്പെട്ട ചില മുന്നറിയിപ്പ് ലക്ഷണങ്ങൾ താഴെ പറയുന്നവയാണ്: ശ്വാസകോശ സംബന്ധമായ ലക്ഷണങ്ങൾ:
മൂന്നാഴ്ചയിൽ കൂടുതൽ നീണ്ടുനിൽക്കുന്ന ചുമ സാധാരണ വൈറൽ അണുബാധയായി കരുതി തള്ളിക്കളയരുത്.

ചുമയോടൊപ്പം രക്തം വരികയോ ശ്വാസതടസ്സം അനുഭവപ്പെടുകയോ ശബ്ദത്തിൽ മാറ്റം വരികയോ ചെയ്താൽ അത് ശ്വാസകോശ അർബുദത്തിന്റെ ലക്ഷണമാകാം. ദഹനപ്രക്രിയയിലെ മാറ്റങ്ങൾ:
തുടർച്ചയായ ദഹനക്കേടും ഭക്ഷണം കഴിക്കാനുള്ള പ്രയാസവും ഗ്യാസ്ട്രിക് ക്യാൻസറിന്റെ ലക്ഷണമാകാം.

ആമാശയത്തിന്റെ ആന്തരിക പാളിയിൽ ആരംഭിക്കുന്ന ഇത്തരം അസാധാരണ കോശ വളർച്ചകളിൽ 95 ശതമാനവും ‘അഡിനോകാർസിനോമ’ വിഭാഗത്തിൽപ്പെട്ടവയാണ്. അകാരണമായ ശരീരഭാരക്കുറവ്:
കഠിനമായ വ്യായാമമോ ഭക്ഷണക്രമീകരണമോ ഇല്ലാതെ ചുരുങ്ങിയ മാസങ്ങൾക്കുള്ളിൽ ശരീരഭാരത്തിന്റെ 5 മുതൽ 10 ശതമാനം വരെ കുറയുന്നത് ഗൗരവത്തോടെ കാണണം.

ഇത് രക്തം, ശ്വാസകോശം, പാൻക്രിയാസ് അല്ലെങ്കിൽ ആമാശയം എന്നിവയെ ബാധിക്കുന്ന അർബുദത്തിന്റെ സൂചനയാകാം. സ്തനാർബുദ സൂചനകൾ:
സ്തനങ്ങളുടെ ആകൃതിയിലോ വലുപ്പത്തിലോ ഉണ്ടാകുന്ന മാറ്റങ്ങൾ, മുഴകൾ, വീക്കം, മുലക്കണ്ണിൽ നിന്നുള്ള സ്രവം അല്ലെങ്കിൽ ചർമ്മത്തിലെ നിറവ്യത്യാസം എന്നിവ അവഗണിക്കരുത്.

നിശ്ചിത കാലയളവിലുള്ള സ്വയം പരിശോധനയും മാമോഗ്രാം ഉൾപ്പെടെയുള്ള സ്ക്രീനിംഗുകളും രോഗം നേരത്തെ കണ്ടെത്താൻ സഹായിക്കും. വിസർജ്ജന ശീലങ്ങളിലെ വ്യതിയാനം:
വയറു വീർക്കൽ, വയറുവേദന, മലബന്ധം അല്ലെങ്കിൽ മലവിസർജ്ജന ശീലങ്ങളിലെ സ്ഥിരമായ മാറ്റം എന്നിവ വൻകുടൽ ക്യാൻസറിന്റെ ലക്ഷണമാകാം.

പ്രത്യേകിച്ച് മലത്തിൽ രക്തത്തിന്റെ അംശം കാണപ്പെടുകയോ വിളർച്ച അനുഭവപ്പെടുകയോ ചെയ്യുന്നത് വൈദ്യസഹായം തേടേണ്ട സാഹചര്യമാണ്.

ചർമ്മത്തിലെ മാറ്റങ്ങൾ:
പ്രത്യേകിച്ച് 30 വയസ്സിന് ശേഷം ചർമ്മത്തിൽ പുതിയ മറുകുകൾ രൂപപ്പെടുന്നത് ശ്രദ്ധിക്കണം. നിലവിലുള്ള മറുകുകളുടെ നിറം, വലുപ്പം എന്നിവയിലുണ്ടാകുന്ന മാറ്റങ്ങൾ, രക്തസ്രാവം, ചൊറിച്ചിൽ എന്നിവ സ്കിൻ ക്യാൻസറിന്റെ ഭാഗമാകാൻ സാധ്യതയുണ്ട്.

കൃത്യമായ ആരോഗ്യ പരിശോധനകളിലൂടെ രോഗത്തെ പ്രാരംഭത്തിൽ തന്നെ പ്രതിരോധിക്കാൻ സാധിക്കും.