സ്മാർട്ട്ഫോൺ ഉപയോക്താക്കളുടെ സ്വകാര്യതയും സുരക്ഷയും ഉറപ്പാക്കുന്നതിനായി സാംസങ് തങ്ങളുടെ ലോക്ക്ഡൗൺ മോഡ് പ്രവർത്തനരീതിയിൽ മാറ്റങ്ങൾ വരുത്തുന്നു. നിലവിൽ, ഫോൺ മോഷണം പോവുകയോ സുരക്ഷാ ഭീഷണി നേരിടുകയോ ചെയ്യുമ്പോൾ ബയോമെട്രിക് ലോഗിനുകൾ താൽക്കാലികമായി നിർത്തിവെക്കാനും ലോക്ക് സ്ക്രീൻ ഉള്ളടക്കങ്ങൾ മറച്ചുവെക്കാനും ഈ സംവിധാനം സഹായിക്കുന്നു.
ഇത് സജീവമാക്കിയാൽ ഫോൺ അൺലോക്ക് ചെയ്യാൻ പിൻ (PIN) അല്ലെങ്കിൽ പാറ്റേൺ നിർബന്ധമാണ്. വൺ യുഐ 8.5 (One UI 8.5) പതിപ്പിൽ, പവർ മെനുവിലൂടെയാണ് നിലവിൽ ഈ സേവനം ലഭ്യമാക്കിയിരുന്നത്.
എന്നാൽ ഉപയോക്താക്കളിൽ പലരും പവർ ഓഫ്, റീസ്റ്റാർട്ട് എന്നീ ഓപ്ഷനുകൾക്കപ്പുറം മെനുവിലെ മറ്റ് സേവനങ്ങൾ ശ്രദ്ധിക്കാറില്ല എന്നതുകൊണ്ട് ഈ സൗകര്യം വേണ്ടത്ര പ്രയോജനപ്പെടുത്താൻ കഴിയുന്നില്ല. ഇതിന് പരിഹാരമായാണ് പുതിയ മാറ്റങ്ങൾ കമ്പനി ആസൂത്രണം ചെയ്യുന്നത്.
സോഷ്യൽ മീഡിയ പ്ലാറ്റ്ഫോമായ റെഡിറ്റിലെ ഒരു ഉപയോക്താവ് കണ്ടെത്തിയ വിവരങ്ങൾ പ്രകാരം, പവർ മെനു തുറന്ന് പുറത്തിറങ്ങുമ്പോൾ തന്നെ ഫോൺ ലോക്ക് സ്ക്രീനിലേക്ക് മാറുന്ന രീതിയിലാണ് പുതിയ ക്രമീകരണം. ഇതോടെ ബയോമെട്രിക് സംവിധാനങ്ങൾ താൽക്കാലികമായി പ്രവർത്തനരഹിതമാവുകയും, ഉപയോക്താവിന് പിൻ അല്ലെങ്കിൽ പാറ്റേൺ ഉപയോഗിച്ച് മാത്രം ഫോൺ തുറക്കാൻ കഴിയുന്ന സാഹചര്യം സൃഷ്ടിക്കപ്പെടുകയും ചെയ്യുന്നു.
ഫോൺ നഷ്ടപ്പെടുമെന്ന് ആശങ്കയുള്ള സാഹചര്യങ്ങളിൽ, വളരെ വേഗത്തിൽ സുരക്ഷാ മുൻകരുതൽ എടുക്കാൻ ഈ സംവിധാനം സഹായിക്കും. സാംസങ്ങിന്റെ ഔദ്യോഗിക സ്ഥിരീകരണം വരാനിരിക്കുന്നതേയുള്ളൂവെങ്കിലും, ഡിജിറ്റൽ സുരക്ഷാ രംഗത്ത് വലിയൊരു മുന്നേറ്റമായാണ് ഈ പരിഷ്കാരത്തെ ടെക് ലോകം നോക്കിക്കാണുന്നത്.
ഡാറ്റാ സുരക്ഷ കൂടുതൽ ശക്തമാക്കാനും ഉപയോക്താക്കൾക്ക് തങ്ങളുടെ ഉപകരണങ്ങളുടെ മേലുള്ള നിയന്ത്രണം വർദ്ധിപ്പിക്കാനും ഈ പുതിയ അപ്ഡേറ്റ് സഹായകമാകും.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
